Read Nguna Togoa Etafe North TEA TAPAVANAU 5 Bible Online

TEA TAPAVANAU 5 - Nguna Togoa Etafe North bible

TEA TAPAVANAU 5

¹P̃a vavaigoro nam̃ele natuam̃a ragi waina p̃a wo do paki nasum̃a ki Sup̃e pano; nalakena ku pe vaki m̃aladigi naga p̃a taki dorogo, e p̃ia do liu waina ku pe vitua ki naviriana ki tea vei lala maga: nalakena nara eu da atae naga eu do mari tea waina e sa mau.

²P̃a ta pei tea magamaaga p̃alo mau, go nap̃op̃om̃a ega ta m̃araverave noa te navatuna narae ni Sup̃e mau; nalakena Sup̃e e doko nakoroatelagi, go nigo ku doko maramana: nalakena tea wanogoe nanoaana anigo maga euga ta laapa mau.

³Nalakena nap̃erea sikai e do umai pilake nalapalapaana ni natomariana; go nadaleo ni tea vei lala e do pilake nalapalapaana ni navasaana maga.

⁴Ragi waina ku sai nasaiana sikai paki Sup̃e, p̃a ta mari daliali lagati dua e asa mau; nalakena ega wo da maro tea manumatavusa maga mau: p̃a lagati pitua ki tea waina ku sai a.

⁵Ku pe ta mari te nasaiana mau, e p̃ia do liu waina ku pe mari nasaiana po da lagati pitua ki nia mau.

⁶P̃a ta suasua ki nawokam̃a naga ega mari nap̃atokom̃a naga ega mari naleo sa mau; go p̃a ta noa narae ni tea tautauana ki Yehovah ki taua maga naga e pei namarisap̃oana sikai mau: mase Sup̃e e pe maeto ki nadaleom̃a, go e pe mari sa ki nawosiana ni nam̃elearum̃a maga.

⁷Nalakena e do pakilina dapala nogoe pae nalapalapaana ni nap̃erea maga go nap̃aloana maga go navasaana laapa: ma p̃a matau ki Sup̃e.

⁸Ku pe vunusi nariesokiana ni tea tika maga, go nawelukidoaana ni navasap̃otaeana go ni naleanaana doko navanua sikai, p̃a ta maga nalo ni nawosiana wanogoe mau: nalakena tea sikai waina e pakilagi liu tea vakilagi maga e do midoa ki nia; go tea waina e pakilagi liu ra e doko.

⁹Go nawa ni navanua e pei tea ki tea mamau puti: vanua e do magi nawota pei tea suasua.

¹⁰Naata waina e dodomi silver ega wo da maro ki silver mau; go naata waina e dodomi nasogolapaana ega wo da maro ki nataluaana mau: tea wanogoe e moro pei tea p̃alo.

¹¹Ragi waina naloriki maga eu disu p̃arua ki nalaapaana, tea maga waina eu do gani ra eu disu po laapa: go talakeana e peani tea wia nasava asa, ma naga namatana eroga to leo punusi ra?

¹²Namaturuana ki naatam̃oli wosiwosi sikai e p̃ia, e pe kani tea kiki kite tea warua: ma navukaana ki tea sogolapa ega ta suasua ki nia naga ega maturu mau.

¹³Nasaana warua sikai a punusi a waina e doko etano ni elo, e pei tea waia, nasogolapaana waina talakeana e mauti a, e pei namarisa‐ki‐nia‐ana:

¹⁴Go nasogolapaana wanogoe e pano puoli nalakena namarisakiana sa; go e pe veani natuna naanoai sikai, ma te navatuna sikai e pe wo da doko nam̃elearuna doko mau.

¹⁵Dapala waina e m̃alam̃ala m̃elu nap̃ele ni p̃ilana umai, dapala nogoe ega wo moro m̃alam̃ala liliu pano, go ega wo da dape te navatuna ni nawosiana aneana pano doko nam̃elearuna mau.

¹⁶Go tea wanogoe e moro pei nasaana warua liu sikai, naga dapala waina e umai, dapala nogoe ega wo moro pano: go e peani tea wia nasava asa waina e p̃osiwosi mawosa raki nalagi?

¹⁷Sara naaleatia ni namauriana aneana e doko namaligo doko, go e dogokitesa p̃arua, po peani nasasanaana go namaritausuana.

¹⁸P̃a leo, tea waina a punusi a naga e p̃ia go naga e pei tea masauniana, e pei naga naatam̃oli ega to ganikani po do munu po doko p̃ia doko nawosiana mamau puti aneana waina e do p̃osiwosi asa etano ni elo, sara naaleatia ni namauriana aneana waina Sup̃e e dua e asa: nalakena naleo wanogoe e pei matele aneana.

¹⁹Pataka sikai ma sara naatam̃oli waina Sup̃e e dua ra navei‐sogolapa‐ana go naveaniana, go waina e dua ra namarimatuaana naga euga kanikani asa, go naga euga tape matele adeada, po laelaea doko nawosiana adeada; tea wanogoe e pei navituaana m̃elu Sup̃e.

²⁰Go ega wo da midoaki parati ki p̃arua ki naaleatia maga ni namauriana aneana mau; nalakena Sup̃e e dua e tea waina e do maro asa nap̃op̃ona.