Read Nguna Togoa Etafe North TEA TAPAVANAU 4 Bible Online

TEA TAPAVANAU 4 - Nguna Togoa Etafe North bible

TEA TAPAVANAU 4

¹Go a moro leo po punusi nariesokiana maga mamau puti waina eu do pei tea mariana doko etano ni elo: go kuga leo, naririmata maga ki tea maga waina eu pei tea riesokiana, go tea vasapakavakale ra e dika; go namarimatuaana e pei tea ki tea riesoki ra maga, ma tea vasapakavakale ra e dika.

²Nalakena tea wanogoe a pasa samasama ni tea mate maga waina eu mate sua, p̃arua liu tea mauri maga waina eu ko mauri doko;

³Io, a midoa ki nia naga naata waina e ko da pakilina mau, waina e ko da punusi nawosiana sa waina e do pei tea mariana doko etano ni elo mau, naata wanogoe e p̃ia do liu puti ra.

⁴Go a punusi naga nawosiana mamau puti go sara namarimanumatuaana ni nawosiana, eu pei nalakena naroitoiana e doko namawota ni naatam̃oli go ni tea ni m̃aladigi ki nia. Tea wanogoe nae ma e moro pei tea p̃alo, go e pei nakasuaana m̃oli ni nalagi.

⁵Tea vei lala e do p̃elu ki naruna maga, po do dum̃ana gani nap̃okasina.

⁶Nam̃elearu sikai waina e pura ki natam̃ateana e p̃ia do liu nam̃elearu dua waina ero pura ki nawosimawosa‐ana go ki nakasuaana m̃oli ni nalagi.

⁷Go a moro punusi tea waina e pei tea p̃alo doko etano ni elo.

⁸Naatam̃oli sikai waina e sikina doko, go kerua kakana e dika; io, e dika natuna, go e dika taina; ma nawosiana aneana e da nopu mau, go namatana maga ero da maro ki navei‐sogolapaana mau. Go e da pusuusu mau, po naga, A do magi sei p̃osiwosi mawosa, po do dum̃agu mauti naatagu ki tea waina e p̃ia? Tea wanogoe nae ma e moro pei tea p̃alo, ioro, e pei narogokitesaana warua sikai.

⁹Edua ero p̃ia liu sikai maau; nalakena ero peani namoriana wia ni nawosiana adeada.

¹⁰Nalakena sikai e pe rowo, kerua e pe wo pua dakati a ega tuleana: ma ai ki tea waina e sikina doko ragi waina e dowo, go e dika tea p̃ota naga ega vua dakati a ega tuleana.

¹¹Go edua ero pe saisai one tokora sikai maau, ero pe wo pivitinu p̃ia: ma naata sikai e pe sikina doko, e pe wo pivitinu dapale sava?

¹²Naatam̃oli sikai e mariatae marimatua ki tea waina e sikina doko, ma ero pe rua, ero pe wo lawodugoro e. Go ara dolu ni viria eu mari sa pei tea mari‐kotovi‐ana m̃araverave.

¹³Natureai tika go manumatua sikai e p̃ia liu nawota matua go manumatavusa sikai waina ega wo da masau moro dapesoki namidoakip̃otae‐ana mau.

¹⁴Nalakena e dave m̃elu nasum̃a ni navavaiana umai naga ega vei nawota; kite waina e pakilina pei tea tika doko namarakiana aneana.

¹⁵A punusi tea mauri maga mamau puti waina eu surasurata usuraki etano ni elo, naga eu sikoti natureai wanogoe waina e lawodu oli a.

¹⁶Naatam̃oli laapa, eu da makoto mau, tea laapa waina e maraki ra: ma tea maga waina euga wo edakugoro ra, euga wo da laelaea asa mau. Tea wanogoe e moro pei tea p̃alo, go e pei nakasuaana m̃oli ni nalagi.