Read Nguna Togoa Etafe North NALEGAANA NI NALEGAANA MAGA 4 Bible Online

NALEGAANA NI NALEGAANA MAGA 4 - Nguna Togoa Etafe North bible

NALEGAANA NI NALEGAANA MAGA 4

¹P̃a leo, ku pei rae wia, tagu ri nagoroi; p̃a leo, ku pei rae wia; Namatam̃a ero dapala tokopea maga nataku ni tea taugoro‐rae anigo: Nalolum̃a e dapala navata sikai ni naninani maga, Waina eu one pae nadigi ni tava Cilead.

²Napatim̃a maga eu dapala navata sikai ni shiip goroi waina eu pei tea alatiana, Waina eu po sake pae nasarueana umai; Waina eu mamau puti dape nedue, Go tea tika natuna e da doko m̃aleoputo kakada mau.

³Nagolem̃a ero dapala nalolo sikai ni tea miala kalakala, Go nawokam̃a e pei tea leom̃atakiana: Nap̃orom̃a ero dapala matele ni pomekranet sikai, Nataku ni tea taugoro‐rae anigo.

⁴Nanoam̃a e dapala nasum̃a varau pakilagi ki David waina e pei tea tavagiana agi nalikau maga, Waina nakokoro manu sikai eu dau asa, Taleva mamau puti ki naatam̃oli marimatua.

⁵Nasusum̃a dua ero dapala kasel natuda dua waina ero pei nedue, Waina ero do ganikani m̃aleoputo ni lili maga.

⁶Aga wo paki tava warua ni murra pano, Po paki tava ni libano, Pa pa sui ni aleati ega wo puoli, go melu maga euga wo sava pano.

⁷Ku pei rae wia mamau, tagu ri nagoroi; Go te wotu sikai e da doko ako mau.

⁸P̃a sikoti au pae Lebanon umai, tea vasasokiana aginau, Sikoti au pae Lebanon umai: P̃a leo punusi pae nap̃au ni Amana, Pae nap̃au ni Senir go Hermon, Pae valea maga ni laion maga, Pae tava maga ni leopard maga.

⁹Ku dape pavakoto nap̃op̃ogu, goregu, tea vasasokiana aginau; Ku dape pavakoto nap̃op̃ogu ki namatam̃a maga sikai kakada, Ki namori sikai ni nanoam̃a.

¹⁰Nadodomiana anigo e pei rae wia pa, goregu, tea vasasokiana aginau! Nadodomiana anigo e p̃ia pa p̃arua liu waine! Go nap̃o ni naroro lolo anigo maga liu sara tea ni nap̃o wia!

¹¹Nagolem̃a dua, tea vasasokiana aginau, ero do lawolawo ki honi: Honi go milk ero doko etano ni namenam̃a; Go nap̃o ni sugoro anigo maga e dapala nap̃o ni Lebanon.

¹²Goregu, tea vasasokiana aginau, e pei roara walagoto‐kii‐sokiana sikai, Namata noai walagoto‐kii‐sokiana sikai, namata noai vulusokiana sikai,

¹³Aram̃a maga eu pei rurue sikai ni pomekranet maga, Pilake nawa wia liu maga; Henna pilake nardo lawoana maga,

¹⁴Nardo go saffron, Kalamo go sinamon pilake nakau mamau puti ni libano; Murra go aloe maga, pilake nap̃au ni tea ni nap̃o wia mamau puti.

¹⁵Ku pei namata noai sikai ni roara maga, M̃oru noai sikai ni noai mauri maga, Go noai sara maga pae Lebanon.

¹⁶P̃a tarapa, nalagi ni north; go p̃a umai, tea ni sauth; P̃a sui roara aginau, naga tea ni nap̃o wia kakana maga euga sara pano. Tea dodomiana aginau ega umai paki roara aneana, Go ega kani nawa nakau wia liu aneana maga.