Read Nguna Togoa Etafe North NALEGAANA NI NALEGAANA MAGA 3 Bible Online

NALEGAANA NI NALEGAANA MAGA 3 - Nguna Togoa Etafe North bible

NALEGAANA NI NALEGAANA MAGA 3

¹A one nawewele aginau p̃ogi po laaga tea waina naatagu e dodomi a: A laaga asa, ma a da pap̃ai a mau.

²A noa, Aga tuleana, po surata pasara natokoana, Napua maga go napua welewelea maga, Aga wo laaga tea waina naatagu e dodomi a: A laaga asa, ma a da pap̃ai a mau.

³Tea vavaigoro maga waina eu do surata pasara natokoana eu pap̃ai au: A noa ki da, a naga, Ku punusi tea waina naatagu e dodomi a, kite?

⁴A liu dua ki da pano ragi kiki, Go a pap̃ai tea waina naatagu e dodomi a: A puasoki a, po da doropusi a mau, Pa pa a piragi a paki ekopu ni nasum̃a ki p̃ilagu, Go paki ekopu ni em̃ago ki tea waina e dumau ki nau.

⁵A mari mu kuga vivisa, nagoroi maga ni Yerusalem O, Pae kasel maga go pae diir goroi maga ni namalasi, Naga kuga ta mari pugoni go naga kuga ta pulevule nadodomiana mau, Pa pa ega suasua.

⁶Sei waia e do sake pae masop̃alo umai dakiusi tea lawodu maga ni naasua, Tea nap̃oa p̃ia ki murra go ki libano, Go ki sara nam̃otam̃ota ki tea sorisori?

⁷Kuga leo, e pei nawewele vausiana ki Solomon; Naatam̃oli marimatua rualima latesa eu doko dalivirigoro e, Ni naatam̃oli marimatua maga ni Israel.

⁸Eu mamau puti puati lova, po pei tea viseikiana ni navakalo: Sara naatam̃oli eu sikasikai puti pilake lova adeada dau namaoda, Nalakena namatakuana ni p̃ogi.

⁹Nawota Solomon e dum̃ana maneana mara kariot sikai Ni nakau maga ni Lebanon.

¹⁰E mari tea lawodu kakana maga eu pei silver, Etano kakana e pei kold, malo tasake kakana e pei tea miala‐kesakesa, M̃aleoputo kakana e pei tea tavagi‐p̃elesa‐kiana ki nadodomiana, Pae nagoroi maga ni Yerusalem.

¹¹Kuga tave pano, nagoroi maga ni Sion O, po leo punusi nawota Solomon, E suni vauvau waina p̃ilana e pauvau ki nia asa naaleatia ni navitawiriana aneana, Go naaleatia ni nalaelaeaana ni nap̃op̃ona.