Read Nguna Togoa Etafe North ISA 18 Bible Online

ISA 18 - Nguna Togoa Etafe North bible

ISA 18

¹Ai ki navanua ni rarua maga waina eu pilake nalivaruda, waina e doko taleva kerua ni noaisara maga ni Ethiopia:

²Waina e dip̃aki lua tea tautauana maga eu duagoto natasi pae rarua maga ni nap̃araerae doko noaisara maga, doko do naga, Kuga vano, nimu tea tautauana maga waina ku sava m̃araverave, po punusi nalauna varau pakilagi go m̃om̃oa sikai, narei mataukiana sikai ki tea ni m̃aladigi go ki tea ni uvea; nalauna kasua go marimatua sikai, waina navanua adeada, noaisara maga eu dap̃awasi asa!

³Nimu naatatoko maga mamau puti ni maramana, go nimu waina ku doko navanua doko, ragi waina navaivaiana sikai ega vei tea sikeana tava maga, kuga vunusi a; go ragi waina euga sui paiga, kuga rogo e.

⁴Nalakena Yehovah e noa kinau, e naga, Aga wo matadorogo doko, go aga wo leo punusi pae tokora tokoana aginau; dakiusi navivitinuana ni aleati matua, dakiusi napopouru ni nasovaki doko sui ni nalolovaeana.

⁵Nalakena pea ki nalolovaeana, ragi waina napum̃a e dasi, go nawa ni vaine e po matua, ega wo dagaukotovi nasiri maga ki tagau maga, go ega wo daelua arana saikiana maga.

⁶Euga wo pei tea toropusiana euga mamau doko, euga vei agi manu katip̃orae maga ni tava maga, go agi nalo tuavati maga ni navanua: ragi ni navivitinuana euga wo pei tea katip̃oraeana ki manu maga, go ragi ni namamaladiana ki nalo tuavati maga.

⁷Ragi wanogoe navituaana sikai ega wo pei tea viragiana umai paki Yehovah ki taua maga, paki tava Sion tokora waina nagisa ni Yehovah ki taua maga e doko asa, pae narei varau pakilagi go m̃om̃oa sikai, go pae narei mataukiana sikai ki tea ni m̃aladigi go ki tea ni uvea; nalauna kasua go marimatua sikai, waina navanua adeada, noaisara maga eu dap̃awasi asa.