Read Nguna Togoa Etafe North TEA TAPAVANAU 7 Bible Online

TEA TAPAVANAU 7 - Nguna Togoa Etafe North bible

TEA TAPAVANAU 7

¹Nagisa wia sikai e p̃ia liu naroro lolo ni naulu laapa. Go naaleatia ni namateana e p̃ia liu naaleatia ni navakilinaana ki naatam̃oli.

²E pe vaki nasum̃a ni natagiana e pe wia liu waina e pe vaki nasum̃a ni nakaniana: nalakena tea wanogoe e pei namatap̃ago edaku mau ki naatam̃oli maga mamau puti; go tea waina e mauri doko ega wo midoaki soki a nap̃op̃ona.

³Nasusueana e p̃ia liu namuruana: nalakena namata‐susue‐ana e mari navei‐p̃op̃owia‐ana.

⁴Nap̃op̃o ni tea manumatua e doko nasum̃a ni natagiana; ma nap̃op̃o ni tea manumatavusa e doko nasum̃a ni namuruana.

⁵E p̃ia ki naatam̃oli naga ega rogo natapavanauana ki tea manumatua, liu naga ega rogo nalegaana ki tea manumatavusa maga.

⁶Nalakena dapala nam̃alidalidaana ni naragorago maga etano ni lasa veni sikai, namuruana ki tea manumatavusa e dapala nogoe: tea wanogoe e moro pei tea p̃alo.

⁷Natapepavakotoana e mari naatam̃oli manumatua sikai e manumatavusa; go ruku e doa sa ki namidoakiataeana.

⁸Namatap̃ago edaku ni naleo sikai e p̃ia liu naatulakeana kakana: tea vei p̃op̃o vakitano e p̃ia liu tea vei p̃op̃o vakilagi.

⁹P̃a ta mari m̃araverave naga p̃a maeto mau: nalakena namaetoana e doko nap̃op̃o ni tea manumatavusa maga.

¹⁰P̃a ta noa, Nasava e pei nalakena naaleatia vea maga eu p̃ia liu naaleatia maga waia? Nalakena ku da pusuusu pae namanumatuaana nalo ni tea wanogoe mau.

¹¹Namanumatuaana pilake tea veanipiolikiana e p̃ia: io, e p̃ia liu ki tea maga waina eu punusi elo.

¹²Nalakena namanumatuaana e pei nakokoro sikai, dakiusi waina m̃ane e pei nakokoro sikai: ma nawialuaana ni naataeana e pei naga namanumatuaana e do pavaigoro namauriana ki tea waina e peani a.

¹³P̃a midoakiusiusi nawosiana ki Sup̃e: nalakena sei e mariatae mari leana ki tea waina Sup̃e e mari a e dagele?

¹⁴Naaleatia ni natoko‐dam̃ate‐ana p̃a laelaea, go naaleatia ni nariesokiana p̃a midoakiusiusi: Sup̃e e dawona ki da ero doko pitata naga naatam̃oli ega wo da atae te navatuna waina ega wo edakugoro e umai mau.

¹⁵Naleo maga mamau puti a punusi ra naaleatia maga ni namauriana p̃alo aginau: naatam̃oli leana sikai waina e mate puoli doko namarinaleoleanaana aneana, go naatam̃oli sigisigileo sikai waina e mauri parau doko namarinaleosaana aneana.

¹⁶P̃a ta mari leana do liu mau; kite dum̃am̃a mari ko p̃a manumatua liu: ekasana p̃a wo dum̃am̃a mari puoli ki‐go?

¹⁷P̃a ta sigisigileo do liu, go p̃a ta manumatavusa mau: ekasana p̃a wo mate pea ki ragi anigo?

¹⁸E p̃ia naga p̃a wo dape parati ki tea wanogoe; ioro, p̃a ta dosa liliua ki nam̃elearum̃a m̃elu dua ki nia mau: nalakena tea waina e matau ki Sup̃e ega wo dave m̃elu dua ki puti ra.

¹⁹Namanumatuaana e magi naatam̃oli manumatua pei nakasuaana sikai do liu tea maraki rualima sikai waina eu doko natokoana sikai.

²⁰Naatam̃oli leana sikai e da doko maramana mau, waina e do mari leana po da do mari naleo sa mau.

²¹Go p̃a ta dogo soki navasaana maga mamau puti waina eu do pei tea noaana mau; mase ku pe rogo naga tea suasua anigo e pe vasa sa ki‐go:

²²Nalakena nap̃op̃om̃a e atae naga paka laapa nigo ma ku dum̃am̃a pasa sa ki tea p̃ota maga.

²³Tea mamau puti wanogoe a maridogo ra doko namanumatuaana: a naga, Aga wo pei tea manumatua; ma e du uvea kinau.

²⁴Tea waina e doko sua, e doko em̃ae go e pakipua liu; sei waina e mariatae leousiusi atae a?

²⁵A do doa namidodoana aginau, go nap̃op̃ogu e pei tea lawokiana asa, naga aga atae go naga aga leousiusi po laaga namanumatuaana, go nalake ni naleo maga, go a pap̃ai naga nasigisigileoana e pei naveilalaana, go naga namanumatavusaana e pei naroropaana:

²⁶Go a pap̃ai naleo sikai waina e kokona liu namateana, nagoroi sikai waina nap̃op̃ona e pei vaivai maga go kup̃ena maga, go nam̃elearuna maga ero dapala namori maga: tea waina e pei tea midoakim̃ata‐kiana ki Sup̃e, ega wo sava dua ki nia; ma tea mari naleo sa ega wo pei tea vuasokiana pae asa.

²⁷P̃a leo, a po pap̃ai tea waia, Tea Tapavanau e noa e, a mari saisai ki naleo maga naga aga atae m̃ata ki nalomauana kakana:

²⁸waina nap̃op̃ogu e ko do laaga asa, ma a ko da pap̃ai a mau: a po pap̃ai naanoai sikai maau sa m̃elu m̃aleoputo ni manu sikai; ma a da pap̃ai te nagoroi sikai maau m̃elu m̃aleoputo kakada mau.

²⁹P̃a leo, tea waia sikina a po pap̃ai a, naga Sup̃e e mari naatam̃oli e leana; ma eu midoaki p̃ai namidoaki‐p̃otae‐ana sa visarasara laapa.