Read Nguna Togoa Etafe North ISA 35 Bible Online

ISA 35 - Nguna Togoa Etafe North bible

ISA 35

¹Masop̃alo go navanua ni nagaragaraana eroga wo laelaea; go maso maladi ega wo sokamidi, po pum̃a.

²Ega wo pum̃a p̃arua dakiusi rose, po laelaea ki nalaelaeaana go ki nalegaana; nasamasamaana ni Lebanon ega wo pei tea vituakiana paki nia, nawialuaana ni Karmel go ni Sharon: euga wo punusi nasamasamaana ki Yehovah, natatap̃auana ki Sup̃e anigida.

³Kuga mari nam̃elearu manainai maga euga kasua, go kuga mari nap̃atua vinavinauta maga euga lelete.

⁴Kuga noa ki tea maga waina nap̃op̃oda e sara, kuga naga, Kuga kasua, kuga ta mataku mau: kuga leo, Sup̃e animu ega wo umai ega vilake nasikoana, ega vilake navituadip̃aana ki Sup̃e; nae ega wo umai po mauti mu.

⁵Ragi wanogoe namata ni tea kesa maga euga leosai, go nadaliga ni tea p̃aro maga euga masai.

⁶Ragi wanogoe naatam̃oli vei pito ega wo sokamidi dakiusi hart sikai, go namena ni pusa ega wo lega: nalakena noai maga euga wo sara dave masop̃alo, go nap̃ap̃a noaisara maga, maso maladi.

⁷Go navanua garagara ega wo pei luku ni noai sikai, go navanua madou, namata noai maga: tokora tokoana ni koria mila maga, tokora waina eu one asa, ega wo pei napega sikai ni nam̃enau pilake nap̃araerae go natovatova.

⁸Go napua warua sikai ega wo doko tokora wanogoe, go ega wo pei tea sosoana ki Napua Tapu; tea waina e da dautau ega wo da surata asa mau; go tea vei lala maga euga wo da surata sasap̃o asa mau.

⁹Laion ega wo dika asa, go nalo tuavati vivikati ega wo da sake asa, euga wo da pei tea vap̃aiana asa mau; ma tea maga waina eu pei tea tauluaana euga wo surata asa:

¹⁰Go tea maga ki Yehovah waina naulu ni natauluaana e madeada pei tea vituakiana, euga wo liliu, po umai paki Sion pilake nalegaana; go nalaelaeaana waina e du mau du ega wo doko nap̃auda: euga wo dape nasamasamaana go nalaelaeaana, go narogokitesaana go nagiana eroga wo sava pano.