Read Nguna Togoa Etafe North NALEGAANA NI NALEGAANA MAGA 8 Bible Online

NALEGAANA NI NALEGAANA MAGA 8 - Nguna Togoa Etafe North bible

NALEGAANA NI NALEGAANA MAGA 8

¹Sei ega wo mari ko p̃a tapala goregu, Waina e susu nasusu maga ni p̃ilagu! Ragi waina a pe wo pap̃ai ko katama, a pe wo dum̃ili ko; Io, go te naata e pe wo da midoa ki p̃alo ki nau asa mau.

²A pe wo maraki ko, po piragi ko paki ekopu ni nasum̃a ki p̃ilagu, Waina e pe wo pasa pisei ki nau; A pe wo mari ko p̃a munu waine lolo seara kakana, Nasua ni pomekranet aginau seara kakana.

³Nam̃elearuna ni mawiri e pe wo doko etano ni nap̃augu, Go nam̃elearuna ni matua e pe wo doti au.

⁴A mari mu kuga vivisa, nagoroi maga ni Yerusalem O, Naga kuga ta mari pugoni, go naga kuga ta pulevule nadodomiana mau, Pa pa ega suasua.

⁵Sei waia waina e do sake pae masop̃alo umai, Waina e do ovi tea dodomiana aneana? Nalake ni nakavika a pulevule ko asa: Tokora wanogoe p̃ilam̃a e pitinu ako, Tokora wanogoe e pitinu po dape ko.

⁶P̃a lawo ki nau dapala tea vulusoki sikai doko nap̃op̃om̃a, Dapala tea vulusoki sikai doko narum̃a: Nalakena nadodomiana e kasua dapala namateana; Natotowo‐kasua‐ana e pei dodotika dapala matigo: Mena kakana maga eu pei mena maga ni nakapu, Eu pei mena sikai ki Yehovah.

⁷Noai laapa eu mari sa punue nadodomiana, Go noai sara maga eu mari sa muagoro e: Naatam̃oli sikai e pe vitua ki naleo mamau puti ni nasum̃a aneana raki nadodomiana, E pe vei tea midoaki‐p̃alo‐kiana warua.

⁸Taigida kiki sikai e doko, Go nasusuna ero dika: Tuga wo magi taigida mari nasava Naaleatia waina ega wo pei tea vasakiana asa?

⁹Nae e pe vei nakoro sikai, Tu pe wo davagi p̃aaka sikai ni silver asa: Go nae e pe vei namata sikai, Tu pe wo mari p̃onoti a ki napapa ni sidar.

¹⁰Kinau a pei nakoro sikai, go nasusugu ero dapala nasum̃a varau pakilagi kakana maga: Ragi wanogoe a doko namatana maga dapala tea sikai waina e pap̃ai natam̃ateana.

¹¹Solomon e peani roara ni vaine sikai Baal‐hamon; E pitua ki roara ni vaine wanogoe paki tea vavaigoro maga; Euga mamau puti dape umai nalakena nawa kakana matele ni silver manu sikasikai sarasara ra.

¹²Roara ni vaine aginau, waina e pei aginau, e doko naraegu: Manu sikai wanogoe ega vei anigo, Solomon O, Go p̃onotia dua ega vei agi tea maga waina eu pavaigoro nawa kakana.

¹³Nigo waina ku doko roara maga, Tam̃a ri maga eu do daki dorogo nadaleom̃a: P̃a mari au aga rogo e.

¹⁴P̃a sava, tea dodomiana aginau, Go p̃a takiusi kasel sikai kite hart tureai sikai, Tava maga ni tea ni nap̃o wia maga.