Read Nguna Togoa Etafe North NALEGAANA NI NALEGAANA MAGA 7 Bible Online

NALEGAANA NI NALEGAANA MAGA 7 - Nguna Togoa Etafe North bible

NALEGAANA NI NALEGAANA MAGA 7

¹Nam̃elem̃a dua doko sandal maga ero pei tea leom̃atakiana pa, tea maraki natuna nagoroi O! Kolopu maga ni namaom̃a dua eu dapala vatu wia maga, Nawosiana ni nam̃elearu ni tea wosiwosi mataisau.

²Naputom̃a e dakiusi boul talitali sikai, Waina waine lip̃akisariana e da puoli asa mau: Nap̃elem̃a e dakiusi taua sikai ni whiit, Waina e pei tea lawo‐dalivirigoroana ki lili maga.

³Nasusum̃a dua ero dapala kasel natuna dua waina ero pei nedue.

⁴Nanoam̃a e dapala nasum̃a varau pakilagi ni napati ni elefant; Namatam̃a ero dapala namarourou maga ni Heshbon, pisari namata‐pua ni Bath‐rabbim; Nagisum̃a e dapala nasum̃a varau pakilagi ni Lebanon, Waina e leo paki Damaseko.

⁵Nap̃aum̃a waina e doko ako e dapala Karmel, Go nalolu ni nap̃aum̃a e dapala tea miala‐kesakesa; Nawota e pei tea soliana ki navutilolu kakana maga.

⁶Ku pei rae wia pa go tea masauniana pa, Nadodomiana O, raki namaroana maga!

⁷Tea waia navakilagiana kakam̃a e dakiusi paama sikai, Go nasusum̃a ero dakiusi m̃okai maga ni nawa ni vaine.

⁸A noa, Aga vagi paki paama, Aga vuati arana maga: Go nasusum̃a eroga dapala m̃okai maga ni vaine, Go nap̃o ni nagisum̃a ega tapala nakavika maga;

⁹Go namagam̃a ega tapala waine wia lua, Waina e do diro p̃ia pano agi tea dodomiana aginau, Waina e do mari nagole maga ni tea waina eu maturu eu pasa.

¹⁰Kinau a pei agi tea dodomiana aginau, Go namasauana aneana e paki nau.

¹¹P̃a umai, tea dodomiana aginau, toroga tave paki namalasi; Toroga m̃enaki natokoana kiki maga.

¹²Toroga tuleana malip̃ogi loaloa po paki roara ni vaine maga pano; Toroga vunusi vaine e pe siria, go napum̃ana e pe wokakipua e, Go pomekranet maga eu pe pum̃a: Tokora wanogoe aga wo dua ko nadodomiana aginau.

¹³Dudai maga eu pitua ki nap̃oda, Go sara nawa nakau wia eu doko pisari namata maga ni nasum̃a anigida, tea vau go tea tuai maga, Waina a manigo doropusi daua ki nia, tea dodomiana aginau O.