Read Nguna Togoa Etafe North NALEGAANA NI NALEGAANA MAGA 5 Bible Online

NALEGAANA NI NALEGAANA MAGA 5 - Nguna Togoa Etafe North bible

NALEGAANA NI NALEGAANA MAGA 5

¹A po umai paki roara aginau, goregu, tea vasasokiana aginau: A po lei murra aginau pilake balsam aginau; A po gani nasum̃a ni honi aginau pilake honi aginau; A po munu waine aginau pilake milk aginau. Kuga kanikani, tagu ri maga; Kuga munu, po munu p̃arua, tea dodomiana maga.

²Kinau a maturu, ma nap̃op̃ogu e leleo: E pei nadaleo ni tea dodomiana aginau waina e do p̃okawoka, P̃a maginau p̃olagati, goregu, tokopea aginau, tea wialua aginau: Nap̃augu e pura ki nasovaki, Navutilolu aginau maga ki nalawolawoana maga ni p̃ogi.

³A po sawo lua sugoro aginau; aga moro suni a dapale sava? A po sarue natuagu; aga mari ra eroga loa dapale sava?

⁴Tea dodomiana aginau e sai ki nam̃elearuna pae malo masai ni nakokoro, Go namaritagu eu m̃aem̃ae paki nia.

⁵Kinau a duleana naga aga magi tea dodomiana aginau p̃olagati; Go nam̃elearugu ero lawolawo ki murra, Go nakinigu maga ki murra sara paki tea vuatiana maga ni tea walagoto.

⁶Kinau a magi tea dodomiana aginau p̃olagati; Ma tea dodomiana aginau e dum̃ana doa e, po pano. Naatagu e dave pano ragi waina e pasa: A laaga asa, ma a da pap̃ai a mau; A soso e, ma e da pasadara au mau.

⁷Tea vavaigoro maga waina eu do surata pasara natokoana eu pap̃ai au, Eu p̃okati au, eu mari au a pei wotu; Tea vavaigoro nakoro maga eu dape lua sugoro kovagoro aginau kiagu.

⁸A mari mu kuga vivisa, nagoroi maga ni Yerusalem O, naga ku pe vap̃ai tea dodomiana aginau, Kuga noa ki nia naga kinau a sasana ki nadodomiana.

⁹Tea dodomiana anigo e pei nasava p̃arua liu tea dodomiana p̃ota sikai, Tea vei rae wia m̃aleoputo ni nagoroi maga O? Tea dodomiana anigo e pei nasava p̃arua liu tea dodomiana p̃ota sikai, Nalakena ku mari gami auga vivisa dapala nogoe?

¹⁰Tea dodomiana aginau e dare go e miala, E pei manututu m̃aleoputo ni tivilia sikai,

¹¹Nap̃auna e dapala kold tautau p̃arua liu, Navutilolu aneana maga eu piviloki, go eu loa dapala reven sikai.

¹²Namatana ero dapala tokopea maga pisari noai sara maga; Waina ero pei tea sarueana ki milk, waina ero doko navakavuroana.

¹³Napupuna ero dapala sula sikai ni balsam, dapala taua maga ni nasei maga: Nagolena ero dapala lili maga, waina eu do lawolawo ki murra sara.

¹⁴Nam̃elearuna ero dapala rigi maga ni kold, waina eu pei tea vakavuroana ki berul: Nap̃atokoana e dapala nawosiana ni napati ni elefant waina e pei tea kovagoroana ki safir maga.

¹⁵Natuana ero dapala tea lawodu maga ni vatu tau, waina ero pei tea lawokiana laketano maga ni kold wia, Navunusi‐a‐ana e dapala Lebanon, tea wialua dapala sidar maga.

¹⁶Namagana e lolo p̃arua liu: go e pei tea masauniana mamau. Tea wanogoe e pei tea dodomiana aginau, go tea wanogoe e pei tagu ri, Nagoroi maga ni Yerusalem O.