Read Nguna Togoa Etafe North ISA 21 Bible Online

ISA 21 - Nguna Togoa Etafe North bible

ISA 21

¹Naveanoasaiana nalo ni masop̃alo ni natasi. Navasaana maga waina eu dakiusi nalagi atu maga ni Sauth eu pae masop̃alo umai, pae navanua mataukiana sikai.

²Navunusiana madaga sikai e pei tea noasaiana paki nau; tea mari malauweluki e pei tea mari‐malauwelukiana, go tea mari pavakoto e pei tea maripavakotoana. P̃a sake pano, Elam O; p̃a kelugoro ra, Media O; nam̃am̃arigiana kakana mamau auga wo mari a ega makoto.

³Nalakena tea wanogoe nawaregu e pura ki narogokitesaana; navitivitinuana maga eu puasoki au, dapala navitinuana ni nagoroi visola sikai: a kolokolo ragi waina a dogo e; a saram̃akoto ragi waina a punusi a.

⁴Nap̃op̃ogu e pa putuaki, nasaram̃akotoana e mari au a mataku: p̃ogi waina a masauna e panop̃ota po pei naruruuruana paki nau.

⁵Eu mari m̃ata ki wede ni nakaniana, eu p̃elesa ki nap̃anu maga, eu ganikani, eu do munu: kuga tuleana, nimu tea maraki maga O, kuga salasala nakokoro ki naroro.

⁶Nalakena Yehovah e noa dapala nea paki nau, e naga, P̃a vano, p̃a lawo ki tea vavaigoro sikai; ega wo noasai ki tea waina ega vunusi a:

⁷Go e punusi kariot maga, go naatam̃oli maga waina eu sakesaake horse eu duarua, go naatam̃oli maga waina eu sakesaake ass, go naatam̃oli maga waina eu sakesaake kamel, go e daki dorogo ki natakidorogoana wia.

⁸Go tea waina e punusi a, e naga: Yehovah O, a lawodu pitip̃atip̃a nasum̃a varau pakilagi ni navavaigoroana aleati, go a pei tea lawokiana tea vavai aginau p̃ogi mamau.

⁹Go p̃a leo, naatam̃oli maga eu rumai, tea sakesaake horse eu duarua, go tea sikai e pasadara, po naga, Babelon e dowo, e dowo; go nasup̃e taeana kakana maga eu maworawora paki natano.

¹⁰Nimu waina ku pei tea wokalesueana, nimu waina ku pei tea niveana: tea waina a dogo e ki Yehovah ki taua maga, Sup̃e ki Israel, a po noakisai mu asa.

¹¹Naveanoasaiana nalo ni Dumah. Tea sikai e sike nadaleona m̃elu Seir, po pioso paki nau, e naga, Tea vavaigoro, p̃ogi e pei nasava? Tea vavaigoro, p̃ogi e pei nasava?

¹²Tea vavaigoro e naga, Malip̃ogi e pei m̃aladigi, go nap̃ogiana ega moro umai: ku pe moro masau pusuusu, p̃a moro umai pusuusu.

¹³Naveanoasaiana nalo ni Arabia. Kuga m̃enaki malo wono ni namalasi, nimu taua surata maga ni naworawora ni Dedan.

¹⁴Kuga tua tea madou noai naga ega munu; kuga sua tea sava pano maga po dua ra navinaga, nimu naatatoko maga ni navanua ni Tema O.

¹⁵Nalakena eu sava pa dua ki lova maga, pa dua ki lova sailuaana, go pa dua ki naasu vuap̃eluakiana, go pa dua ki namadagaana ni navakalo.

¹⁶Nalakena Yehovah e noa dapala nea paki nau, e naga, Natau sikai ega ta nopu, ega tapala natau ni tea vasadapuiana, go nasamasamaana mamau puti ni Kedar ega wo makoto.

¹⁷Go tea vua naasu maga ki m̃aau maga ni Kedar natuna maga, namagovai kakada waina euga wo pei tea toropusiana doko, euga wo pisa maau; nalakena Yehovah, Sup̃e ki Israel, e noa e.