Read Nguna Togoa Etafe North ISA 1 Bible Online

ISA 1 - Nguna Togoa Etafe North bible

ISA 1

¹Navunusiana ki Isaiah natu ni Amos, waina e punusi a nalo ni Yudah go Yerusalem naaleatia maga ki Ussiah, Yotham, Ahas, go Hesekiah, nawota maga ni Yudah.

²Kuga rogo, nakoroatelagi maga O, po daki nadaligam̃a, maramana O, nalakena Yehovah e pasa, e naga, A pakale piakirikiri maga pa pa eu matua, ma eu mari p̃auluulu dip̃a au.

³Oks e atae talakeana, go ass kelu ki tea maraki aneana: ma Israel e da atae a mau, narei aginau eu da midoa ki nia mau.

⁴Ai ki mu nalauna sigisigileo, narei sikai waina ku pei tea tuatuakiana ki namarinaleotageleana, tea mari naleo sa natuda maga waina ku mari malauweluki: ku doropusi Yehovah, ku dip̃adoa Tea Tapu ki Israel, ku dawasi po liliu pano.

⁵Ekasana ku suasua naga kuga wo do pei tea varatiana, naga ku ko do mari p̃auluulu po moro do mari p̃auluulu? Nap̃au mamau e sasana, go nap̃op̃o mamau e manainai.

⁶Pae nam̃ele natua pa pa paki nam̃asua ni nap̃au, tea wia e dika asa e dika sa; ma e pei wotu maga, go wola maga, go wotu maga ni nawokatiana: eu da pei tea sarueana mau, kite pei tea vivisiana mau, kite pei tea mari‐mamaladi‐kiana ki naroro mau.

⁷Navanua animu e pei maso maladi doko; natokoana animu maga eu pei tea tap̃arakiana ki nakapu; tea ni nalauna p̃ota maga eu do gani dinomi natano animu naraemu, go e pei maso maladi doko, dapala e pe vei tea tap̃olosiwokiana ki tea ni nalauna p̃ota maga.

⁸Go Sion natuna nagoroi e pei tea toropusiana e doko dapala tap̃aup̃au sikai doko roara sikai ni vaine, dapala tokora ni nam̃enakiana sikai doko roara sikai ni kukumpa, dapala natokoana sikai waina e pei tea kelugoroana.

⁹Yehovah ki taua maga e pe ta maginami doropusi namagovai kiki sa sikai e pe ta doko, au pe tapala Sodom, au pe takiusi Comorrah.

¹⁰Kuga rogo navasaana ki Yehovah, nimu tea maramara maga ni Sodom; kuga taki nadaligamu paki nawotaeana ki Sup̃e anigida, nimu narei maga ni Comorrah.

¹¹Yehovah e naga, Nalapalapaana ni naviriana animu maga e maginau pei tea wia nasava? Kinau a puka ki navituaana tap̃arakiana maga ni shiip anoai maga, go ki nap̃eletia ni nalo tuavati vaganiana maga; go a da maro nada ni kau anoai maga mau, kite ni shiip natuna maga, kite ni naninani anoai maga.

¹²Ragi waina kuga umai pakilina naraegu, sei ega wo datago tea wanogoe ki nam̃elearumu, naga kuga vasisoki roara aginau maga?

¹³Kuga ta moro dape naviriana p̃alo maga ni navinaga umai mau; tea ni nap̃o wia e pei tea mamaragokiana sikai paki nau; atelagi vau go sabbath, nasoso‐saisai‐kiana ki nasaisaiana maga a karaikita namarinaleotageleana go nasaisaiana maga.

¹⁴Atelagi vau animu maga go nasaisaiana tatutakiana animu maga, naatagu e pilosi ra: eu pei tea madaga sikai paki nau; kinau a piroa ki da.

¹⁵Go ragi waina kuga tarasike nam̃elearumu maga, aga wo dasuru ki namatagu paki mu: go ragi waina kuga tapasavasa parau, aga wo da dogo e mau: nam̃elearumu maga eu pura ki nada.

¹⁶Kuga tum̃amu sarue mu, kuga tum̃amu mari mu kuga tautau; kuga mari puoli ki namariana sa animu maga pa dua ki namatagu maga; kuga makoto ki namarinaleosaana:

¹⁷Kuga atae dogo naga kuga mari tea wia; kuga laaga navasap̃otaeana, kuga silae tea rogokitesa maga, kuga mari leana paki tea waina e pei namalepu, kuga magi nagoroi malepu mari navululuana.

¹⁸Yehovah e naga, Kuga umai, go tuga vusum̃aki dum̃agida paki gida: namarinaleosaana animu maga eu pe takiusi tea miala‐kesakesa, ma eu pe wo dare dakiusi sno; eu pe miala dakiusi tea mimiala, ma eu pe wo dakiusi wul.

¹⁹Ku pe rakaraka po dogo parati ki, ku pe wo gani tea wia ni navanua:

²⁰Ma ku pe karai po mari p̃auluulu, ku pe wo pei tea tinomiana ki lova: nalakena nawoka ni Yehovah e noa e.

²¹Natokoana vei lomau e po pei nagoroi masausara sikai, nae waina e pea pura ki naleanaana sala vea! Namarinaleoleanaana e doko asa doko sala vea, ma ragi waia e pei tea maripunue naatam̃oli maga.

²²Silver anigo e po pei nasam̃a, waine anigo e sarisari pilake noai.

²³Tea maraki anigo maga eu pei tea mari p̃auluulu maga, go tea vanako tada ri maga; eu mamau puti dodomi ruku maga, po do sava dausi namoriana maga: eu da pasa p̃otae leana ki namalepu maga mau, go navululuana ki nagoroi malepu e da umai paki da mau.

²⁴Nalakena tea wanogoe Yehovah, Yehovah ki taua maga, Tea Kasua Mau ki Israel, e naga, P̃a leo, aga wo dum̃agu pakamaromaro au m̃elu dua ki tea maga waina eu do mari dip̃a au, po dum̃agu kokonagoro au m̃elu dua ki tea kokona kinau maga:

²⁵Go aga wo doa nam̃elearugu po mari dip̃a ko, po mari dautau ki nasam̃a anigo upu ni nakapu, go aga wo dape lua puti tea sa anigo maga:

²⁶Go aga wo mari pau ki tea vasap̃otae anigo maga euga moro doko dapala ragi vea, go tea vusum̃aki anigo maga euga moro doko dapala ragi ni naatulakeana: edaku ki tea wanogoe p̃a wo pei tea sosoana ki Natokoana ni namarinaleoleanaana, natokoana vei lomau.

²⁷Sion ega wo pei tea tauluaana ki naleanaana, go tea midoakidoa kakana maga ki namarinaleoleanaana.

²⁸Ma tea sigisigileo maga go tea marinaleosa maga euga wo paka sikai maau pei tea marisakiana, go tea maga waina eu doropusi Yehovah, euga wo pei tea mari‐puoli‐kiana.

²⁹Nalakena euga wo maliere nalo ni nakau oak maga waina ku maro ara, go p̃a wo pinovinoi nalakena roara maga waina ku matadoa ra.

³⁰Nalakena p̃a wo doko dapala nakau oak sikai waina nauluna e kokolo, go dapala roara sikai waina e dika ki noai.

³¹Tea kasua ega wo dakiusi nam̃ota ni nakau, go nawosiana aneana dakiusi riri ni nakapu; go eroga wo dua puti soro, go te naata ega wo da puepunue ra mau.