Read Nguna Togoa Etafe North ISA 26 Bible Online

ISA 26 - Nguna Togoa Etafe North bible

ISA 26

¹Naaleatia wanogoe nalegaana waia ega wo pei tea legaana navanua ni Yudah: Natokoana kasua anigida O; Sup̃e ega wo sike lawo ki namautipauriana ega vei p̃aaka maga go nakoro ni p̃aaka maga.

²Kuga wolagati namata‐pua maga, naga nalauna leana waina e pavaigoro nalomauana ega sili ara.

³Tea waina e pei p̃op̃o vei lomau paki‐go, p̃a wo pavaigoro e ega toko natam̃ateana wialua, nalakena e pavatu ako.

⁴Kuga vavatu Yehovah sara ragi: nalakena Yehovah Sup̃e e pei vatu laketoko waina e du du po du mau du.

⁵Nalakena e mari tea maga waina eu doko tokora ni elagi eu pakitano, natokoana waina e pei tea sikeana pakilagi, e mari a e pakitano, e mari a e pakitano paki natano; e piragi a pakitano paki nam̃otam̃ota.

⁶Nam̃ele natua ni tea rogokitesa, go navasiana ni tea tika ega wo pasi soki a.

⁷Napua ki tea leana e pei naleanaana: nigo ku leana, ku maramatana ki napua ki tea leana.

⁸Au leogoro napua ni navasap̃otaeana anigo maga, Yehovah O; namasauana ni nap̃op̃ogami e paki nagisam̃a go paki nawotaeana anigo.

⁹Nap̃op̃ogu e masau ko p̃ogi; ioro, naatagu nap̃alaugu ega wo laaga ako m̃araverave: nalakena ragi waina navasap̃otaeana anigo maga eu doko navanua, naatatoko maga ni maramana eu ataedogo namarinaleoleana.

¹⁰Tea sigisigileo ega vei tea saup̃iakiana, ma ega wo da atae dogo namarinaleoleanaana mau; doko navanua ni naleanaana, ega wo mari dagele, go ega wo da punusi natatap̃auana ki Yehovah mau.

¹¹Yehovah O, nam̃elearum̃a e pei tea sikeana pakilagi, ma eu da punusi a mau: ma euga wo punusi nasuisuiana anigo paki narei waia, po maliere; ioro, nakapu ega wo gani dinomi walup̃ota anigo maga.

¹²Yehovah O, p̃a wo maginami mari dawona ki natam̃ateana: nalakena ku moro maginami marimatua nawosiana aginami mamau puti waina au p̃osiwosi ara.

¹³Yehovah, Sup̃e aginami O, nawota p̃ota maga eu po maramara dap̃au gami; ma nagisam̃a e sikina auga wo noasai a.

¹⁴Nara eu mate sua, euga wo da moro mauri mau; eu pei tea mate maga, euga wo da moro duleana mau: nalakena ku parati ra po mari puoli ki da, po kasi lua namidoakida‐ana.

¹⁵Ku mari nalauna e disu po p̃arua, Yehovah O, ku mari nalauna e disu po p̃arua; ku pei tea samasamaniana: ku mari p̃elewelea ki kokoi maga mamau puti ni navanua.

¹⁶Yehovah O, doko narogokitesaana au laaga ko, au pioso ki natapasavasaana sikai ragi waina ku mari navaratiana e doko gami.

¹⁷Dapala waina nagoroi pivilake sikai, waina e disu paki m̃aladigi ki ragi ni navisolaana aneana, e pitivitinu go e kuapioso doko navitivitinuana aneana; kinami ma au dapala nogoe doko naraem̃a, Yehovah O.

¹⁸Au pivilake, au pitivitinu, au mari dapala e pei nalagi m̃oli; au da mari te navualuaana maramana mau; go naatatoko maga ni navanua eu da dowo mau.

¹⁹Tea mate anigo maga euga wo moro mauri; nap̃atoko mate adeada maga euga wo moro duleana. Tea maga waina eu doko nam̃otam̃ota ni natano, euga wo darapa po lega samasama: nalakena nasovaki anigo e dapala nasovaki pilavila, go natano ega wo lua ki tea mate maga.

²⁰P̃a umai, narei aginau, p̃a sili paki em̃ago anigo maga, po kokoro p̃onotia namata kakana maga: p̃a tokoloku ragi kiki, pa pa namaritausuana ega liu pano.

²¹Nalakena p̃a leo, Yehovah e dave m̃elu naliana naga ega varati naatatoko maga ni navanua nalakena namarinaleotageleana adeada: go natano ega wo mari pakasa ki nada waina e pei tea takiana asa, go ega wo da moro dap̃augoro tea maripunueana aneana maga mau.