Read Nguna Togoa Etafe North ISA 14 Bible Online

ISA 14 - Nguna Togoa Etafe North bible

ISA 14

¹Nalakena Yehovah ega wo maritadodomi Yakob, go ega wo moro matadoa Israel, po lawo ki da navanua adeada: go tea ni nalauna p̃ota maga euga wo sikoti ra, go euga wo puluti tea ni nasum̃a ni Yakob.

²Go narei maga euga wo piragi soki ra, po morimori ra paki naliada: go nasum̃a ni Israel ega wo peani ra navanua ki Yehovah, euga wo pei tea suasua naanoai maga go tea suasua nagoroi maga: go dapala nogoe euga wo piragilua‐pavakoto tea maga waina eu pea piragi‐lua‐pavakoto ara; go euga wo maramara dap̃au tea riesoki ra maga.

³Go ega wo pakilina naaleatia waina Yehovah ega wo dua ko namaromaroana pa dua ki nasusueana anigo asa go pa dua ki narogokitesaana anigo, go pa dua ki naveinaviti‐ana waina ku pei tea mariana ku p̃osiwosi kasua asa,

⁴Naga p̃a wo noa naluluakia waia dip̃a nawota ni Babelon, p̃a naga, Ai tea riesoki e po makoto! Ai natokoana ni kold e po makoto!

⁵Yehovah e po mari p̃ori tiko ki tea sigisigileo, naap̃e ki tea maramara maga;

⁶Waina eu atugi narei maga namaritausuana, po da makoto asa mau, go waina eu maramara dap̃au nalauna maga namaetoana, doko do kopalele ra po da mari malemale paki da mau.

⁷Maramana mamau e doko dam̃ate, natam̃ateana e doko asa doko: eu p̃orae nalegaana.

⁸Ioro, nakau paine maga eu do laelaea ako, nara ma nakau sidar maga ni Lebanon, doko do naga, Pae ragi waina nigo ku dowo one pa pa paki naaleatia waia, tea taekotovi e da sake umai dip̃a gami mau.

⁹Sheol e do parivari naga ega sua ko naumaiana anigo: e surupugoni tea mate maga naga euga toko raki‐go, tea vakilagi maga mamau puti ni maramana nogo; e pulevule nawota maga mamau puti ni nalauna maga m̃elu dua ki malo tasake ni naveinawotaana adeada maga.

¹⁰Nara mamau puti euga wo pasadara, po noa ki‐go, euga wo naga, Nigo ma ku po manainai dakiusi gami, kite? Ku po doko dakiusi gami, kite?

¹¹Navakavakaeana anigo go nadaleo ni harp anigo maga eu po pei tea viragiana paki Sheol pano: ula e pei tea welesakiana etano ki‐go, go ula maga eu do kavugoro ko.

¹²Ai ki‐go ku po dowo pae nakoroatelagi pakitano, m̃asoe lapa ni malip̃ogi O, malip̃ogi natuna naanoai O! Ai ki‐go ku po pei tea taekotoviana ku dowo natano, nigo waina ku pea mari nalauna maga eu pakitano!

¹³Go ku noa nap̃op̃om̃a, ku naga, Aga wo pei tea tapeana sake paki nakoroatelagi pano, aga wo dum̃agu dape malo tasake aginau ega vakilagi liu m̃asoe maga ki Sup̃e; go aga wo dasake doko nap̃au ni tava ni nasaisaiana namatap̃ago edaku mau ni ep̃au:

¹⁴Aga wo sake pakilagi liu navakilagiana ni napopouru maga; aga wo dum̃agu mari au aga wo dakiusi Tea Vakilagi Liu.

¹⁵Ma ku po pei tea viragiana pakitano paki Sheol, paki namatap̃ago edaku mau ni m̃orutano.

¹⁶Tea maga waina eu punusi ko euga wo siko ako, euga wo midoakiusiusi ko, po naga, Naatam̃oli waia e pei nae waina e mari navanua e duruuru, waina e paria ki namarakiana maga, kite?

¹⁷Nae waina e mari maramana e dapala masop̃alo sikai, po dap̃olosiwo ki natokoana kakana maga; waina e da suasua peresi tea soliana aneana maga naga euga vaki kiada pano mau, kite?

¹⁸Nawota maga ni nalauna maga, tea mamau puti kakada, eu do maturu nasamasamaana, sara naata sikasikai doko matigoda.

¹⁹Ma nigo ku dika matigo, ku pei tea nadikiana pano dakiusi nap̃atoko mate mamaragokiana sikai, tokora waina nap̃oaana ni nap̃atoko mate maga e doko asa, tea maga waina eu mate ki lova, waina eu siwo paki vatu maga ni m̃orutano; dakiusi nap̃atoko mate sikai waina e pei tea vapuludoaana.

²⁰P̃a wo da pei tea ovakiana sikoti ra mau, nalakena ku mari sa ki navanua anigo, ku mari punue narei anigo; nagisa ni naworawora ni tea sigisigileo ega wo da pei tea rogoana mau.

²¹Kuga mari m̃ata naga natuna maga euga wo pei tea maripunueana nalakena namarinaleotageleana ki tamada; naga euga wo da moro duleana, po peani pioli ki navanua, po pakanoe narae ni maramana mau.

²²Go Yehovah ki taua maga e naga, Aga wo duleana dip̃a ra, po daelua m̃elu dua ki Babelon nagisana go namatarau aneana, go natuna, go natuna natuna maga, Yehovah e noa e.

²³Go aga wo mari a ega vei tokora tokoana ni porkupaine, go luku noai maga: go aga wo sasara e ki nasara ni namaripuolikiana, Yehovah ki taua maga e noa e.

²⁴Yehovah ki taua maga e pivisa po naga, Dapala waina kinau a midoaki dawona ki nia, ega wo pakilina dapala nogoe; go dapala waina kinau a midoaki p̃ai a, ega wo lawodu dapala nogoe:

²⁵Naga aga wo mari p̃ori tea ni Assiria navanua aginau, po pasi puludoa ki nia tava aginau maga: go nakau ni nanoa aneana ega wo m̃elu dua ki da pano, go natapetapeana aneana ega wo m̃elu dua ki napauda pano.

²⁶Tea wanogoe e pei namidoakip̃aiana waina e pei tea midoakip̃aiana nalo ni maramana mamau: go tea wanogoe e pei nam̃elearu waina e pei tea saikiana elagi ki nalauna maga mamau puti.

²⁷Nalakena Yehovah ki taua maga e midoaki p̃ai a, go sei ega wo mari puoli ki nia? Go nam̃elearuna e pei tea saikiana pano, go sei ega wo mari a ega vei tea rosa‐liliua‐kiana?

²⁸Natau waina nawota Ahas e mate asa, naveanoasaiana waia e pei tea noasaiana, eu naga.

²⁹P̃a ta samasama mau, Filistia mamau O, nalakena tiko waina e atugi ko e makoto: nalakena adder sikai ega wo m̃elu nakoa ni m̃aata, go nawana ega wo pei m̃aata vivikati sa sikai waina e do diri.

³⁰Go tea rogokitesa ega wo ganikani malo kanikani aginau, go tea tika ega wo one natano po doko p̃ia doko: go aga wo mari punue nawasi anigo ki navitoloana, go namagovai anigo waina eu pei tea toropusiana eu doko, euga wo pei tea maripunueana.

³¹P̃a lalagaarova, namata‐pua O; p̃a kuapioso, natokoana O; p̃a sara pano, Filistia mamau O; nalakena naasua sikai e m̃elu north umai, go te naata sikai e da puoli ki taua ni navakalo kakana maga mau.

³²Go tea sikai ega wo pasadara tea tautauana maga ni nalauna wanogoe ki nasava? Ega wo noa naga Yehovah e lawo‐ki‐laketoko Sion, go naga tea rogokitesa maga ni narei aneana euga wo sava sili asa.