Read Nguna Togoa Etafe North ISA 10 Bible Online

ISA 10 - Nguna Togoa Etafe North bible

ISA 10

¹Ai ki tea maga waina eu do mari dawona ki natawonakiana dagele maga, go ki tea midiri maga waina eu do midiri tea sa:

²Naga euga vuadaki tea tika pa dua ki naleanaana, go naga euga tape lua naleanaana ki tea tika maga ni narei aginau maga, naga nagoroi malepu maga euga vei tea tape‐luapavakotoana adeada, go naga euga mari namalepu maga euga vei tea vuti‐lua‐pavakotoana!

³Go kuga wo mari nasava naaleatia ni navaratiana, ragi waina nalagi atu ega wo pae uvea umai? Kuga wo sava pa punusi sei po laaga nasilaeana? Go kuga wo doropusi nasogolapaana animu ega wo doko esava?

⁴Kuga wo kolo pakitano m̃aleoputo ni tea soliana maga, kite dowo doko etano ki tea atugiana maga. Nalakena tea mamau puti wanogoe, namaetoana aneana e da liliu pano mau, ma nam̃elearuna e ko pei tea saikiana doko.

⁵Ai ki‐go Assiria O, nakau varati ni namaetoana aginau, tagau ni namaritausuana aginau doko nam̃elearugu!

⁶Aga wo dip̃aki lua e pano dip̃a nalauna sigisigileo sikai; go dip̃a narei waina eu mari au a maeto, aga wo dip̃aki nia naga ega tape pavakoto tea vuti‐luapavakotoana, go naga ega tape pavakoto tea viragi‐lua‐pavakotoana, go naga ega vasi puludoa ra dapala nalepa ni napua maga.

⁷Ma nae e noa naga ega ta mari tea wanogoe mau, go namidodoana aneana e da midoa ki nia mau; ma e doko namidodoana aneana naga ega mari puoli ki, go naga ega taelua nalauna maga, euga ta pisa maau mau.

⁸Nalakena e naga, Tea maraki aginau maga eu da mamau puti pei nawota maga doko mau, kite?

⁹Kalno e da dakiusi Karkemish mau, kite? Hamath e da dakiusi Arpad mau, kite? Samaria e da dakiusi Damaseko mau, kite?

¹⁰Nam̃elearugu e pei tea saikiana dip̃a namarakiana maga ni idolo maga, waina nasup̃e taeana kakada maga eu p̃arua liu nasup̃e taeana maga ni Yerusalem go ni Samaria;

¹¹Go aga wo da mari paki Yerusalem go paki idolo kakana maga, ega tapala waina a mari a paki Samaria go paki idolo kakana maga, kite?

¹²Nalakena tea wanogoe ega wo pakilina, ragi waina Yehovah ega wo mari sua nawosiana aneana mamau puti doko tava Sion go doko Yerusalem, naga ega wo parati nawota ni Assiria nalakena navakavakaeana lagilagi aneana go nasamasamaana ni naleomadagaana aneana.

¹³Nalakena e naga, Ki nakasuaana ni nam̃elearugu a po mari a, go pae namanumatuaana aginau; nalakena a pei tea ni namidoakiataeana: a disurisugi kokoi maga ki narei maga, go a dape pavakoto naleo wia masauniana adeada maga; dakiusi tea kasua sikai, a mari naatatoko maga eu pakitano:

¹⁴Go nam̃elearugu e daraku lua nasogolapaana ki narei maga dakiusi e pe vei vete sikai; go dapala waina tea sikai e do pilae atolu maga waina eu pei tea toropusiana doko, dapala nogoe kinau a po pivila maramana mamau: go tea waina nalivaruna e parivari, kite waina e p̃olagati nawokana, kite p̃ara, e dika.

¹⁵Tagoto ega wo dum̃ana pakavakae a paki tea waina e daata asa, kite? Soro ega wo dum̃ana mari lagilagi paki tea waina e do sorosoro asa, kite? E pe tapala nogoe, e pe takiusi tiko sikai waina e pe rurua ki naata waina e pe tape dakati a, kite e pe takiusi tagau sikai waina e pe tum̃ana sike a e duleana, dapale e pe ta pei tea ni nakau mau.

¹⁶Nalakena tea wanogoe Yehovah, Yehovah ki taua maga, ega wo dip̃aki lua nam̃aguraana paki m̃aleoputo ni tea m̃anopunopu aneana maga; go etano ki nasamasamaana aneana, natap̃arakiana sikai ega wo pei tea tokoniana, waina ega wo dakiusi natap̃arakiana ni nakapu.

¹⁷Go namarama ki Israel ega wo pei nakapu sikai, go Tea Tapu kakana mena ni nakapu sikai: go ega wo soro po gani tea vivitip̃a kakana maga go tea makalikali kakana maga doko naaleatia sikai maau.

¹⁸Go ega wo gani puoli ki nasamasamaana ni mala ni nakau kakana, go ni vanua ni namasu kakana, naatana go nap̃atokona: go ega wo pei dakiusi ragi waina tea takiana ega wo sara pano.

¹⁹Go nakau maga waina euga wo pei tea toropusiana doko mala ni nakau kakana, euga wo pisa maau sa, dapala waina piakiki sikai e mariatae peve ra.

²⁰Go ega wo pakilina naaleatia wanogoe, naga namagovai ni Israel waina eu pei tea toropusiana doko, go tea ni nasum̃a ni Yakob waina eu ko mauri doko, euga wo da moro pavatu tea waina e atugi ra mau; ma euga wo pavatu Yehovah, Tea Tapu ki Israel, doko nalomauana.

²¹Namagovai sikai, namagovai ni Yakob, ega wo liliu paki Sup̃e Tea Kasua Mau.

²²Nalakena narei anigo Israel eu pe tapala naworaone ni natasi, ma namagovai kakada m̃oli e pe wo liliu: namarisakiana e pei tea mari‐dawonakiana, waina ega wo pura sarasaraape ki namarinaleoleanaana.

²³Nalakena Yehovah, Sup̃e ki taua maga, ega wo mari navakavuroana waina e pei tea midoaki‐dawonakiana, m̃aleoputo ni navanua mamau.

²⁴Nalakena tea wanogoe, Yehovah Sup̃e ki taua maga e noa dapala nea, e naga, Narei aginau O, waina ku doko Sion doko, p̃a ta matau ki tea ni Assiria mau, ragi waina eu atugi ko ki tiko, po sike tagau adeada dip̃a ko, dapala waina naka ni Ityipt eu pea mari a.

²⁵Nalakena ega ta pei tuai, go namaritausuana aginau ega wo nopu, go namaetoana aginau ega wo pei namavunuvunuana adeada.

²⁶Go Yehovah ki taua maga ega wo surupugoni nasasanaana sa sikai dip̃a ra, ega wo dapala ragi waina e atugi Midian doko vatu ni Oreb: go ega wo sike tiko aneana dip̃a ra, dapala waina e sike a dip̃a naka ni Ityipt.

²⁷Go ega wo pakilina naaleatia wanogoe, naga natapetapeana aneana ega wo pei tea tapeluaana m̃elu dua ki napaum̃a, go nakau ni nanoa aneana ega wo da moro doko nanoam̃a doko mau.

²⁸E po umai paki Aiath, e surata duaduru Mikron po pano; e daua ki naleo aneana maga doko Mikmash:

²⁹Eu po duagoto namoso po pano; eu do m̃enaki doko Ceba: Ramah e do duruuru; Cibeah ni Saul e po sava pano.

³⁰P̃a sike nadaleom̃a po pioso kasua, Callim natuna nagoroi O! P̃a taki dorogo, Laishah O! P̃a vasadara e Anathoth O!

³¹Madmenah e do sava pano; naatatoko maga ni Cebim eu dum̃ada saisai ki da naga euga sava pano.

³²Naaleatia waia ega wo da nopu go nae ega wo maromaro doko Nob: ega wo dutua ki nam̃elearuna paki tava ki Sion natuna nagoroi, tava ni Yerusalem.

³³Kuga leo, Yehovah, Yehovah ki taua maga ega wo daekotokotovi ara maga ki nakasuaana mataukiana: tea varau maga waina eu parau pakilagi euga wo pei tea taeana euga rowo, go tea vakilagi ega wo pei tea viragiana pakitano.

³⁴Ega wo daekotokotovi mala wono ni nakau maga ki p̃eseu sikai ni airon, go Lebanon go tea ni natatap̃auana kakana maga euga wo dowo.