Read Nguna Togoa Etafe North ISA 36 Bible Online

ISA 36 - Nguna Togoa Etafe North bible

ISA 36

¹Go e pakilina natau rualima sikai tamate kevati ki nawota Hesekiah, naga Sennakerib nawota ni Assiria e sake umai dip̃a natokoana p̃aakagoroana maga mamau puti ni Yudah po puati ra.

²Go nawota ni Assiria e dip̃aki lua Rabshakeh nara ma taua warua sikai ni naatam̃oli navakalo, pae Lakish paki Yerusalem pano punusi nawota Hesekiah. Go e lawodu pisari napua ni noai ni namarourou ni elagi waina e doko napua warua ni vanua ki tea sarue maga.

³Go Eliakim natu ni Hilkiah, waina e pei tea tap̃au dap̃au tea ni nasum̃a, go Shebna tea midiri, go Yoah natu ni Asaf tea terausi, eu dave umai punusi a.

⁴Go Rabshakeh e noa ki da, e naga, Kuga noa ki Hesekiah, kuga naga, Nawota warua, nawota ni Assiria, e noa dapala nea, e naga, Seve navavatuana waia waina ku pavatu asa?

⁵Ku midoaki nia naga navasaana m̃oli maga eu p̃ia ki navakalo liu namidoaki‐p̃otae‐ana go nakasuaana, kite? Go ku do pavatu sei, naga ku mari p̃auluulu dip̃a au?

⁶P̃a leo, ku do pavatu tiko ni napati nau waina e pei wola, Ityipt nogo; waina naatam̃oli sikai e pe ovi a, e pe wo puri nam̃elearuna, po puri sai a: Faraoh nawota ni Ityipt e pei tea tapala nogoe paki tea maga mamau puti waina eu pavatu asa.

⁷Ma ku pe noa kinau naga, Au do pavatu Yehovah Sup̃e aginami: e pe ta pei nae waina tokora vakilagi aneana maga go wede ni naviriana aneana maga, Hesekiah e mari puoli ki da, po noa ki Yudah go ki Yerusalem, Kuga wo lotu narae ni wede ni naviriana waia, kite?

⁸Nalakena tea wanogoe, a pavara ni ko asa, p̃a vitua ki nanadisokiana maga paki nawota aginau, nawota ni Assiria, go aga wo dua ko horse manu dua, ku pe mariatae lawo ki tea sakesaake horse maga euga sakesaake ara.

⁹Go dapale sava ku mariatae doa liliua ki narae ni tea suasua maga ki nawota aginau tea sikai kakada, po lawo ki navavatuana anigo doko Ityipt raki kariot maga go raki tea sakesaake horse maga?

¹⁰Go kinau a po sake umai masale ki Yehovah dip̃a navanua waia naga aga mari sa ki nia, kite? Yehovah e noa kinau, e naga, P̃a sake pano dip̃a navanua wanogoe, po mari sa ki nia.

¹¹Go Eliakim go Shebna go Yoah eu noa ki Rabshakeh, eu naga, P̃a vasa paki tea suasua anigo maga pae masileo ni Siria, a pavara ni ko asa; nalakena au midoaki atae a: go p̃a ta pasa paki gami pae masileo ni Yudah mau, nadaliga ni narei waina eu doko p̃aaka.

¹²Ma Rabshakeh e noa ki da, e naga, Nawota aginau e dip̃aki lua au umai naga aga noa navasaana maga waia paki‐go go paki nawota anigo, kite? E da dip̃aki lua au umai naga aga vasa paki naatam̃oli maga waina eu sakesaake doko p̃aaka, waina eu pei tea tip̃akotoviana naga euga tum̃ada gani nataeda, go naga euga tum̃ada munu nameada, dakiusi mu, kite?

¹³Go Rabshakeh e lawodu, po pioso ki nadaleo kasua sikai pae masileo ni Yudah, po naga, Kuga rogo navasaana maga ki nawota warua, nawota ni Assiria.

¹⁴Nawota e noa dapala nea, e naga, Kuga ta suasua ki Hesekiah naga ega surue mu mau; nalakena ega wo da mariatae pualua mu mau:

¹⁵Go kuga ta suasua ki Hesekiah mau naga ega mari mu kuga vavatu Yehovah, doko do naga, Yehovah ega wo pualua gida; natokoana waia ega wo da pei tea vituakiana paki nam̃elearu ni nawota ni Assiria mau.

¹⁶Kuga ta daki dorogo paki Hesekiah mau: nalakena nawota ni Assiria e noa dapala nea, e naga, Kuga mari natam̃ateana paki nau, go kuga tave umai po sikoti au; go kuga wo dum̃amu gani tea ni vaine animu sara naata sikasikai kakamu, go tea ni nakau napuliva animu, go kuga wo dum̃amu munu noai maga m̃elu luku ni noai animu, sara naata sikasikai kakamu:

¹⁷Pa pa aga valoti po piragi lua mu pano paki navanua sikai waina e dakiusi navanua animu, navanua sikai ni korn go ni waine, navanua sikai ni navinaga go ni roara maga ni vaine.

¹⁸Kuga vavaigoro mase Hesekiah e pe surue mu, doko do naga, Yehovah ega wo pualua gida. Sup̃e maga ni nalauna maga te sikai kakada e pualua navanua aneana m̃elu dua ki nam̃elearu ni nawota ni Assiria, kite?

¹⁹Sup̃e maga ni Hamath go ni Arpad wai? Sup̃e maga ni Sefarvaim wai? Go nara eu pualua Samaria m̃elu dua ki nam̃elearugu, kite?

²⁰Sei maga ni sup̃e maga mamau puti ni navanua maga, waina eu dum̃ada pualua navanua adeada m̃elu dua ki nam̃elearugu, naga Yehovah e pe wo pualua Yerusalem m̃elu dua ki nam̃elearugu?

²¹Ma eu punuta doko, po da pasadara e ki te navasaana sikai mau: nalakena natip̃akiana ki nawota e pei tea waia, e naga, Kuga ta pasadara e mau.

²²Go Eliakim natu ni Hilkiah, waina e pei tea tap̃au dap̃au tea ni nasum̃a, go Shebna tea midiri, go Yoah natu ni Asaf tea terausi, eu rumai punusi Hesekiah, sugoro adeada maga eu pei tea vuap̃oraeana, go eu noa ki nia ki navasaana maga ki Rabshakeh.