Read Nguna Togoa Etafe North ISA 12 Bible Online

ISA 12 - Nguna Togoa Etafe North bible

ISA 12

¹Go p̃a wo noa naaleatia wanogoe, p̃a wo naga, Aga wo pasa dodo m̃ata ki‐go, Yehovah O; nalakena ku pea maeto kinau, ma namaetoana anigo e liliu pano, go ku do pakavakale au.

²Kuga leo, Sup̃e e maginau pei namautipauriana; aga wo pavatu asa, go aga wo da mataku mau: nalakena Yehovah Sup̃e e pei nakasuaana aginau go nalegaana aginau; go e po maginau pei namautipauriana.

³Nalakena tea wanogoe kuga wo laelaea pautui noai m̃elu namata noai maga ni namautipauriana.

⁴Go kuga wo noa naaleatia wanogoe, kuga wo naga, Kuga vasa dodo m̃ata ki Yehovah, kuga vioso ki nagisana, kuga rogorogo ki namarimatuaana aneana maga m̃aleoputo ni narei maga, kuga noasai naga nagisana e pei tea vakilagi.

⁵Kuga lega samasama ni Yehovah; nalakena e mari tea ni namagaana maga: ega vei tea ataeana usuraki maramana mamau.

⁶P̃a samasama po sokamidi, nigo naatatoko ni Sion O: nalakena Tea Tapu ki Israel e pei tea warua m̃aleoputo kakam̃a.