Read Nguna Togoa Etafe North ISA 2 Bible Online

ISA 2 - Nguna Togoa Etafe North bible

ISA 2

¹Navasaana waina Isaiah natu ni Amos e punusi a nalo ni Yudah go Yerusalem.

²Go ega wo pakilina naaleatia edaku maga, naga tava ni nasum̃a ki Yehovah ega wo pei tea lawoki‐laketokoana ega wo pei nap̃au ni tava warua maga, go ega wo pei tea sikeana ega vakilagi liu tava sula maga; go nalauna maga mamau puti euga wo sara paki asa.

³Go narei laapa euga wo pano po naga, Kuga umai, go tuga sake paki tava ki Yehovah pano, paki nasum̃a ki Sup̃e ki Yakob; go nae ega wo pasa pisei ki gida namariana aneana maga, go tuga wo surata usi napua aneana maga: nalakena nawotaeana ega wo dave m̃elu Sion, go navasaana ki Yehovah ega wo dave m̃elu Yerusalem.

⁴Go ega wo pasa p̃otae namawota ni nalauna maga go ni nalauna maga, po noa p̃otae nalo ni narei laapa: go euga wo duki lova adeada maga euga vei tea sisi natano, go naio adeada maga euga vei tea tagau p̃asi pakasa ki nakau: nalauna ega wo da moro sai lua lova dip̃a nalauna mau, kite moro atae dogo navakalo te ragi mau.

⁵Kuga umai, nasum̃a ki Yakob O, go tuga surata namarama ki Yehovah.

⁶Nalakena narei aneana eu doropusi Yehovah, nasum̃a ki Yakob nogo, nalakena eu pei tea vakavuroana ki tea kikita maga dakiusi naka ni ist, po pei tea vasapua maga dakiusi Filistine maga, go eu do dapap̃osawosa nam̃elearuda ki tea ni nalauna p̃ota natuda maga.

⁷Go navanua adeada e pura ki silver go kold, go naleo wia tauakiana adeada maga eu mari sa nopu; go navanua adeada e moro pura ki horse maga, go kariot adeada maga eu mari sa nopu.

⁸Go navanua adeada e moro pura ki idolo maga; eu do lotu ki nawosiana waina nam̃elearuda maga eu dum̃ada p̃osiwosi ki nia, tea waina nakinida maga eu dum̃ada mari ra.

⁹Go naatam̃oli vakitano e po pei tea mariana e pakitano mau, go naatam̃oli vakilagi e po pei tea viragiana pakitano: go nasup̃e maga eu po pei tea vakuluaana pano.

¹⁰P̃a sili paki nap̃alau ni vatu laketoko, po dokoloku nam̃otam̃ota ni natano, pa dua ki namatauki‐Yehovah‐ana, go pa dua ki nasamasamaana ni natatap̃auana aneana.

¹¹Naleolagilagiana maga ki naatam̃oli euga wo pei tea viragiana pakitano, go naleomadagaana ki naatam̃oli ega wo pakitano, go Yehovah ega wo masikinia pei tea sikeana pakilagi naaleatia wanogoe.

¹²Nalakena naaleatia sikai ki Yehovah ki taua maga ega wo pakilina ki tea mari lagilagi go ki tea leomadaga, go ki tea mamau puti waina eu dum̃ada dape ra pakilagi; go euga wo pei tea viragiana pakitano:

¹³Go ki sidar maga mamau puti ni Lebanon, waina eu pakilagi po pei tea sikeana pakilagi, go ki oak maga mamau puti ni Bashan;

¹⁴Go ki tava vakilagi maga mamau puti, go ki tava sula maga mamau puti waina eu pei tea sikeana pakilagi;

¹⁵Go ki sara nasum̃a varau pakilagi, go ki sara p̃aaka kasua maga;

¹⁶Go ki rarua maga mamau puti ni Tarshish, go ki sara nunu leom̃atakiana maga.

¹⁷Go nalagilagiana ki naatam̃oli ega wo pei tea mariana ega vakitano, go naleomadagaana ki naatam̃oli maga ega wo pei tea viragiana pakitano; go Yehovah ega wo masikinia pei tea sikeana pakilagi naaleatia wanogoe.

¹⁸Go idolo maga euga wo pano puoli.

¹⁹Go naatam̃oli maga euga wo sili valea maga ni vatu laketoko maga, go m̃oru maga ni natano, pa dua ki namatauki‐Yehovah‐ana, go pa dua ki nasamasamaana ni natatap̃auana aneana, ragi waina ega wo duleana naga ega rurua ki kasua ki maramana.

²⁰Naaleatia wanogoe naatam̃oli maga euga wo nadi ki idolo ni silver adeada maga, go idolo ni kold adeada maga, waina eu madeada mari ra naga euga lotu ki da, paki kusue maga go paki m̃orupua maga;

²¹Naga euga sili valea maga ni vatu laketoko maga, go tokora ni nasavasiliana ni vatu makalikali maga, pa dua ki tea mataukiana ni Yehovah, go pa dua ki nasamasamaana ni natatap̃auana aneana, ragi waina nae ega wo duleana naga ega rurua ki kasua ki maramana.

²²Kuga ta pavatu naatam̃oli mau, waina namerona e doko nagisuna: nalakena ega wo pei tea midoakiana naga nae e pei nasava?