Read Nguna Togoa Etafe North ISA 30 Bible Online

ISA 30 - Nguna Togoa Etafe North bible

ISA 30

¹Ai ki natugu vei p̃auluulu maga, Yehovah e noa e, waina eu dogo parati ki navasaparatikiana, ma e da pei tea aginau mau; waina eu daki navituaana takiana ni waine, ma e da pei nalo ni Naatagu mau, naga euga sokari namarinaleosaana ki namarinaleosaana:

²Waina eu dave pano po surata naga euga siwo paki Ityipt pano, go eu da pea pusuusu paki nawokagu asa mau; naga euga sava sili paki nakasuaana ki Faraoh, go naga euga vavatu melu ni Ityipt!

³Nalakena tea wanogoe nakasuaana ki Faraoh ega wo pei namaliereana animu, go navavatuana animu waina ku pavatu melu ni Ityipt asa, navinovinoiana animu.

⁴Nalakena tea maraki aneana maga eu doko Soan doko, go tea tautauana aneana maga eu doko pano pa pa paraki Hanes.

⁵Euga wo mamau puti maliere nalakena narei sikai waina eu da mariatae madeada pei te navatuna mau, waina eu da pei te nasilaeana kite te nataluaana mau, ma eu pei tea ni namaliereana sikai go ni navasapinoaana sikai.

⁶Eu dapetape nasogolapaana adeada nam̃adu ni ass vusavusa maga, go naleo wia tauakiana adeada maga nam̃adu ni kamel maga po duaduru navivitinuana ni navanua ni Sauth, duaduru navanua ni nagaragaraana go ni narogokitesaana, waina laion goroi go laion tureai, m̃aata sa go m̃aata vivikati waina e do diri, eu m̃elu asa, po pano punusi narei sikai waina ega wo da madeada pei te navatuna mau.

⁷Nalakena nasilaeana ki naka ni Ityipt e pei tea p̃alo, go e da pei te navatuna mau: nalakena tea wanogoe a noa nalo kakana, a naga, Nae e pei Rahab, waina e doko m̃oli.

⁸Go p̃a vano, p̃a midiri a vatu welewelea sikai naraeda, po midimidiri a tusi lulukiana sikai, naga ega vei nanoasokisokiana sikai waina ega tu du po du mau du paki naaleatia maga waina euga wo edaku.

⁹Nalakena e pei narei vei p̃auluulu sikai, natuna maga waina eu pasagoro tamada, natuna maga waina eu da suasua dogo nawotaeana ki Yehovah mau:

¹⁰Waina eu noa ki tea kikita maga, eu naga, Kuga ta leo punusi te navunusiana mau; go ki profeta maga, Kuga ta peanoasai tea waina e leana paki gami mau, kuga noa ki gami ki navasaana m̃om̃oa maga, kuga veanoasai namarisoreana maga:

¹¹Kuga toropusi napua, kuga tawasi m̃elu dua ki namariana wia, kuga mari Tea Tapu ki Israel ega vuoli ki naraegami.

¹²Nalakena tea wanogoe, Tea Tapu ki Israel e noa dapala nea, e naga, Nalakena ku dip̃adoa navasaana waia, po pavatu nariesokiana go namarisaraana, po ovi doko ara;

¹³Nalakena tea wanogoe namarinaleotageleana waia ega wo dakiusi malo mawora sikai doko nakoro vakilagi sikai paki mu, waina e marie po m̃aladigi pevera, ragi waina e makoto e dowo m̃araverave, ragi ni nawilimatana sikai.

¹⁴Go ega wo marip̃orae a, dapala waina lasa ni naruku e pei tea marip̃oraeana, ega wo marip̃oraworae a, po da mari malemale a mau; dapala waina te matele sikai ni lasa ni naruku ega wo da pei tea vap̃aiana m̃aleoputo ni mateletele maga mau, waina ega vataka naga euga mikiti kovae nam̃elevara asa, kite naga euga saovi noai m̃elu luku ni noai asa.

¹⁵Nalakena Yehovah Sup̃e, Tea Tapu ki Israel, e noa dapala nea, e naga, Naliliuana go namaromaroana eroga wo pei namautipauriana animu; natam̃ateana go navavatuana eroga wo pei nakasuaana animu: go nimu ku da suasua asa mau.

¹⁶Ma ku noa naga, Ee, nalakena auga wo sakesaake horse maga po mari m̃araverave; nalakena tea wanogoe kuga wo mari m̃araverave: go ku noa naga, Auga wo sakesaake tea waina e do sava m̃araverave; nalakena tea wanogoe tea maga waina euga kopasi mu, euga wo sava m̃araverave.

¹⁷Naatam̃oli manu sikai euga wo sava pano navasakasuaana ni naatam̃oli sikai; nimu kuga wo sava pano navasakasuaana ni naatam̃oli lima: pa pa namagovai kakamu waina kuga wo pei tea toropusiana doko, kuga wo dakiusi nakau ni manututu sikai doko nap̃au ni tava sikai, go dakiusi manututu sikai doko tava sula sikai.

¹⁸Go nalakena tea wanogoe Yehovah ega wo pei maritasoki parau naga ega saup̃ia ki mu, go nalakena tea wanogoe ega wo pei tea sikeana pakilagi naga ega maritadodomi mu: nalakena Yehovah e pei Sup̃e sikai ni naleanaana; tea maga mamau puti waina eu do leogoro asa, euga vei tea vasap̃iakiana.

¹⁹Narei O, waina ku doko Sion doko Yerusalem: p̃a wo da moro dagi mau; nae ega wo saup̃ia ki‐go ragi waina p̃a wo kuapioso; ragi waina ega wo dogo, ega wo pasadara ko.

²⁰Go Yehovah ega wo dua ko navinaga ni nariesokiana go noai ni narogokitesaana, ma tea vasapiseiki anigo ega wo da moro dokoloku mau, ma namatam̃a eroga wo punusi tea vasapiseiki anigo:

²¹Go nadaligam̃a eroga wo dogo navasaana sikai natakum̃a, waina ega wo naga, Tea waia e pei napua, kuga surata asa; ku pe taleledao paki taleva ni matua, kite ku pe taleledao paki taleva ni mawiri.

²²Go kuga wo mari sa ki nasup̃e taeana animu maga waina eu pei tea vulutigoroana ki silver, go nasup̃e takiana animu maga waina eu pei tea kalutigoroana ki kold: p̃a wo daperavera ki da pano dapala naleo loa sikai; p̃a wo noa ki nia, P̃a vano.

²³Go ega wo pitua ki usa raki napati ni korn anigo, waina p̃a wo sapura ki nia natano; go navinaga waina natano ega wo pitua ki nia ega wo m̃anopunopu po p̃arua p̃ia: naaleatia wanogoe katel anigo euga wo ganikani napega warua maga.

²⁴Go oks maga, nara ma ass vusavusa maga waina eu sisi natano, euga wo gani navinaga tasimenakiana, waina e pei tea niveana ki savel go ki nive.

²⁵Go naaleatia ni naatugiana warua, ragi waina nasum̃a varau pakilagi maga euga wo dowo, noaisara maga go nap̃ap̃a noaisara maga euga wo doko sara tava vakilagi, go euga wo doko sara tava sula.

²⁶Go naaleatia waina Yehovah ega wo pivisi narei aneana namarisakiana adeada, po mari pauri wotu adeada waina eu pei tea atugiana asa, namarama ni atelagi ega wo dakiusi namarama ni elo, go namarama ni elo ega wo maramalaga ega vaka larua, ega wo dakiusi namarama ni naaleatia larua naaleatia sikai maau.

²⁷Kuga leo, nagisa ni Yehovah e pae uvea umai, doko do pavaga ki namaetoana aneana, e pei tea samasamaniana navakilagi‐liu‐ana aneana: nagolena ero pura ki namaritausuana, go namenana e dapala nakapu kanikani sikai:

²⁸Go namerona e dapala nasalep̃ap̃a lelep̃esi sikai waina ega wo sake pa pa liliu nanoa, naga ega nive nalauna maga ki nive ni namaripuolikiana: go naga ega vuasoki nasi ni narei ki p̃auasi viragi sasap̃o sikai.

²⁹Kuga wo peani nalegaana sikai dapala waina e pe vei p̃ogi waina nasaisaiana tapu sikai e pe vei tea vavaigoroana asa; go p̃op̃o laelaea dapala waina tea sikai e pe vano pilake lokore naga e pe vaki tava ki Yehovah, paki Vatu Laketoko ki Israel.

³⁰Go Yehovah ega wo mari nadaleoana ni natatap̃auana ega vei tea rogoana, go ega wo mari naatugiana ni naruna ega vei tea vunusiana, ki namaritausuana vivitinu aneana, go ki mena ni nakapu vavaga sikai, ega vilake nalagi atu sikai, go suitaviro, go usa ni vatu.

³¹Nalakena naka ni Assiria euga wo pei tea marip̃oraworaeana ki nadaleo ni Yehovah, ragi waina ega vei tea atugiana ki tiko varati sikai.

³²Sara nawokatiana ni tiko ni navaratiana waina Yehovah ega atugi ra asa, ega vilake nadaleo ni timbrel maga go ni harp maga, ki namarimariana ni naruna tutuakiana, ega wo marimari dip̃a ra.

³³Nalakena tokora sikai ni natap̃arakiana e pei tea mari‐m̃atakiana tuai; io, e pei tea mari‐m̃atakiana sua doko raki nawota; e mari a e pakipua go e p̃elewelea: natauakiana ni nakapu vavaga e p̃arua liu; namero ni Yehovah waina e dakiusi nap̃ap̃a sikai ni brimstone, e dokoni a.