Read Nguna Togoa Etafe North ISA 11 Bible Online

ISA 11 - Nguna Togoa Etafe North bible

ISA 11

¹Go nawasi sikai ega wo siria m̃elu nalake ni nakoa ni Yesse, go arana sikai ni nakoana ega wo dau ki nawana:

²Go Naata ni Yehovah ega wo puvua umai doko asa, naatana ni namanumatuaana go ni namidoakiataeana, naatana ni namidoakip̃otaeana go ni naveinawotaana, naatana ni naataeana go ni namatau‐ki‐Yehovah‐ana;

³Go namaroana aneana ega wo doko namatauki‐Yehovah‐ana: go ega wo da pasap̃otae pae tea waina namatana ero punusi a mau, kite noap̃otae pae tea waina nadaligana ero dogo e mau:

⁴Ma ega wo pasap̃otae tea rogokitesa maga pae namarinaleoleanaana, po magi tea tika maga ni navanua noap̃otae pae naleanaana: go ega wo atugi navanua ki tiko ni nawokana; go ki namero ni nagolena maga, ega wo mari punue tea sigisigileo.

⁵Go naleanaana ega wo pei tea tasoki ni namalona, go naveilomauana ega wo pei tea tasoki ni nawarena maga.

⁶Go wulf ega wo doko sikoti shiip natuna, go leopard ega wo one natano sikoti naninani natuna; go kau natuna go laion tureai go tea vaganiana m̃anopunopu euga wo mamau doko; go piakiki kiki sikai ega wo maraki ra.

⁷Go kau go bear eroga wo dua ganikani; natuda maga euga wo mamau one natano one: go laion ega wo gani nam̃enau dapala oks.

⁸Go piakiki vakasusukiana ega wo do p̃aro m̃oru ni m̃aata, go tea vasue‐susu‐ana ega wo sai ki nam̃elearuna paki m̃oru ni adder.

⁹Namarisakiana go namaripuolikiana eroga wo dika usuraki tava tapu aginau: nalakena maramana ega wo pura ki naatae‐Yehovah‐ana, dapala waina noai maga eu dap̃augoro natasi.

¹⁰Go ega wo pakilina naaleatia wanogoe, naga nawasi ni Yesse ega wo lawodu po magi narei maga pei manututu sikai, go nalauna maga euga wo laaga asa; go tokora tokoana aneana ega wo pei nasamasamaana.

¹¹Go ega wo pakilina naaleatia wanogoe, naga Yehovah ega wo moro sike nam̃elearuna sala kerua naga ega taulua namagovai ni narei aneana waina eu ko pei namagovai doko, pae Assiria, go pae Ityipt, go pae Pathros, go pae Kush, go pae Elam, go pae Shinar, go pae Hamath, go pae naureure maga ni natasi.

¹²Go ega wo magi nalauna maga sike lawo ki navaivaiana sikai, go ega wo piragi saisai ki tea taperaverakiana maga ni Israel, po piragi saisai ki tea taperaverakiana maga ni Yudah, pae naweluki pati ni maramana umai.

¹³Go naroitoiana ki Efraim ega wo makoto, go tea maga waina eu mari nakokonaana paki Yudah, euga wo pei tea taeluaana: Efraim ega wo da moro doitoi Yudah, go Yudah ega wo da moro mari dip̃a Efraim.

¹⁴Go euga wo dam̃oni siwo paraki Filistine maga taleva ni elo musu; euga wo pulutaki dape pavakoto tea ni nalauna p̃ota maga ni ist: euga wo sai ki nam̃elearuda dip̃a Edom go Moab; go Ammon natuna maga euga wo dogo parati ki da.

¹⁵Go Yehovah ega wo mari nap̃olulua ni Natasi ni Ityipt ega wo garagara; go ki nalagi kasua aneana, ega wo sai ki naruna elagi ni Noaisara, go ega wo atugi a po dap̃otawotae a ega vei nap̃ap̃a noai euga larua, naga naatam̃oli maga euga surata duagoto asa natano garagara.

¹⁶Go napua lapa sikai ega wo doko, waina ega wo pei agi namagovai ni narei aneana waina euga vei tea toropusiana doko, naga euga surata asa ragi waina euga m̃elu dua ki Assiria umai; ega tapala waina e magi Israel doko, naaleatia waina e m̃elu dua ki navanua ni Ityipt sake umai.