Read Nguna Togoa Etafe North ISA 24 Bible Online

ISA 24 - Nguna Togoa Etafe North bible

ISA 24

¹Kuga leo, Yehovah e mari navanua e p̃alo, go e mari a e pei maso maladi, po dap̃olosiwo ki nia, po daperavera ki naatatoko kakana maga.

²Go ega wo doko naga agi narei ega tapala agi tea viri; agi tea suasua ega tapala agi nawota aneana; agi nagoroi suasua ega tapala agi nawota nagoroi aneana; agi tea vakokoto ega tapala agi tea sosori; agi tea vitua ki tea seakiana ega tapala agi tea tape tea seakiana; agi tea tape narogoviana ega tapala agi tea vitua ki narogoviana paki nia.

³Navanua ega wo pei maso maladi one, po pei tea marisasakiana; nalakena Yehovah e noa navasaana wanogoe.

⁴Navanua e susue po mavunuvunu, maramana e manainai po sirinopu, tokora vakilagi maga ni maramana eu sirinopu.

⁵Navanua e pei tea mariana e loa nalakena naatatoko kakana maga; nalakena eu dapiri nawotaeana maga, eu mari natip̃akiana e panop̃ota, eu dapiri navasasokiana waina e du du po du mau du.

⁶Nalakena tea wanogoe navasasakiana e dinomi navanua, go tea maga waina eu doko asa doko eu pei tea tip̃akotoviana: nalakena tea wanogoe naatatoko maga ni navanua eu pei tea tap̃arakiana, go naatam̃oli maga waina eu pei tea toropusiana eu doko, eu pisa mau.

⁷Waine vau e susue, vaine e kokolo, tea vei p̃op̃o laelaea eu do mamau puti gi.

⁸Nalaelaeaana ni tabret maga e makoto, namarip̃araiana ki tea maga waina eu laelaea e nopu, roroaleo ni harp e makoto.

⁹Euga wo da munu waine pilake nalegaana mau; namunuana kasua ega wo kokona paki tea maga waina eu munugi a.

¹⁰Natokoana ni navinovinoiana, e pei tea taperaverakiana: nasum̃a mamau puti eu pei tea kokoroana, naga te naata ega ta sili paki ekopu mau.

¹¹Nakuapiosoana sikai e doko napua maga nalakena waine e dika; nasamasamaana mamau e maligo, nalaelaeaana ni navanua e pano puoli.

¹²Natokoana e pei tea toropusiana e pei maso maladi doko, go namata‐pua maga eu pei tea marisasakiana eu pevera.

¹³Nalakena ega wo doko m̃aleoputo ni navanua usuraki narei maga, naga ega wo dakiusi ragi waina eu paria ki nakau oliva, dakiusi navilavilaeana ni nawa ni vaine ragi waina naleleiana e nopu.

¹⁴Eu sike nadaleoda, eu lega samasama ni natatap̃auana ki Yehovah. Eu pioso kasua pae taleva ni elo musu, eu samasama taleva ni elo sake, eu samasama ni Yehovah, Sup̃e ki Israel, elau maga ni natasi.

¹⁵Nalakena tea wanogoe kuga samasama ni Yehovah taleva ni elo sake, go nagisa ni Yehovah, Sup̃e ki Israel, navanua maga ni elau.

¹⁶Pae namatap̃ago edaku ni maramana tu dogo nalegaana maga, tea leana ega vei tea samasamaniana. Ma a naga, Kinau a sirinopu, kinau a sirinopu, ai kinau! Tea mari malauweluki maga eu mari malauweluki; ioro, tea mari malauweluki maga eu mari navei‐malauwelukiana warua liu.

¹⁷Namatakuana, go m̃orutano, go vaivai, eu pakilina ki‐go, naatatoko ni maramana O.

¹⁸Go ega wo pakilina, naga naata waina ega wo sava dua ki nasaruruana ni tea mataukiana, ega wo diro m̃orutano; go naata waina ega wo sake umai m̃elu dua ki m̃aleoputo ni m̃orutano, ega wo pei tea tapesokiana ki vaivai; nalakena namata leoduru maga ni elagi eu pei tea wolagatiana, go laketano maga ni maramana eu duruuru.

¹⁹Navanua e maworawora, navanua e sawara, navanua e pei tea duruaki‐p̃arua‐kiana.

²⁰Navanua ega wo darataara dakiusi naatam̃oli matamaloku sikai, po parivari dakiusi tap̃aup̃au sikai; go natapiriana kakana ega wo madaga one asa, go ega wo dowo, po da moro duleana mau.

²¹Go ega wo pakilina naaleatia wanogoe, naga Yehovah ega wo parati taua ni elagi nakoroatelagi, go nawota maga ni navanua maramana.

²²Go euga wo pei tea viragisaisai‐kiana, dapala waina tea soliana maga eu pei tea viragi‐saisai‐kiana doko m̃orutano, go euga wo pei tea kokoro‐p̃onotiana ekopu ni nasum̃a ni navavaiana, go edaku ki naaleatia laapa, euga wo pei tea varatiana.

²³Go atelagi ega wo dasuru ki naraena, go elo ega wo maliere; nalakena Yehovah ki taua maga ega wo maramara tava Sion, go Yerusalem, go ega wo pei tea samasamaniana narae ni tea matua aneana maga.