Read Nguna Togoa Etafe North ISA 29 Bible Online

ISA 29 - Nguna Togoa Etafe North bible

ISA 29

¹Ai ki Ariel, Ariel, natokoana waina David e m̃enaki doko asa! Kuga sokari natau ki natau; nasaisaiana maga euga liliu umai:

²Ma aga wo diesoki Ariel, go nasusueana go nalalagaarovaana eroga wo pakilina: go ega wo dakiusi waina e maginau pei Ariel sikai.

³Go aga wo p̃aakagoro ko daliviri, po kelugoro ko ki nasum̃a kasua sikai, go aga wo sike lawo ki nawosiana ni nakelugoroana dip̃a ko.

⁴Go p̃a wo pei tea viragiana pakitano, go p̃a wo pasa m̃elu nap̃alau ni natano, go navasaana anigo ega wo doko nam̃otam̃ota ni natano po pasa pakitano, go nadaleom̃a ega wo dakiusi nadaleo ni naatana vasapua sikai ega tave m̃elu natano, go navasaana anigo ega wo pei navasadalakolakoana m̃elu nam̃otam̃ota.

⁵Ma taua warua ni walup̃ota ki‐go maga ega wo dakiusi nam̃otam̃ota kirikiri, go taua warua ni tea mataukiana maga ega wo dakiusi nap̃olaga waina e pano puoli: io, ega wo pakilina m̃araverave, ragi ni nawilimatana sikai.

⁶Yehovah ki taua maga ega wo parati ko ki tovae, go ki naruru, go ki nasaruruana warua, ki suitaviro go ki nalagi atu, go ki mena ni nakapu kanikani sikai.

⁷Go taua maga ni nalauna maga mamau puti waina eu do mari navakalo dip̃a Ariel, tea mamau puti waina eu do marimari dip̃a e, go dip̃a tokora kasua kakana, po do diesoki a, euga wo dakiusi nap̃erea sikai, navunusiana sikai ni p̃ogi.

⁸Go ega wo dapala naatam̃oli sikai waina e pitolo ragi waina e p̃erea, go p̃a leo, e ganikani; ma ragi waina e darapa, naatana e p̃alo doko: kite dapala naatam̃oli sikai waina e madou ragi waina e p̃erea, go p̃a leo, e munu; ma e darapa, go p̃a leo, e manainai go namadouana aneana e da pei tea vuepunueana mau: taua maga ni nalauna maga mamau puti waina eu mari navakalo dip̃a tava Sion, euga wo dapala nogoe doko.

⁹Kuga toropa, po saram̃akoto; kuga mari namasauana animu po pei kesa: eu matamaloku, ma e da pei nalakena waine mau; eu darataara, ma e da pei nalakena namunuana kasua mau.

¹⁰Nalakena Yehovah e daki kovai naatana sikai ni namaturu‐darataraana paki mu, go e mari namatamu maga, profeta maga, eu p̃ili; go e kulugoro nap̃aumu, tea kikita maga.

¹¹Go naveanoasaiana mamau e po dakiusi navasaana maga ni tusi vulusokiana sikai paki mu, waina naatam̃oli maga eu pitua ki nia paki tea atae tusi, doko do naga, P̃a veve tusi waia, a pavara ni ko asa: go e pasadara, po naga, A mari sa, nalakena e pei tea vulusokiana:

¹²Go tusi wanogoe e pei tea vituakiana paki tea waina e da atae tusi mau, eu naga, P̃a veve tusi waia, a pavara ni ko asa: go e pasadara, po naga, Kinau a da atae tusi mau.

¹³Go Yehovah e naga, Nalakena narei waia eu disu paki m̃aladigi kinau, go eu do dodomadagani au ki nawokada go ki nagoleda maga, ma nap̃op̃oda e doko uvea kinau, go namatakuana adeada waina eu matau kinau asa e pei natip̃akiana sikai ki naatam̃oli maga, waina eu pasa pisei ki da asa:

¹⁴Nalakena tea wanogoe, kuga leo, aga wo moro mari nawosiana sikai ni tea ni namagaana m̃aleoputo ni narei waia, nawosiana warua sikai go tea ni namagaana sikai: go namanumatuaana ki naatam̃oli manumatua adeada maga ega wo pano puoli, go namidoakiataeana ki naatam̃oli midoaki atae adeada maga ega wo pei tea tasurukiana.

¹⁵Ai ki tea maga waina eu laaga naga euga tasuru ki namidoakip̃otaeana adeada pakipua pa dua ki Yehovah, go waina namariana adeada maga eu doko namaligo, go waina eu noa naga, Sei waina e punusi gami? Go sei waina e atae gami?

¹⁶Naleo maga eu pei tea tap̃olosiwokiana nalakena nimu! Tea mari lasa ni naruku ega vei tea midoakiana naga e pei naruku; naga lasa waina e mari a e pe wo noa nalo ni tea waina e mari a, e pe wo naga, Nae e da mari au mau, kite? Kite naloriki waina e pei tea mari‐dawona‐kiana e pe wo noa nalo ni tea waina e mari dawona ki nia, e pe wo naga, Nae e dika ki namidoakiataeana?

¹⁷E da pei naga ragi vuru e ko puoli, go Lebanon ega wo panop̃ota po pei vanua sikai ni namasu, go vanua ni namasu wanogoe ega wo pei tea midoakiana naga e pei mala ni nakau sikai, kite?

¹⁸Naaleatia wanogoe tea p̃aro ega wo dogo navasaana maga ni tusi, go tea kesa ega wo leosai m̃elu namaligoligo go m̃elu namaligo.

¹⁹Tea matemate ega wo pap̃ai nalaelaeaana vau doko Yehovah, go tea tika m̃aleoputo ni naatam̃oli maga ega wo samasama ni Tea Tapu ki Israel.

²⁰Nalakena tea riesoki kasua ega wo puoli, go tea mari saudoa ega wo makoto, go tea maga mamau puti waina eu do leogoro naga euga mari tea waina e sa, euga wo pei tea taeluaana:

²¹Nara waina eu noasokisoki sorosoro dip̃a naatam̃oli nalo ni navululuana sikai, po dasuru ki vaivai sikai raki tea vasap̃otae doko namata‐pua, po pua daki tea leana ki naleo p̃alo sikai.

²²Nalakena tea wanogoe Yehovah waina e daulua Abraham, Sup̃e ki nasum̃a ni Yakob, e noa dapala nea, e naga: Yakob ega wo da moro maliere mau, go naraena ega wo da moro dataare mau.

²³Ma ragi waina ega vunusi natuna maga, nawosiana ni nam̃elearugu maga m̃aleoputo kakana, euga wo dapugoro nagisagu; go euga wo dapugoro Tea Tapu ki Yakob, go euga wo matau ki Sup̃e ki Israel.

²⁴Go tea maga waina eu sasap̃o nap̃op̃oda, euga wo atae namidoakiataeana, go tea maga waina eu daururu, euga wo atae dogo navasapiseikiana.