Read Nguna Togoa Etafe North ISA 38 Bible Online

ISA 38 - Nguna Togoa Etafe North bible

ISA 38

¹Naaleatia maga wanogoe Hesekiah e sasana p̃arua dapala ega mate. Go profeta Isaiah natu ni Amos e umai punusi a, po noa ki nia, e naga, Yehovah e noa dapala nea, e naga, P̃a p̃oroa ki nasum̃a anigo; nalakena p̃a wo mate, po da mauri mau.

²Go Hesekiah e doa naraena paki naravita, po dapasavasa paki Yehovah,

³Po naga, P̃a midoa ki parati ki, Yehovah O, a pavara ni ko asa, naga a surata naraem̃a doko nalomauana go ki p̃op̃o wialua sikai, go a mari tea waina e p̃ia namatam̃a.

⁴Go Hesekiah a dagi p̃arua. Go navasaana ki Yehovah e umai paki Isaiah,

⁵e naga, P̃a vano, po noa ki Hesekiah naga, Yehovah, Sup̃e ki tamam̃a David, e noa dapala nea, e naga, A dogo natapasavasaana anigo, a punusi maririmatam̃a maga: p̃a leo, aga wo sokari naaleatia anigo maga ki natau rualima sikai tamate lima.

⁶Go aga wo pualua ko go natokoana wanogoe m̃elu dua ki nam̃elearu ni nawota ni Assiria: go aga wo p̃alugoro natokoana wanogoe.

⁷Go tea waia ega wo manigo pei navaivaiana kakana m̃elu Yehovah, naga Yehovah ega wo mari tea waina e noa e:

⁸P̃a leo, aga wo mari elo ega moro liliu, go melu ega moro puru navasiana rualima sikai doko tea vavadu maga ki Ahas. Go dapala nogoe elo e moro liliu, go melu e moro puru navasiana rualima sikai.

⁹Namidiriana ki Hesekiah nawota ni Yudah waina e midiri a ragi waina e sasana, po moro dogokitep̃ia m̃elu dua ki nasasanaana aneana.

¹⁰A naga, M̃aleoputo ni naaleatia aginau maga, Aga wo sili namata‐pua maga ni Sheol: Namagovai ni natau aginau maga, Eu pei tea tapeluaana kiagu.

¹¹A naga, Aga wo da punusi Yehovah, Navanua ki tea mauri maga mau: Aga wo da moro leo punusi naatam̃oli mau, Sikoti naatatoko maga ni maramana.

¹²Namauriana aginau e pei tea tapeluaana kiagu, E pei tea rakaiana dapala tap̃aup̃au sikai ki tea leo parati ki shiip: Ku lulukigoro namauriana aginau Dakiusi tea vausi nakulukulu sikai; Ku daelua au pa dua ki lum: Namawota ni malip̃ogi go ni ragi melu, P̃a wo paka sikai mari puoli kinau.

¹³A kuapioso raki nasilaeana pa pa paki malip̃ogi; Dakiusi laion sikai, e marip̃oriwori navatugu maga mamau puti: Namawota ni malip̃ogi go ni ragi melu, P̃a wo paka sikai mari puoli kinau.

¹⁴Nagiana aginau e dakiusi nakaiana ni manu kapataika; A mua dakiusi tokopea sikai: Namatagu ero sirinopu ki naleopakilagiana; Yehovah O, kinau a pei tea riesokiana, pa tu oli au.

¹⁵Aga wo noa nasava? Nae e pasa paki nau, go e dum̃ana mari a: Namaturuana mamau aginau e sava dua kinau pano, Nalakena nakokonaana ni naatagu.

¹⁶Yehovah O, naaleatia maga ni namauriana aginau eu doko sikoti ko, Namauriana ni naatagu e pei tea anigo sikim̃a, Nalakena tea wanogoe p̃a vakamauri au, P̃a mari au aga mauri.

¹⁷P̃a leo, e pei raki nawiaana aginau, Naga a sua narogokitesaana warua: Ma nigo ku pua liliua ki namauriana aginau, Pa dua ki m̃orutano ni namarisakiana; Nalakena ku nadi ki namarinaleosaana aginau maga mamau puti paki natakum̃a.

¹⁸Nalakena Sheol e mari sa samasama ni ko, Namateana e mari sa dodomadagani ko: Tea maga waina eu siwo paki m̃orutano pano, Eu mari sa leogoro nalomauana anigo.

¹⁹Tea mauri, tea mauri, ega wo samasama ni ko, Dakiusi waina kinau a do mari a naaleatia waia: Tamana ega wo mari nalomauana anigo, Ega vei tea ataeana paki natuna maga.

²⁰Yehovah ega wo mauti au: Nalakena tea wanogoe tuga wo lega nalegaana aginau maga, Ega vilake nagalo ni roroaleo maga, Sara naaleatia ni namauriana anigida, Ekopu ni nasum̃a ki Yehovah.

²¹Go Isaiah e naga, Euga tape keke sikai ni napuliva, po pulutigoro topu asa, go ega wo moro mauri.

²²Go Hesekiah e naga, Nasava e pei navaivaiana naga aga wo sake pano paki nasum̃a ki Yehovah?