Read Nguna Togoa Etafe North ISA 25 Bible Online

ISA 25 - Nguna Togoa Etafe North bible

ISA 25

¹Yehovah O, nigo ku pei Sup̃e aginau; aga wo pasa sike ko pakilagi, aga wo pasa samasama ni nagisam̃a; nalakena ku mari tea ni namagaana maga, waina eu pei tea midoakidawona‐kiana tuai, tea veilomau, go lomau.

²Nalakena ku mari natokoana sikai e pei taua makaka sikai; natokoana p̃aakagoroana sikai e pei tea sapuraki one; nasum̃a warua ki tea vakavakae e da moro pei natokoana sikai mau; ega wo da moro pei tea tavagi‐piri‐ana te ragi mau.

³Nalakena tea wanogoe narei kasua maga euga wo samasama ni ko, natokoana maga ni nalauna mataukiana maga euga wo matau ki‐go.

⁴Nalakena ku pei tokora kasua agi tea rogokitesa, tokora kasua agi tea tika doko narogokitesaana aneana, tokora ni nasavasiliana pa dua ki suitaviro, melu sikai pa dua ki navivitinuana, ragi waina namaridogoana kasua ki tea mataukiana maga e dakiusi nalagi atu sikai.

⁵Dapala navivitinuana malo garagara, p̃a wo mari namarip̃araiana ki tea vakavakae maga ega vakitano; dapala navivitinuana melu ni napopouru, nalegaana ki tea mataukiana maga ega wo pei tea mariana ega makoto.

⁶Go Yehovah ki taua maga ega wo magi narei maga mamau puti mari nakaniana sikai ni navinaga wia tava wanogoe, nakaniana sikai ni waine matua, ki namarae go nam̃aladua, ki waine matua wia lua.

⁷Go doko tava wanogoe, nae ega wo dape lua tea taugoro‐rae waina e pei tea sawakiana e dap̃augoro narei maga mamau puti, go tea taugoro‐p̃otae waina e pei tea welesakiana e kovagoro nalauna maga mamau puti.

⁸Ega wo mari puoli ki namateana pa pa ega tu mau du; go Yehovah Sup̃e ega wo kasilua naririmata maga m̃elu dua ki sara namata maga; go ega wo dape lua nadododaoana ki narei aneana m̃elu dua ki maramana mamau: nalakena Yehovah e noa sua e.

⁹Go ega wo pei tea noaana naaleatia wanogoe, euga wo naga, P̃a leo, tea waia e pei Sup̃e anigida; tu leogoro asa, go ega wo mauti gida: e pei Yehovah; tu leogoro asa, tuga wo samasama po sokamidi namautipauriana aneana.

¹⁰Nalakena nam̃elearu ni Yehovah ega wo doko tava wanogoe doko, go Moab ega wo pei tea vapuludoaana naliana, dapala waina nasogosogo e pei tea vapuludoaana natap̃ata.

¹¹Go ega wo pitosi nam̃elearuna maga m̃aleoputo kakana, dapala tea waina e do ava e pitosi nam̃elearuna maga naga ega ava; ma Yehovah ega wo mari navakilagiana aneana ega wo pakitano nalakena namarinaleotageleana ni nam̃elearuna maga.

¹²Go nasum̃a varau pakilagi ni p̃aaka aneana, nae ega wo mari a ega vakitano, ega vaki natano, paki nam̃otam̃ota.