Read Nguna Togoa Etafe North TEA TAPAVANAU 9 Bible Online

TEA TAPAVANAU 9 - Nguna Togoa Etafe North bible

TEA TAPAVANAU 9

¹Go tea mamau puti waia a dape soki a nap̃op̃ogu, po midoakiusiusi puti a; naga tea leana, go tea manumatua, go nawosiana adeada maga, eu doko nam̃elearu ni Sup̃e doko: e pe vei nadodomiana kite navilosiana, ma naatam̃oli e pe ta atae a mau; tea mamau puti waina e doko naraeda e pei tea p̃alo mau.

²Tea sikai maau sa e do pakilina ki tea maga mamau puti: navatuna sikai maau e do pakilina ki tea leana go ki tea sigisigileo; go ki tea wia go ki tea tautau go ki tea waina e da dautau mau; go ki tea waina e do mari naviriana, go ki tea waina e da do mari naviriana mau: dapala waina e do pakilina ki tea leana, dapala nogoe e moro do pakilina ki tea mari naleo sa; go ki tea waina e do pivisa, go ki tea waina e mataku navivisaana sikai.

³Tea waia e pei nasaana sikai doko tea mamau puti waina e do pei tea mariana usuraki etano ni elo, naga navatuna sikai maau, io e do pakilina ki tea maga mamau puti: go nap̃op̃o ni naatam̃oli natuda maga e pura ki tea sa, go naroropaana e doko nap̃op̃oda ragi waina eu mauri doko, go edaku ki nia eu paki namateana.

⁴Nalakena naata waina e doko sikoti tea mauri maga e peani naleogoroana: nalakena koria mauri sikai e p̃ia liu laion mate sikai.

⁵Nalakena tea mauri maga eu atae naga euga wo mate: ma tea mate maga eu da atae te navatuna mau, go eu da moro peani te namoriana mau; nalakena eu da moro pei tea midoakiana mau.

⁶Go nadodomiana adeada, go navilosiana adeada, go naroitoiana adeada eu pano puoli; go eu da moro peani matele mau nalo ni te navatuna waina e do pei tea mariana doko etano ni elo.

⁷P̃a vae napua anigo pano, p̃a kani navinaga anigo pilake nalaelaeaana, po munu waine anigo pilake p̃op̃o laelaea; nalakena Sup̃e e midoa ki m̃ata ki sua tea waina ku mari a.

⁸Tea suniana anigo maga euga tare sara ragi; go nap̃aum̃a ega ta dika ki naroro lolo mau.

⁹P̃a laelaea doko sikoti nagoroi anigo waina ku dodomi a, sara naaleatia ni namauriana p̃alo anigo, waina Sup̃e e dua ko asa doko etano ni elo, naaleatia maga mamau puti ni nap̃aloana anigo: nalakena tea wanogoe e pei matele anigo ni namauriana waia go ni nawosiana anigo waina ku do p̃osiwosi mawosa asa doko etano ni elo.

¹⁰Tea waina nam̃elearum̃a ega vap̃ai a naga ega mari a, tea wanogoe p̃a mari a ki nakasuaana anigo; nalakena nawosiana e dika, go namidoakiana, go naataeana, go namanumatuaana, doko matigo tokora waina p̃a vaki asa pano.

¹¹Go a moro punusi doko etano ni elo, naga navasaana e da pei tea ki tea m̃araverave mau, kite navakalo e da pei tea ki tea kasua mau, kite navinaga e da pei tea ki tea manumatua mau, kite nasogolapaana e da pei tea ki naatam̃oli midoaki‐atae maga mau, kite nasaup̃iaana e da pei tea ki naatam̃oli wosiwosi atae p̃ia maga mau; ma ragi, go tea waina eu da atae a naga ega vakilina ki da mau, ero do pakilina ki puti ra.

¹²Nalakena naatam̃oli e da atae ragi aneana mau: dapala waina naika maga eu do pei tea tapesokiana kup̃ena sa sikai, go dapala waina manu maga eu do pei tea sasakiana ki vaivai, dapala nogoe naatam̃oli natuda maga eu do pei tea sasakiana ki ragi sa sikai, ragi waina e m̃araverave dowo ara.

¹³Go a moro punusi namanumatuaana, tea tapala waia, doko etano ni elo, dapala e pei tea warua paki nau:

¹⁴Natokoana kiki sikai e doko, go naatam̃oli eu pisa maau eu doko asa doko; go nawota warua sikai e duleana dip̃a e, po kelugoro e, po davagi nakoro ni p̃aaka warua maga dip̃a e:

¹⁵Go naatam̃oli tika go manumatua sikai e pei tea vap̃aiana e doko asa, go pae namanumatuaana aneana e mauti natokoana wanogoe; ma te naata sikai e da moro midoaki naatam̃oli tika wanogoe mau.

¹⁶Go a naga, Namanumatuaana e p̃ia liu nakasuaana: ma namanumatuaana ki naatam̃oli tika wanogoe e pei tea midoakip̃alo‐kiana, go navasaana aneana maga eu da pei tea rogo‐atae‐ana mau.

¹⁷Navasaana maga ki tea manumatua waina e pasa matemate ara, eu pei tea rogo‐atae‐m̃ata‐kiana liu naviosoana ki tea waina e do maramara m̃aleoputo ni tea vei lala maga.

¹⁸Namanumatuaana e p̃ia liu nalikau maga ni navakalo: ma tea mari naleo sa sikai maau e mariatae sikina dapera ki tea wia laapa.