Read Nguna Togoa Etafe North ISA 16 Bible Online

ISA 16 - Nguna Togoa Etafe North bible

ISA 16

¹Eu pitua ki shiip natuna maga paki tea maramara ni navanua, eu dip̃aki lua ra pae Sela pano pae napua ni masop̃alo paki tava ki Sion natuna nagoroi.

²Nalakena ega wo doko naga Moab natuna nagoroi maga euga wo pei tea taperaverakiana pa dua ki natuagotoana maga ni Arnon, dakiusi manu natuna maga waina eu pei tea kopasiluaana m̃elu dua ki vete.

³Eu naga, P̃a maginami pitua ki namidodoana, po maginami noap̃otae tea waina auga wo mari a, p̃a welesa ki melum̃a aleati matua, ega tapala e pe vei p̃ogi; p̃a tasuru ki tea maga waina eu pei tea kopasiluaana pano, go tea sava pano ega ta pei tea vituakiana mau.

⁴P̃a suasua ki tea kopasiluaana maga ni Moab naga euga m̃enaki doko kiam̃a; p̃a madeada pei tokora sikai ni nasavasiliana pa dua ki narae ni tea tapepavakoto: nalakena ragi waina nariesokiana ega wo nopu, go namarisakiana ega wo makoto, go tea riesoki maga euga wo mavunuvunu navanua,

⁵Ragi wanogoe malo tasake sikai ega wo pei tea lawoki‐laketokoana doko nadodomiana, go tea sikai ega wo dasake doko asa, doko naveilomauana ekopu ni tap̃aup̃au ki David; waina ega wo pasap̃otae, po mari m̃arekareka naleanaana, go waina ega wo m̃araverave mari namarinaleoleanaana.

⁶Tu dogo narogorogoana nalo ni naleomadagaana ni Moab, naga e pei tea vei p̃op̃o‐vakilagi p̃arua; go nalo ni navei‐p̃op̃o‐vakilagiana aneana, go naleomadagaana aneana, go namaritausuana aneana; navakavakaeana aneana maga eu pei tea p̃alo.

⁷Nalakena tea wanogoe Moab ega lalagaarova nalo ni Moab, euga mamau puti lalagaarova: kuga lalagaarova po dogokitesa p̃arua nalo ni laketano maga ni Kir‐hareseth.

⁸Nalakena vanua maga ni Heshbon, go vaine ni Sibmah eu kokolo; nawota maga ni nalauna maga eu atu kotovi tea lawoana wialua kakana maga; waina eu pano pa pa eu paraki Yaser, po sai paki masop̃alo; ara kakana maga eu pei tea saikiana pano, eu duagoto natasi.

⁹Nalakena tea wanogoe aga wo dagisi vaine ni Sibmah natagiana ni Yaser: aga wo pue ko ki naririmatagu maga, Heshbon O, go Elealeh: nalakena nararasaana ni navakalo e dowo paki nawa matua anigo maga go paki nalolovaeana anigo.

¹⁰Go nasamasamaana go nalaelaeaana ero pei tea tapeluaana m̃elu dua ki vanua ni namasu; go nalegaana go nakolalaelaeaana eroga wo dika roara maga ni vaine: tea vasoki nawa ni vaine ega wo da pasi m̃oru ni navasokiana ni nawa ni vaine mau: nararasaana kakana e makoto.

¹¹Nalakena tea wanogoe naatagu e do gi dakiusi harp nalo ni Moab, go nap̃op̃ogu nalo ni Kir‐heres.

¹²Go ega wo pakilina ragi waina ega vei tea vunusiana naga Moab e mawosa tokora vakilagi, naga ega umai paki tokora tapu aneana naga ega tapasavasa; ma ega wo da marimatua mau.

¹³Tea wanogoe e pei navasaana waina Yehovah e noa e nalo ni Moab ragi maga waina eu pano sua.

¹⁴Ma ragi waia Yehovah e pasa, po naga, Natau dolu euga wo da nopu, dakiusi natau maga ki tea vasadapuiana, go nasamasamaana ni Moab ega wo pei tea dododaoana, nara ma taua warua kakana ni narei; go namagovai kakana waina ega wo pei tea mautiana ega mauri, ega wo pei taua kiki sa waina ega wo pei tea midoakiana naga e da pei te navatuna mau.