Read Nguna Togoa Etafe North ISA 22 Bible Online

ISA 22 - Nguna Togoa Etafe North bible

ISA 22

¹Naveanoasaiana nalo ni nap̃aloa ni navunusiana. Nasava e mari ko, naga ku mamau puti sake paki nam̃asua ni nasum̃a maga?

²Nigo natokoana ni nap̃agaagaana O, natokoana ni nalaelaeaana, waina ku pura ki nararasaana? Tea maripunueana anigo maga eu da pei tea maripunueana ki lova mau, go eu da mate navakalo mau.

³Tea maramara anigo maga eu paka sikai maau sava pano, eu pei tea vuapavakotoana masale ki navuap̃eluakiana ni naasu: tea mamau puti kakam̃a waina eu pei tea vap̃aiana, eu sava paki uvea ma eu pei tea vuapavakotoana.

⁴Nalakena tea wanogoe kinau a naga, P̃a leleop̃ota kinau, aga wo dagi p̃arua; P̃a ta mari m̃araverave naga p̃a vasapakavakale au, nalo ni namarisakiana ni narei aginau natuna nagoroi mau.

⁵Nalakena e pei naaleatia sikai ni narogokitesaana, go ni nariesokiana, go ni navinovinoiana, waina Yehovah, Sup̃e ki taua maga e mari a nap̃aloa ni navunusiana; ni narakaiana ni p̃aaka maga, go ni nakuapiosoana sikai paki tava maga.

⁶Tea tape naasu eu pae Elam, tea sakesaake horse maga eu pae Siria; go Kir e pukepiri kokororum̃a.

⁷Go ega wo pakilina, naga nap̃aloa wia liu anigo maga euga wo pura ki kariot maga, go tea sakesaake horse maga euga wo lawo ki naraeda paki namata‐pua anigo maga.

⁸Go nap̃ilakeana anigo, Yudah O, e pei tea mari‐pakasa‐kiana; go naaleatia wanogoe ku leo paki nalikau maga ni navakalo waina eu doko ekopu ni nasum̃a waina e pei tea mariana ki nakau maga ni Lebanon.

⁹Go ku punusi malo mawora maga ni natokoana ki David, naga eu laapa: go ku piragi saisai ki noai maga ni luku noai ni etano.

¹⁰Go ku peve nasum̃a maga ni Yerusalem, go ku dakai nasum̃a maga naga p̃a mari p̃aaka ega moro kasua.

¹¹Go ku mari lasa warua liu sikai ni noai namawota ni p̃aaka dua naga noai ni luku noai ni tuai ega wo doko asa: ma ku da leo paki tea waina e mari a mau, kite midoaki tea waina e mari dawona ki nia tuai.

¹²Go naaleatia wanogoe Yehovah, Sup̃e ki taua maga e soso natagiana, go nalalagaarovaana, go nam̃asuaana, go natasokiana ni nakulukulu ni sak;

¹³Go kuga leo, nalaelaeaana go nasokamidiana, namaripunueana ni oks go naatugiana ni shiip, nakaniana ni nap̃okasi go namunuana ni waine: tuga kanikani po munu, nalakena matamai tuga wo mate.

¹⁴Go Yehovah ki taua maga e dum̃ana noasai a nadaligagu, e naga, Kuga wo da pei tea maridautau‐kiana m̃elu dua ki namarinaleotageleana waia mau, pa pa kuga wo mate. Yehovah Sup̃e ki taua maga e noa e.

¹⁵Yehovah, Sup̃e ki taua maga e noa dapala nea, e naga, P̃a vano po punusi tasiga leo parati ki waina, Shebna nogo, waina e dap̃au nasum̃a, po naga, Ku mari nasava nea?

¹⁶Go sei waia waina ku mamau doko nea, naga ku dum̃am̃a dae matigo sikai nea, doko do maneana dae matigo sikai tokora vakilagi, po maneana dae midimidiria tokora tokoana sikai vatulaketoko?

¹⁷P̃a leo, Yehovah ega wo nadi kasua ki‐go, naatam̃oli marimatua O; go ega wo puasoki kasua ki‐go;

¹⁸Ega wo dali ki‐go po nadi ki‐go paki navanua welewelea sikai; tokora wanogoe p̃a wo mate asa, go tokora wanogoe kariot maga ni nasamasamaana anigo euga wo doko asa, nigo tea malierekiana ni nasum̃a ki nawota anigo.

¹⁹Go aga wo dielua ko m̃elu dua ki nawosiana anigo, go p̃a wo pei tea nadikiana m̃elu dua ki tokora vakilagi anigo pakitano.

²⁰Go ega wo pakilina naaleatia wanogoe, naga aga wo soso tea suasua aginau Eliakim natu ni Hilkiah:

²¹Go aga wo sugoro e ki sugoro kovagoro anigo, po dasoki a ki tea tasoki anigo, go aga wo pitua ki naveinawota‐ana anigo paki nam̃elearuna: go ega wo magi naatatoko maga ni Yerusalem, go nasum̃a ni Yudah, pei tamada sikai.

²²Go tea viloki ni nasum̃a ki David, aga wo dua e asa ega toko napauna; go nae ega wo p̃olagati, go te naata ega wo da kokoro mau; go ega wo kokoro, go te naata ega wo da p̃olagati mau.

²³Go aga wo duri soki a ega tapala pin sikai tokora kasua sikai; go ega wo magi nasum̃a ni tamana pei malo tasake sikai ni nadodomadaganiana.

²⁴Go euga wo sara ki nasamasamaana mamau ni nasum̃a ki tamana asa, naworaworana go natuna maga, lasa kirikiri maga mamau puti, lasa munu maga go lasa warua maga.

²⁵Naaleatia wanogoe, Yehovah ki taua maga e noa e, pin wanogoe waina e pei tea turisokiana tokora kasua sikai, ega wo m̃elu; go ega wo pei tea taekotoviana po dowo, go tea madaga waina eu sara ki nia asa, ega wo pei tea taeluaana; nalakena Yehovah e noa e.