Read Nguna Togoa Etafe North TEA TAPAVANAU 6 Bible Online

TEA TAPAVANAU 6 - Nguna Togoa Etafe North bible

TEA TAPAVANAU 6

¹Nasaana sikai a punusi a e doko etano ni elo, go e madaga ki naatam̃oli maga:

²Naatam̃oli sikai waina Sup̃e e dua e nasogolapaana go naveaniana, go nadodomadaganiana, dapala waina e da dika te navatuna waina nap̃op̃ona e masauna, ma Sup̃e e da dua e namarimatuaana naga ega kanikani asa mau, ma nam̃enaki sikai e ganikani asa; tea wanogoe e pei tea p̃alo, go e pei narogokitesaana warua sikai.

³Naatam̃oli sikai e pe vesi natuna maga eu pe vei p̃onotia sikai, po mauri doko natau laapa, go naaleatia maga ni natau maga ni namauriana aneana eu pe laapa, ma naatana e pe ta pura ki tea waina e p̃ia mau, go e pe tika naovakiana; a noa naga tea solapesiana sikai m̃elu nagoroi e pe wia liu sa:

⁴Nalakena e pakilina pei tea p̃alo, go e m̃elu pano doko namaligo, go nagisana e pei tea kavugoroana ki namaligo;

⁵Go e da punusi elo mau, kite atae te navatuna mau; tea wanogoe e peani namaromaroana liu sa.

⁶Io, e pe mauri doko natau manu sikai paka rua, ma ega wo da maro tea waina e p̃ia mau: tea mamau puti eu da paki tokora sikai maau pano mau, kite?

⁷Nawosiana ki naatam̃oli e mamau puti pei agi nawokana, ma navitoloana aneana e da nopu mau.

⁸Nalakena nasava waina tea manumatua e p̃ia liu tea manumatavusa asa kite nasava waina naatam̃oli midoakiatae e p̃ia liu tea midoakisap̃o asa?

⁹Tea waina namata ni naatam̃oli e punusi a, e p̃ia liu namasauana vasara aneana: tea wanogoe ma e moro pei tea p̃alo go nakasuaana m̃oli ni nalagi.

¹⁰Te navatuna waina e pea doko e pei tea salagisana tuai, go e pei tea ataeana naga e pei naatam̃oli: go e mari sa lawodu raki naata waina e kasua liu sa.

¹¹Navasaana laapa eu doko waina eu mari tea p̃alo eu disu po p̃arua, go naatam̃oli e p̃ia asa nasava?

¹²Nalakena sei e atae tea waina e p̃ia ki namauriana ki naatam̃oli, naaleatia maga mamau puti ni namauriana p̃alo aneana waina e do pano dakiusi melu sikai? Nalakena sei e mariatae noa ki naatam̃oli sikai ki tea waina ega wo edakugoro e umai etano ni elo?