Read Nguna Togoa Etafe North ISA 28 Bible Online

ISA 28 - Nguna Togoa Etafe North bible

ISA 28

¹Ai ki tagotop̃au ni naleomadagaana ki tea matamaloku maga ni Efraim, ki tea maga waina eu pei tea marimatuakiana ki waine, go ki napum̃a makuku ni naleom̃atakiana ni nasamasamaana aneana, waina e doko nap̃au ni nap̃aloa m̃anopunopu!

²P̃a leo, Yehovah e peani tea sikai waina e pei tea marimatua go tea kasua; dakiusi nalagi atu ni usa ni vatu, nalagi atu mari sa sa ki sikai, dakiusi natave ni noai warua liu sarasaraape maga, ega wo nadi ki paki natano ki nam̃elearuna.

³Tagotop̃au ni naleomadagaana ki tea matamaloku maga ni Efraim, ega wo pei tea vasi‐puludoaana.

⁴Go napum̃a makuku ni naleom̃atakiana ni nasamasamaana aneana, waina e doko nap̃au ni nap̃aloa m̃anopunopu wanogoe, ega wo dakiusi nawa vea ni takavea ni napuliva; waina naata sikai e punusi a, e dape a nam̃elearuna po paka sikai gani a.

⁵Naaleatia wanogoe Yehovah ki taua maga ega wo pei tagotop̃au sikai ni nasamasamaana, go tap̃au sikai ni naleom̃atakiana, paki namagovai ni narei aneana waina eu pei tea toropusiana doko.

⁶Go ega wo pei naatana ni naleanaana sikai paki tea waina e do pasa p̃otae, go nakasuaana paki tea maga waina eu doa navakalo pa dua ki namata‐pua.

⁷Ma tea maga waia nara ma eu sasap̃o nalakena waine, go nalakena namunuana kasua eu m̃elu dua ki napua; tea viri go profeta eu sasap̃o nalakena namunuana kasua, eu pei tea dinomiana ki waine, eu sasap̃o pano nalakena namunuana kasua; eu sasap̃o naveanoasaiana, eu dapilagona navasap̃otaeana.

⁸Go wede maga eu mamau puti pura ki naluaana go ki naloaana, go tokora waina e dautau e dika.

⁹Ega wo pasa pisei ki sei naataeana? Go ega wo noakip̃otae sei navasapiseikiana? Tea vasue‐susu maga waina eu doro susu, kite?

¹⁰Nalakena navasaparatikiana e sokari navasaparatikiana, navasaparatikiana e sokari navasaparatikiana; natapavanauana e sokari natapavanauana, natapavanauana e sokari natapavanauana; tea kiki go tea kiki.

¹¹Io ma ki nagole p̃ota maga go ki nam̃ena p̃ota, ega wo pasa paki narei waia:

¹²Waina e noa ki da, e naga, Tea waia e pei namaromaroana, kuga vitua ki namaromaroana paki tea waina e mawosa; go tea waina e pei navakamauriana: ma eu da suasua dogo e mau.

¹³Nalakena tea wanogoe navasaana ki Yehovah paki da ega wo pei navasaparatikiana sokari navasaparatikiana, navasaparatikiana sokari navasaparatikiana; natapavanauana sokari natapavanauana, natapavanauana sokari natapavanauana; tea kiki go tea kiki; naga euga vano, po dowo kitaku, po mawora, po pei tea soliana, po pei tea vuatiana.

¹⁴Nalakena tea wanogoe, kuga rogo navasaana ki Yehovah, nimu naatam̃oli vasa saudoa maga, waina ku maramara dap̃au narei waia waina eu doko Yerusalem doko:

¹⁵Nalakena ku noa naga, Au mari navasasokiana sikai sikoti namateana, go au mari nasuasuakiana sikai sikoti Sheol; ragi waina navaratiana marimatua ega wo duaduru pano, ega wo da umai paki gami mau; nalakena au mari nasorosoroana maga eu pei tokora ni nasavasiliana aginami, go au dokoloku melu ni namarisoreana:

¹⁶Nalakena tea wanogoe, Yehovah Sup̃e e noa dapala nea, e naga, P̃a leo, a lawo ki vatu sikai Sion, vatu maridogoana sikai, naga ega vei vatu‐laketoko sikai, vatu wia sikai ni naweluki ni laketano doko mau doko: tea waina e saralomau ega wo da parivari mau.

¹⁷Go aga wo mari naleanaana ega vei namea totowo, go namarinaleoleanaana ega vei vatu rowogi: go usa ni vatu ega wo sasara lua tokora ni nasavasiliana ni nasorosoroana maga, go noai maga euga wo donigoro tokora sili.

¹⁸Go navasasokiana animu sikoti namateana ega wo pei tea m̃oli, go nasuasuakiana animu sikoti Sheol ega wo da lawodu mau; ragi waina navaratiana marimatua ega wo duaduru pano, ragi wanogoe kuga wo pei tea vasi‐sokiana pae asa.

¹⁹Ragi waina ega wo duaduru pano, ega wo puati mu; nalakena ega wo duaduru pano sara ragi malip̃ogi paki malip̃ogi, aleati go p̃ogi: go namidoakiataeana ni navasaana wanogoe ega wo pei nap̃ilakeana mau.

²⁰Nalakena nawewele e puru naga naatam̃oli e mari sa dum̃ana pitosi a asa; go tea kulukulu e da patakana naga ega tum̃ana kulutigoro e asa.

²¹Nalakena Yehovah ega wo duleana dapala waina e duleana tava Perasim, ega wo maritausu dapala waina e maritausu nap̃aloa ni Cibeon; naga ega mari nawosiana aneana, nawosiana vanop̃ota aneana, po mari namariana aneana ega vakilina, namariana vanop̃ota aneana.

²²Nalakena tea wanogoe kuga ta pei tea vasa saudoa maga mau, mase natali solisoli animu maga eu pe vei tea mariana eu pe kasua: nalakena a dogo pae Yehovah, Yehovah ki taua maga, navasa‐dawonakiana sikai ni namarisasakiana paki navanua mamau.

²³Kuga taki nadaligamu, po dogo nadaleogu; kuga taki dorogo, po dogo navasaana aginau.

²⁴Tea sisi natano e do sisi natano pitip̃atip̃a po da sapuraki mau, kite? E do kilikili pitip̃atip̃a po mari p̃oraworae nap̃eretano maga ni natano aneana, po da maromaro asa mau, kite?

²⁵Ragi waina e mari m̃om̃oa ki natano kakana, e da do daperavera ki dill, po sapura ki kummin, po lawo ki whiit ovara kakana maga, go barle tokora wia kakana, go spelt nadigi kakana mau, kite?

²⁶Nalakena Sup̃e aneana e do pasa parati ki leana ki nia, po do pasa pisei ki nia.

²⁷Nalakena dill e da pei tea wokalesueana ki tea wokalesue makali sikai mau, go tea taliepu ni kart e da parosi kummin mau; ma dill e pei tea wokalesueana ki tagau sikai, go kummin ki tiko sikai.

²⁸Korn e pei tea mari‐p̃oroworosiana naga euga mari bred asa; nalakena tea wanogoe e da pei tea wokalesueana mau: go tea taliepu ni kart aneana go horse aneana maga eu pe taperavera ki nia, ma e pe ta mari‐p̃oroworosi a mau.

²⁹Go tea wanogoe nae ma e moro dave m̃elu Yehovah ki taua maga, waina nanoap̃otaeana aneana e pei tea ni namagaana, go namanumatuaana aneana e p̃ialua.