Read Nguna Togoa Etafe North ISA 31 Bible Online

ISA 31 - Nguna Togoa Etafe North bible

ISA 31

¹Ai ki tea maga waina eu siwo paki Ityipt pano raki nasilaeana, waina eu pavatu horse maga; go waina eu pavatu kariot maga, nalakena eu laapa, go naatam̃oli maga waina eu sakesaake horse, nalakena nara eu kasua liu; ma eu da leo paki Tea Tapu ki Israel mau, kite laaga paki Yehovah mau!

²Ma nae ma e mari manumatua, go ega wo piragi nasaana umai, go ega wo da maripiri navasaana aneana maga mau: ma ega wo duleana dip̃a nasum̃a ni tea sigisigileo maga, go dip̃a tea silae maga ki tea maga waina eu do mari namarinaleotageleana.

³Naka ni Ityipt eu pei naatam̃oli, go eu da pei Sup̃e mau; go horse adeada maga eu pei tea ni nap̃okasi, go eu da pei tea ni naatana mau: go ragi waina Yehovah ega wo sai ki nam̃elearuna, tea silae ega wo dapilagona, go tea waina e pei tea silaeana ega wo dowo, go euga wo mamau puti paka sikai mavunuvunu.

⁴Nalakena Yehovah e noa kinau dapala nea, e naga, Dapala laion matua kite laion tureai waina e do urugoro tea katip̃oraeana aneana, taua warua ki tea leo parati ki shiip eu pe tave umai dip̃a e, e pe wo da saram̃akoto nadaleoda mau, kite matau ki namarip̃araiana adeada mau: dapala nogoe Yehovah ki taua maga ega wo siwo umai naga ega marimari dip̃a tava Sion, go dip̃a tava sula kakana.

⁵Dapala manu maga waina eu do diri, dapala nogoe Yehovah ki taua maga ega wo kovagoro Yerusalem; ega wo kovagoro e po pualua e, ega wo kalau sa po mauti a.

⁶Euga wo maradoa liliu paki tea waina Israel natuna maga eu mari p̃auluulu p̃arua dip̃a e.

⁷Nalakena naaleatia wanogoe sara naata kakamu kuga wo nadi ki lua nasup̃e animu maga ni silver, go nasup̃e animu maga ni kold, waina nam̃elearumu maga eu dum̃ada mari ra paki namarinaleosaana sikai.

⁸Go tea ni Assiria ega wo dowo ki lova sikai, ma ega ta pei tea ki naatam̃oli mau; go lova sikai, waina e da pei tea ki naatam̃oli mau, ega wo dinomi a: go ega wo sava pa dua ki lova wanogoe, go natureai aneana maga euga wo pei tea suasua maga naga euga vitua ki nawosiana ni nasautoga.

⁹Go vatu laketoko aneana ega wo pano puoli nalakena namatakuana, go tea maraki aneana maga euga wo saram̃akoto nalo ni manututu; Yehovah waina nakapu aneana e doko Sion, go upu ni nakapu aneana e doko Yerusalem, nae e noa e.