Read Nguna Togoa Etafe North ISA 13 Bible Online

ISA 13 - Nguna Togoa Etafe North bible

ISA 13

¹Naveanoasaiana nalo ni Babelon, waina Isaiah natu ni Amos e punusi a.

²Kuga sike lawo ki navaivaiana sikai tava navatuvatu, kuga sike nadaleo paki da, po alo dua ki da, naga euga sili namata‐pua maga ki navarapule maga.

³A dip̃aki tea mari‐masale‐kiana aginau maga, ioro, a soso naatam̃oli marimatua aginau maga, tea maga waina eu samasama ni natatap̃auana aginau, naga euga maginau sikosiko.

⁴Kuga rogo namarip̃araiana ni taua ni naatam̃oli waina e doko tava maga, dapala e pe vei taua warua ni narei! Kuga rogo namarip̃araiana ni namarakiana maga ni nalauna maga waina eu pei tea viragi‐saisai‐kiana doko! Yehovah ki taua maga e do piragi saisai ki taua sikai raki navakalo.

⁵Eu pae navanua sikai ni uvea umai, pae namatap̃ago edaku ni nakoroatelagi, e pei Yehovah go nalikau maga ni namaritausuana aneana, naga ega mari sa ki navanua mamau.

⁶Kuga lalagaarova; nalakena naaleatia ki Yehovah e pei m̃aladigi; namarisakiana ega wo pae Tea Kasua Mau umai.

⁷Nalakena tea wanogoe nam̃elearu ni tea mamau puti ega wo manainai, go nap̃op̃o ni sara naatam̃oli ega wo sara:

⁸Go euga wo m̃anaunau; navitivitinuana maga go narogokitesaana maga euga wo puasoki ra; euga wo dogo navitinuana dakiusi nagoroi visola sikai: euga wo saram̃akoto dum̃ada paki da; navivitinuana ega wo doko naraeda.

⁹Kuga leo, naaleatia ki Yehovah e do umai, tea maridao, e pilake namaritausuana kasua go namaetoana vivitinu; naga ega mari navanua ega vei maso maladi sikai, go naga ega mari puoli ki tea sigisigileo kakana maga m̃elu dua ki nia pano.

¹⁰Nalakena m̃asoe maga ni nakoroatelagi go taua kakada maga euga wo da pitua ki namarama kakada mau: elo ega wo maligo nasakeana kakana, go atelagi ega wo da marama mau.

¹¹Go aga wo parati maramana nalakena namarinaleosaana adeada, go tea sigisigileo maga nalakena namarinaleotageleana adeada; go aga wo mari navei‐p̃op̃o‐vakilagiana ki tea leomadaga maga ega makoto, go naleolagilagiana ki tea suatoro ega vakitano.

¹²Go aga wo mari naatam̃oli ega wo p̃ia liu kold tautau, ega wo p̃ia liu kold wialua ni Ofir.

¹³Nalakena tea wanogoe aga wo parivaria ki nakoroatelagi maga, go maramana ega wo pei tea ruruakiana m̃elu dua ki naliana, narae ni namaritausuana ki Yehovah ki taua maga, naaleatia ni namaetoana vivitinu aneana.

¹⁴Go ega wo pakilina, naga dakiusi kasel waina e pei tea kopasiluaana, go dakiusi shiip waina tea viragi saisai ki da e dika, sara naata euga wo sikasikai maradoa liliu paki narei adeada, go euga wo sikasikai sava paki navanua adeada pano.

¹⁵Sara naata waina euga vei tea vuatiana, euga wo pei tea vuri‐sasama‐kiana; go sara naata waina euga vei tea vuasokiana, euga wo dowo ki lova.

¹⁶Go piakirikiri adeada maga euga wo pei tea p̃okap̃oraworaeana narae ni namatada; nasum̃a adeada maga euga wo pei tea vuti‐lua‐pavakotoana, go nagoroi adeada maga euga wo pei tea marip̃aragoto‐kiana.

¹⁷Kuga leo, ega wo surupugoni naka ni Media dip̃a ra, nara waina eu da midoaki silver mau, go waina eu da maro kold mau.

¹⁸Go naasu adeada maga euga wo daep̃oraworae natureai maga; go euga wo da mari malemale paki nawa ni nap̃ele mau; namatada euga wo da maritadodomi piakirikiri maga mau.

¹⁹Go Babelon, tea samasamaniana liu namarakiana maga, naleom̃atakiana go natatap̃auana ki naka ni Kaldea, ega wo dakiusi Sodom go Comorrah ragi waina Sup̃e e dap̃olosiwo ki da.

²⁰Naatam̃oli ega wo da doko asa mau, go ega wo maladi doko pae tagona paki tagona: go tea ni Arabia ega wo da sike lawo ki tap̃aup̃au aneana asa mau; go tea leo parati ki shiip maga euga wo da mari navata ni shiip adeada euga one natano asa mau.

²¹Ma nalo mila maga ni masop̃alo euga wo one natano asa; go nasum̃a kakana maga euga wo pura ki koria mila maga; go ostris maga euga wo doko asa doko, go naninani anoai maga euga wo sale asa.

²²Go wulf maga euga wo kua nasum̃a vakilagi kakana maga, go koria mila maga nasum̃a warua maga: ragi kakana e pei m̃aladigi, go naaleatia kakana maga euga wo da parau mau.