Read Nguna Togoa Etafe North ISA 27 Bible Online

ISA 27 - Nguna Togoa Etafe North bible

ISA 27

¹Naaleatia wanogoe Yehovah ega wo parati leviathan, m̃aata sava m̃araverave, leviathan m̃aata vivirosi, ki lova mataukiana warua go kasua aneana; go ega wo mari punue drakon waina e doko epua ni natasi doko.

²Naaleatia wanogoe kuga lega, Roara ni vaine masauniana!

³Kinau Yehovah a do pavaigoro e; aga wo pue a sara ragi: aga wo pavaigoro e aleati go p̃ogi, mase te naata e pe mari sa ki nia.

⁴Namaritausuana e dika au; tea vivitip̃a maga go tea makalikali maga eu pe mari dip̃a au navakalo, e pe wia! A pe marimari dip̃a ra, a pe tap̃ara ki sokata ki da.

⁵Kite eu pe vuasoki nakasuaana aginau, naga eu pe mari natam̃ateana paki nau; eu pe wo mari natam̃ateana paki nau.

⁶Naaleatia maga waina euga wo umai, Yakob ega wo sai ki nakoana; Israel ega wo siria po pum̃a: go euga wo pakavuro narae ni maramana ki nawada.

⁷E atugi ra, dakiusi waina e atugi tea maga waina eu atugi ra, kite? Kite eu pei tea maripunueana dakiusi waina tea maga waina eu maripunue ra eu pei tea maripunueana, kite?

⁸Ku dape lua tea kiki pae tea kiki, pae natip̃akiluaana ku pululu ki da; nae e sasara lua ra ki nalagi kasua aneana naaleatia ni nalagi ruatu.

⁹Nalakena tea wanogoe pae tea waia namarinaleotageleana ki Yakob ega wo pei tea mari‐dautau‐kiana, go tea waia e pei nawa mamau ni natapeluaana ni namarinaleosaana aneana; ragi waina ega mari vatu maga mamau puti ni wede ni naviriana euga takiusi vatu tare duki‐p̃oroworosiana, dapala waina Asherah maga go nasup̃e maga ni elo euga wo da moro duleana te ragi mau.

¹⁰Nalakena natokoana p̃aakagoroana e maladi doko, e pei tokora tokoana waina e p̃alo po pei tea toropusiana doko, dakiusi masop̃alo: tokora wanogoe kau natuna ega wo ganikani asa, go tokora wanogoe ega wo one natano asa, go ega wo gani nasirina maga.

¹¹Arana maga eu kokolo, go eu makoto; nagoroi maga eu rumai, po dokoni ra: nalakena e pei narei sikai waina e dika ki namidoakiataeana; nalakena tea wanogoe nae waina e mari dawona ki da ega wo da maritadodomi ra mau, go nae waina e p̃osiwosi ki da ega wo da saup̃ia ki da mau.

¹²Go ega wo pakilina naaleatia wanogoe, naga Yehovah ega wo dagaukotovi pae tokora ni natave ni Noaisara pano pa pa liliu nap̃ap̃a noaisara ni Ityipt, go kuga wo sikasikai pei tea viragi‐saisai‐kiana, nimu Israel natuna maga O.

¹³Go ega wo pakilina naaleatia wanogoe, naga paiga warua sikai ega wo pei tea suiana; go tea maga waina eu m̃aladigi sirinopu navanua ni Assiria, go tea maga waina eu pei tea kopasiluaana paki navanua ni Ityipt pano, euga wo umai po lotu ki Yehovah tava tapu ni Yerusalem.