Read Nguna Togoa Etafe North ISA 23 Bible Online

ISA 23 - Nguna Togoa Etafe North bible

ISA 23

¹Naveanoasaiana nalo ni Tair. Kuga lalagaarova, nimu rarua maga ni Tarshish O; nalakena tokora kasua animu e pei tea mariana e pei maso maladi: e pei tea noasaiana paki da navanua ni Kittim.

²Kuga tatam̃ate doko, nimu naatatoko maga ni navanua ni elau O; nigo waina tea vakokoto maga ni Sidon, waina eu duagoto natasi, eu pakavuro ko.

³Tea taluaana kakana e pei napati ni korn ni Shihor, nalolovaeana ni navanua ni Noaisara; go e pei tokora ni nasosoriana ki nalauna maga.

⁴P̃a maliere, Sidon O, nalakena natasi e pasa, e naga, A da dogo navitinuana ni navisolaana, kite dapetape mau, go a da pakale natureai maga, kite pakale pisei ki naatara maga mau.

⁵Ragi waina narogorogoana wanogoe ega vei tea rogoana Ityipt, euga wo dogokitesa p̃arua narogorogoana nalo ni Tair.

⁶Kuga tuagoto paki Tarshish pano; kuga lalagaarova, nimu naatatoko maga ni navanua ni elau, O!

⁷Tea wanogoe e pei natokoana animu ni nalaelaeaana, waina naatulakeana kakana e pei tea ni ragi ni tuai, waina natuana ero dape a pano paki uvea naga ega m̃enaki doko asa, kite?

⁸Sei waina e midoaki dawona ki tea wanogoe dip̃a Tair, natokoana vitua ki vauvau maga, waina tea vakokoto kakana maga eu pei naatam̃oli warua maga, waina tea sorisori kakana maga eu pei tea dodomadaganiana maga ni maramana?

⁹Yehovah ki taua maga e midoaki dawona ki nia, naga ega mari navei‐p̃op̃ovakilagiana ni sara nasamasamaana ega vei tea marisakiana, naga ega mari tea dodomadaganiana maga mamau puti ni maramana euga vei tea dododaoana.

¹⁰P̃a lelep̃esi usuraki navanua dakiusi Noaisara, Tarshish natuna nagoroi O; nawora e dika.

¹¹E sai ki nam̃elearuna elagi ki natasi, e paria ki namarakiana maga: Yehovah e pitip̃aki nalo ni Kanaan, naga euga mari puoli ki nasum̃a ni p̃aaka kakana maga.

¹²Go e naga, P̃a wo da moro laelaea mau, nigo nagoroi atara ni Sidon O, waina ku pei tea riesokiana: p̃a tuleana, p̃a tuagoto paki Kittim pano; ma p̃a wo moro dika ki namaromaroana tokora wanogoe.

¹³P̃a leo punusi navanua ki tea ni Kaldea; e da moro pei nalauna sikai mau; tea ni Assiria eu lawo ki nia e pei agi nalo tuavati maga ni masop̃alo: eu sike lawo ki nasum̃a varau pakilagi adeada maga dip̃a e, eu dap̃olosiwo ki nasum̃a warua kakana maga, po mari a e pei tea makaka sikai.

¹⁴Kuga lalagaarova, nimu rarua maga ni Tarshish O; nalakena tokora kasua anigo e pei tea mariana e pei maso maladi.

¹⁵Go ega wo pakilina naaleatia wanogoe, naga Tair ega wo pei tea maliokiana natau rualima larua, ega tapala namauriana ki nawota sikai: edaku ki nanopuana ni natau rualima larua, Tair ega wo dakiusi nagoroi masausara ni nalegaana waia:

¹⁶P̃a tape harp sikai, p̃a surata usuraki natokoana, nigo nagoroi masausara waina ku pei tea maliokiana; p̃a mari roroaleo wia, p̃a lega nalegaana laapa, naga p̃a wo moro pei tea midoakiana.

¹⁷Go ega wo pakilina edaku ki nanopuana ni natau rualima larua, naga Yehovah ega wo leo punusi Tair, go ega wo liliu paki navasadapuiana kakana, go ega wo maripele paki namarakiana maga mamau puti waina eu doko narae ni maramana.

¹⁸Go naleo vakokotoana kakana maga go navasadapuiana kakana euga wo pei tea tapu paki Yehovah: euga wo da pei tea taluaana kite dauakiana mau; nalakena naleo vakokotoana kakana ega wo pei agi tea maga waina eu doko narae ni Yehovah doko, naga euga kanikani po puka, go naga euga suni tea suniana wia.