Read Nguna Togoa Etafe North ISA 33 Bible Online

ISA 33 - Nguna Togoa Etafe North bible

ISA 33

¹Ai ki‐go waina ku dape pavakoto, go te naata e da dape pavakoto ako mau; go waina ku mari malauweluki, go eu da mari malauweluki paki‐go mau! Ragi waina p̃a wo makoto ki natapepavakotoana, p̃a wo pei tea tapepavakotokiana; ragi waina namarimalauwelukiana anigo ega wo nopu, euga wo mari malauweluki paki‐go.

²Yehovah O, p̃a saup̃ia ki gami; au leogoro ako: p̃a vei narugami sara malip̃ogi, go namautipauri‐gami‐ana ragi ni narogokitesaana.

³Nalakena nasaruruana ni nap̃agaagaana, narei eu sava pano; nalakena ku dum̃am̃a sike ko pakilagi, nalauna maga eu pei tea taperaverakiana.

⁴Go tea vuti‐lua‐pavakotoana anigo ega wo pei tea sara dauakiana dapala waina uraasi e do sara dauaki; dakiusi midiri maga, euga wo soka darap̃a ra.

⁵Yehovah e pei tea sikeana pakilagi; nalakena e doko elagi mau: e pakavuro Sion ki naleanaana go ki namarinaleoleanaana.

⁶Go napariana ega wo dika naaleatia anigo maga, namautipauriana ega wo p̃arua, go namanumatuaana go namidoakiataeana: namatau‐ki‐Yehovah‐ana e pei naleo wia masauniana aneana.

⁷P̃a leo, tea viri maga ni wede ni naviriana eu kuapioso katama: tea tautauana maga ni natam̃ateana eu dagi p̃arua.

⁸Napua lapa maga eu maladi doko, naatam̃oli surata napua e dika: e dapiri navasasokiana, e midoaki p̃alo ki tea noasokisoki maga, e da midoaki naatam̃oli mau.

⁹Navanua e susue po mavunuvunu: Lebanon e maliere po kokolo: Sharon e dakiusi masop̃alo sikai; go Bashan go Karmel ero puluvulua ki lua nauluda maga.

¹⁰Ragi waia aga wo duleana, Yehovah e noa e; ragi waia aga wo dum̃agu dape au pakilagi; ragi waia aga wo pei tea sikeana pakilagi.

¹¹Kuga wo dumau ki nap̃olaga, kuga wo piragi nam̃otam̃ota: nameromu e pei nakapu sikai waina ega wo gani dinomi mu.

¹²Go narei maga euga wo pei tea tap̃arakiana dakiusi laime; dakiusi tea makalikali maga waina eu pei tea taekotoviana, eu pei tea tap̃arakiana ki nakapu.

¹³Nimu waina ku doko uvea, kuga rogo tea waina kinau a mari a; go nimu waina ku doko m̃aladigi, kuga atae namarimatuaana aginau.

¹⁴Tea mari naleo sa maga ni Sion eu mataku; naruruuruana e puasoki tea sigisigileo maga. Nigida sei kakagida e mariatae doko sikoti nakapu ganikani? Nigida sei kakagida e mariatae doko sikoti natap̃arakiana maga waina eu du du po du mau du?

¹⁵Naata waina e do surata naleanaana, po do pasa p̃ialua; naata waina e dip̃adoa nataluaana ni natapepavakotoana, waina e do puluvulua ki nam̃elearuna maga naga ega ta dape soki ruku maga mau, waina e do p̃onoti nadaligana maga pa dua ki narogoana ni nada, po do p̃ili namatana maga pa dua ki naleopunusiana ni tea sa;

¹⁶Nae ega wo doko elagi: p̃aaka aneana ega wo pei tokora kasua ni vatu laketoko: navinaga aneana ega wo pei tea vituakiana paki nia; noai aneana ega wo da dika mau.

¹⁷Namatam̃a eroga wo punusi nawota doko narekeikiana aneana: eroga wo leo punusi navanua waina e doko uvea.

¹⁸Nap̃op̃om̃a ega wo midoaki parati ki tea mataukiana: tea midiri wai? Tea waina e dowogi nasautoga wai? Tea waina e peve naleo wia maga ni naulu laapa wai?

¹⁹P̃a wo da moro punusi narei mata sa wanogoe mau, narei sikai ki navasaana panop̃ota waina ku mari sa atae p̃otae a mau; ki namena panop̃ota waina ku mari sa midoaki atae a mau.

²⁰P̃a wo leo punusi Sion, natokoana ni nasaisaiana tatutakiana anigida maga: namatam̃a eroga wo punusi Yerusalem natokoana sikai ni natam̃ateana, tap̃aup̃au sikai waina ega wo da parivari mau, waina nakau lawodu kakana maga euga wo da pei tea vaku‐dakatiana mau, go waina natali kakana maga euga wo da makoto mau.

²¹Ma natokoana ni nasamasamaana ega wo pei anigida, tokora sikai ni noaisara welewelea maga go ni nap̃ap̃a noaisara maga; tokora waina rarua paluse e mari sap̃o paki asa, go waina shipe warua e mari sap̃o liu sa pano.

²²Nalakena Yehovah e pei tea vasap̃otae anigida, Yehovah e pei tea vitua ki nawotaeana anigida, Yehovah e pei nawota anigida; nae ega wo mauti gida.

²³Namea anigo maga eu marurusi; eu mari sa puasoki kasua ki natira doko naliada mau, eu da pua pukesi nalae mau: ragi wanogoe tea katipunueana ni tea vuti‐lua‐pavakotoana warua ega wo pei tea tap̃otaeana; tea vei pito ega wo dape tea katipunueana.

²⁴Go naatatoko ega wo da noa naga, Kinau a sasana: naatam̃oli maga waina eu doko asa doko, namarinaleotageleana adeada ega wo madeada pei tea midoakikorokoroana.