Read Nguna Togoa Etafe North NALEGAANA NI NALEGAANA MAGA 2 Bible Online

NALEGAANA NI NALEGAANA MAGA 2 - Nguna Togoa Etafe North bible

NALEGAANA NI NALEGAANA MAGA 2

¹Kinau a pei rose sikai ni Sharon, Lili sikai ni nap̃aloa maga.

²Dapala lili sikai m̃aleoputo ni tea makalikali maga, Tagu ri nagoroi e dapala nogoe m̃aleoputo ni naatam̃oli natuda nagoroi maga.

³Dapala nakavika m̃aleoputo ni nakau maga ni mala ni nakau, Tea dodomiana aginau e dapala nogoe m̃aleoputo ni naatam̃oli natuda naanoai maga. A doko natano melu kakana po maro p̃arua, Go nawana e lolo paki namagagu.

⁴E piragi au paki ekopu ni nasum̃a ni waine, Go manututu aneana dap̃augoro au e pei nadodomiana.

⁵Kuga silae au ki keke maga ni resin maga, kuga vakale au ki nakavika maga: Nalakena kinau a sasana ki nadodomiana.

⁶Nam̃elearuna ni mawiri e doko etano ni nap̃augu, Go nam̃elearuna ni matua e doti au.

⁷A mari mu kuga vivisa, nagoroi maga ni Yerusalem O, Pae kasel maga go pae diir goroi maga ni namalasi, Naga kuga ta mari pugoni go naga kuga ta pulevule nadodomiana mau, Pa pa ega suasua.

⁸Nadaleo ni tea dodomiana aginau Kuga leo, e do umai nea, E do sokasokamidi tava warua maga, e do dam̃atam̃alua tava kiki maga.

⁹Tea dodomiana aginau e dakiusi kasel sikai kite hart tureai sikai: Kuga leo, e do lawodu nea nataku ni nakoro anigida, E do leoduru pae namata leoduru maga, E do leoduru panako pae namata leoduru sariana.

¹⁰Tea dodomiana aginau e pasa, po noa ki nau, e naga, P̃a tuleana, tagu ri nagoroi, tea vei rae wia aginau, go p̃a umai pano.

¹¹Nalakena p̃a leo, ragi ni namaladiana e liu pano, Usa e sina po pano;

¹²Napum̃a maga eu pakilina navanua; Ragi ni nalegaana ni manu maga e po umai, Go nadaleo ni turi e pei tea rogoana navanua anigida;

¹³Napuliva e do mari nawana malakesa maga eu mami, Go vaine maga eu pum̃a, eu pitua ki nap̃oda. P̃a tuleana, tagu ri nagoroi, tea vei rae wia aginau, go p̃a umai pano.

¹⁴Tokopea aginau O, waina ku doko tokora ni nasavasiliana maga ni vatu laketoko, tokora maga ni natokolokuana ni napatira, P̃a visei ki nau naraem̃a, p̃a mari au aga rogo nadaleom̃a; Nalakena nadaleom̃a e lolo, go naraem̃a e pei tea leom̃atakiana.

¹⁵Kuga maginami puasoki foks maga, foks kiki maga, waina eu mari sa ki roara maga ni vaine; Nalakena roara ni vaine aginami maga eu do pum̃a.

¹⁶Tea dodomiana aginau e pei aginau go kinau a pei aneana: E do pagani navata aneana m̃aleoputo ni lili maga.

¹⁷Pa pa sui ni aleati ega wo puoli, go melu maga euga wo sava pano, P̃a maradoa, tea dodomiana aginau, go p̃a takiusi kasel sikai, kite hart tureai sikai Roara maga ni Bether.