Read Nguna Togoa Etafe North TEA TAPAVANAU 8 Bible Online

TEA TAPAVANAU 8 - Nguna Togoa Etafe North bible

TEA TAPAVANAU 8

¹Sei waina e dakiusi naatam̃oli manumatua? Go sei waina e atae nanoa‐p̃otae‐ana ni naleo sikai? Namanumatuaana ki naatam̃oli e mari naraena e giregire, go nakasuaana ni naraena e panop̃ota.

²A pasa parati ki‐go, po naga, P̃a vavaigoro natip̃akiana ki nawota, nalakena e pei navasasokiana ki Sup̃e.

³P̃a ta mari m̃araverave naga p̃a m̃elu dua ki naraena pano mau; p̃a ta lawodu sokisoki naleo sikai waina e sa mau: nalakena e do mari tea waina e dum̃ana midoa ki m̃ata ki nia.

⁴Nalakena navasaana ki nawota e pei nawotaeana; go sei e mariatae noa ki nia naga, Ku do mari nasava?

⁵Tea waina e pavaigoro natip̃akiana ega wo da sua te namarisakiana mau; go nap̃op̃o ni naatam̃oli manumatua sikai e atae p̃otae ragi go napua:

⁶Nalakena sara navatuna e peani ragi kakana sikai go napua; ma narogokitesaana ki naatam̃oli e madaga doko asa.

⁷Nalakena e da atae tea waina ega wo pakilina mau; go sei e mariatae noa ki nia takana waina ega wo pakilina?

⁸Te naatam̃oli e da doko mau waina e peani namarimatuaana dap̃au naatana naga ega vuasoki naatana; go e da peani navei‐nawota‐ana dap̃au naaleatia ni namateana mau; go namaromaroana e dika navakalo wanogoe: go nasigisigileoana ega wo da pualua tea waina e doko asa doko mau.

⁹Tea mamau puti wanogoe a punusi sua e, go a lawo ki nap̃op̃ogu paki sara nawosiana waina e do pei tea mariana doko etano ni elo ragi waina naatam̃oli sikai e peani naveinawotaana dap̃au tea p̃ota sikai po mari sa ki nia.

¹⁰Go a punusi tea sigisigileo maga eu pei tea ovakiana, go eu pei tea tapetapeana paki matigo pano; go tea leana maga eu m̃elu dua ki tokora tapu pano, po pei tea maliokiana natokoana: go tea wanogoe e moro pei tea p̃alo.

¹¹Nalakena navasap̃otaeana dip̃a nawosiana sa sikai e da pei tea mariana m̃araverave, nalakena tea wanogoe nap̃op̃o ni naatam̃oli natuda maga e pei tea lawokiana e doko ara doko naga euga mari tea waina e sa.

¹²Tea mari naleo sa sikai e pe mari naleo sa paka p̃onotia sikai, go naaleatia maga ni namauriana aneana eu pe laapa, ma a atae parati ki naga tea maga waina eu matau ki Sup̃e euga wo doko p̃ia doko, nalakena eu mataku naraena.

¹³Ma tea sigisigileo ega wo da doko p̃ia doko mau, go naaleatia aneana maga euga wo da laapa mau, euga wo dapala melu sikai; nalakena e da mataku narae ni Sup̃e mau.

¹⁴Nap̃aloana sikai e doko waina e do pei tea mariana usuraki maramana; naatam̃oli leana maga eu doko, go e do pakilina ki da pataka sikai ma nawosiana ki tea sigisigileo; go naatam̃oli sigisigileo maga eu doko, go e do pakilina ki da pataka sikai ma nawosiana ki tea leana: a noa naga tea wanogoe e moro pei tea p̃alo.

¹⁵Go a pasa p̃ia ki nalaelaeaana nalakena naatam̃oli e da peani te naleo wia liu sikai etano ni elo ma naga ega to ganikani, po do munu, po do mari katakata: go tea wanogoe ega wo doko sikoti a doko nawosiana aneana duaduru naaleatia maga mamau puti ni namauriana aneana waina Sup̃e e dua e asa doko etano ni elo.

¹⁶Ragi waina a pitua ki nap̃op̃ogu e kasua doko asa doko naga aga atae namanumatuaana, go naga aga vunusi nawosiana waina e do pei tea mariana maramana:

¹⁷Ragi wanogoe a punusi nawosiana mamau puti ki Sup̃e, go a punusi naga naatam̃oli e mari sa leousiusi atae puti nawosiana waina e do pei tea mariana doko etano ni elo mau: nalakena naatam̃oli sikai e pe wosiwosi kasua asa naga ega atae parati ki nia, go namatana maga ero pe ta punusi namaturuana asa mau aleati kite p̃ogi, ma e pe wo da pap̃ai a mau; go naatam̃oli manumatua sikai e pe midoa ki nia naga e pe atae a, ma e pe wo da mariatae pap̃ai a mau.