Read Nguna Togoa Etafe North ISA 19 Bible Online

ISA 19 - Nguna Togoa Etafe North bible

ISA 19

¹Naveanoasaiana nalo ni Ityipt. P̃a leo, Yehovah e sakesaake doko napopouru sikai waina e sava kasua, po do umai paki Ityipt: nasup̃e maga ni Ityipt euga wo parivari naraena, go nap̃op̃o ni Ityipt ega wo sara nap̃alauna.

²Go ega wo surupugoni naka ni Ityipt dum̃ada dip̃a ra: go euga wo marimari sara naata dip̃a taina, go sara naata dip̃a tea ni m̃aladagi ki nia; natokoana dip̃a natokoana, go namarakiana dip̃a namarakiana.

³Go namidodoana ni Ityipt ega wo pinovinoi nap̃alauna; go aga wo mari puoli ki namidoakip̃otaeana kakana: go euga wo pusuusu paki nasup̃e maga, go paki tea vasatalakolako maga, go paki tea vasapua maga, go paki tea kikita maga.

⁴Go aga wo pitua ki naka ni Ityipt paki nam̃elearu ni tea suatoro sikai; go nawota pakamatakua sikai ega wo maramara dap̃au ra. Yehovah, Yehovah ki taua maga e noa e.

⁵Go noai maga ni natasi euga wo dap̃a, go noaisara ega wo mataru po garagara.

⁶Go noaisara maga euga wo p̃oa; nap̃ap̃a noaisara maga ni Ityipt euga wo nunu po dap̃a garagara: nap̃araerae go natovatova euga wo kokolo.

⁷Napega maga pisari Noaisara Naile, nadigi ni Naile, go tea lawoana maga mamau puti waina eu pei tea lawoana pisari Naile, euga wo kokolo, po pei tea sui‐pulua‐kiana pano, po puoli.

⁸Go tea araika maga euga wo susue, go tea maga mamau puti waina eu nadi ki tagau Noaisara Naile euga wo lalagaarova, go tea maga waina eu p̃elesa ki kup̃ena maga noai maga euga wo saram̃asike.

⁹Go tea maga waina eu mari nawosiana ni linen wia, go tea maga waina eu pausi nakulukulu tare, euga wo maliere.

¹⁰Go tea vausi nakulukulu maga euga wo saram̃akoto go tea vasadapuiana maga euga wo dogokitesa nap̃op̃oda.

¹¹Nawota maga ni Soan eu pei lala mau; nanoap̃otaeana ki tea vusum̃aki manumatua liu maga ki Faraoh e pei navasaana p̃alo: dapale sava ku piviari noa ki Faraoh naga, Kinau a pei natu ni tea manumatua, natu ni nawota maga ni ragi ni tuai?

¹²Naatam̃oli manumatua anigo maga nara wai? Euga wo noakisai ko tea waina Yehovah ki taua maga e dawona ki nia nalo ni Ityipt go euga wo mari a ega vei tea ataeana.

¹³Tea maraki maga ni Soan eu pei tea manumatavusa maga, tea maraki maga ni Memfis eu pei tea surueana; tea maga waina eu pei vatu maga ni naweluki ni naworaworana maga, eu mari Ityipt e sasap̃o pano.

¹⁴Yehovah e mari naata ni navinovinoiana e sari m̃aleoputo kakana: go eu mari Ityipt e sasap̃o sara nawosiana kakana, dakiusi naatam̃oli matamaloku waina e sasap̃o naluaana aneana.

¹⁵Go Ityipt ega wo da mariatae marimatua nalo ni te navatuna mau, waina nap̃auna, kite napuena, ara ni paama kakana, kite nap̃araerae kakana ega wo maridogo mari a.

¹⁶Naaleatia wanogoe Ityipt ega wo dakiusi nagoroi maga: ega wo duruuru po mataku nalakena natutuakiana ni nam̃elearu ni Yehovah ki taua maga, waina nae ega wo dutua ki nia asa.

¹⁷Go navanua ni Yudah ega wo mari Ityipt ega vinovinoi, sara naata waina eu dogo navasaana nalo kakana, euga wo mataku nap̃alauda nalakena namidoakidawonakiana ki Yehovah ki taua maga, waina e midoaki dawona ki nia dip̃a ra.

¹⁸Naaleatia wanogoe natokoana lima ni navanua ni Ityipt euga wo pasa pae masileo ni Kanaan, po noasai nagisa ni Yehovah ki taua maga; sikai kakada ega wo pei tea sosoana ki Natokoana ni Elo.

¹⁹Naaleatia wanogoe wede ni naviriana sikai paki Yehovah ega wo doko m̃aleoputo ni navanua ni Ityipt, go tea lawodu sikai ega wo doko kokoi kakana.

²⁰Go ega wo pei navaivaiana sikai go tea noasokisoki sikai paki Yehovah ki taua maga navanua ni Ityipt: nalakena euga wo pioso paki Yehovah nalakena tea riesoki maga, go ega wo madeada dip̃aki lua tea maumau pauri sikai, go tea kasua sikai, go ega wo pualua ra.

²¹Go Yehovah ega wo dum̃ana mari a ega vei tea ataeana paki naka ni Ityipt, go naaleatia wanogoe naka ni Ityipt euga wo atae Yehovah; go euga wo lotu ki nia ki naviriana maga go ki navituaana tap̃arakiana maga, go euga wo sai nasaiana maga paki Yehovah, po mari pataka da.

²²Go Yehovah ega wo atugi Ityipt, ega wo atugi a po moro mari pauri a; go euga wo maradoa liliu paki Yehovah, go nae ega wo pei tea vavaraniana ki da, go ega wo mari pauri ra.

²³Naaleatia wanogoe napua lapa sikai ega wo doko, pae Ityipt paki Assiria, go naka ni Assiria euga wo paki Ityipt, go naka ni Ityipt euga wo paki Assiria; go naka ni Ityipt go naka ni Assiria euga wo saisai lotu.

²⁴Naaleatia wanogoe Israel ega wo pei ketolu ki Ityipt go ki Assiria, ega wo pei navasap̃iakiana sikai m̃aleoputo ni navanua:

²⁵Yehovah ki taua maga ega wo pasap̃ia ki da, doko do naga, Narei aginau Ityipt euga vei tea vasap̃iakiana, nara ma Assiria nawosiana ni nam̃elearugu, go Israel tea veanipiolikiana aginau.