Read Nguna Togoa Etafe North ISA 34 Bible Online

ISA 34 - Nguna Togoa Etafe North bible

ISA 34

¹Kuga umai paki m̃aladigi, nimu nalauna maga, naga kuga rogo; go kuga taki dorogo, nimu narei maga O: navanua ega rogo e, go navuraana kakana; maramana go sara naleo waina eu m̃elu asa.

²Nalakena Yehovah e peani namaetoana dip̃a nalauna maga mamau puti, go namaritausuana dip̃a taua mamau adeada: e dip̃akotovi ra, e pitua ki da paki namaripunueana.

³Go tea maripunueana adeada maga euga wo pei tea nadikiana pano, go nap̃oaana ni nap̃atoko mate adeada maga ega wo sake umai, go tava maga euga wo sara ki nadada.

⁴Go taua mamau ni nakoroatelagi ega wo sara pano, go nakoroatelagi maga euga wo pei tea luluki‐saisai‐kiana dakiusi tusi lulukiana sikai: go taua mamau adeada euga wo makusum̃i dakiusi naulu ni vaine, go dakiusi naulu makusum̃i sikai ni nakau napuliva.

⁵Ragi waina lova ki Yehovah ega wo pei tea vuvuraikiana nakoroatelagi, kuga leo, ega wo siwo umai paki Edom, paki narei waina e pei tea tip̃akotoviana.

⁶Lova ki Yehovah e pura ki nada, e pei tea mariana e m̃anopunopu ki nap̃eletia, ki nada ni shiip natuna maga go ni naninani maga, ki nap̃eletia ni nap̃elekevatu ni shiip anoai maga: nalakena Yehovah e peani naviriana sikai Bosrah, go naatugiana warua sikai navanua ni Edom.

⁷Oks mila maga nara ma euga wo dowo, go kau natuna anoai maga go kau anoai matua maga; go navanua adeada ega wo matamaloku ki nada, go nam̃otam̃ota ni natano adeada ega wo pei tea mariana ega m̃anopunopu ki nap̃eletia.

⁸Ioro, ega wo pei naaleatia ni nasikoana ki Yehovah, natau ni nalagati‐pitua‐dip̃aana nalo ni Sion.

⁹Go nap̃ap̃a noaisara kakana maga euga wo panop̃ota po pei napulu, go nam̃otam̃ota ni natano kakana ega wo pei brimstone, go navanua kakana ega wo pei napulu waina e do soro.

¹⁰Ega wo da pei tea vuepunueana mau p̃ogi kite aleati; naasua kakana ega wo sake pa pa ega tu du po du mau du: pae tagona paki tagona ega wo maladi one; te naata ega wo da surata duaduru asa mau.

¹¹Ma ega wo pei agi pelekan go porkupaine; go tipaga go reven eroga wo doko asa doko: go Yehovah ega wo sai ki namea totowo ni navinovinoiana, go vatu rowogi ni nap̃aloana dap̃augoro e.

¹²Euga wo soso naatam̃oli vakilagi kakana maga paki namarakiana, ma euga wo dika; go tea maraki kakana maga mamau puti euga wo puoli.

¹³Go tea makalikali maga euga wo p̃otu sake nasum̃a ni p̃aaka kakana maga, nataputea vivitip̃a maga go tea vivitip̃a maga nasum̃a kasua kakana maga: go ega wo pei tokora tokoana ni koria mila maga, roara sikai ni ostris maga.

¹⁴Go nalo mila maga ni masop̃alo go wulf maga euga wo saisai tokora wanogoe, go naninani anoai ega wo pioso paki tana; io, tea mataukiana ni p̃ogi ega wo doko asa doko, po dum̃ana maneana pap̃ai tokora ni namaromaroana asa.

¹⁵Tokora wanogoe tipaga ega wo dum̃ana mari vetena asa, po darako, po dasasai, po piragi saisai ki natuna maga meluna: go tokora wanogoe voltur maga euga wo pei tea saisaikiana asa, tamatada sikasikai sarasara ra.

¹⁶Nagisada maga euga wo pei tea veveana tusi ki Yehovah: tea sikai kakada ega wo da puoli mau, go tea sikai kakada ega wo da dika ki tamatana mau: nalakena nawoka ni Yehovah e dautau sa asa, go Naatana e piragi saisai ki da.

¹⁷Go e madeada nadi ki gole, go nam̃elearuna e madeada dap̃otawotae a ki lain totowo: euga wo peanipioli ki nia pa pa ega tu du po du mau du, pae tagona paki tagona euga wo doko asa doko.