Read Nguna Togoa Etafe North ISA 39 Bible Online

ISA 39 - Nguna Togoa Etafe North bible

ISA 39

¹Doko ragi wanogoe Merodakbaladan, natu ni Baladan, nawota ni Babelon, e dip̃aki lua tea tautauana maga pilake tusi midiriana maga go navituaana sikai pano punusi Hesekiah: nalakena e dogo naga e sasana, ma e moro dogokitep̃ia.

²Go Hesekiah e laelaea punusi ra; go e pisei ki da nasum̃a ni naleo wia masauniana aneana maga, silver, go kold, go tea ni nap̃o wia, go naroro wia liu, go nasum̃a mamau ni nalikau aneana maga, go tea mamau puti waina eu pei tea vap̃aiana doko nasum̃a ni naleo wia masauniana aneana maga: te navatuna e dika nasum̃a aneana, kite namarakiana aneana mamau puti, waina Hesekiah e da pisei ki da asa mau.

³Go profeta Isaiah e umai punusi Hesekiah, po noa ki nia, e naga, Naatam̃oli maga wanogoe eu noa nasava? Go eu pae esava umai punusi ko? Go Hesekiah e naga, Eu pae navanua sikai ni uvea umai punusi au, pae Babelon nogo.

⁴Go e naga, Eu punusi nasava waina e doko ekopu ni nasum̃a anigo? Go Hesekiah e pasadara, po naga, Tea mamau puti waina e doko ekopu ni nasum̃a aginau, eu punusi sua e: te navatuna ni naleo wia masauniana aginau maga e dika waina a da pisei ki da asa mau.

⁵Go Isaiah e noa ki Hesekiah, e naga, P̃a rogo navasaana ki Yehovah ki taua maga.

⁶Yehovah e naga, P̃a leo, naaleatia maga euga wo umai, ragi waina tea mamau puti waina eu doko ekopu ni nasum̃a anigo, go tea waina tamam̃a maga eu daua ki nia pa pa paki naaleatia waia, euga wo pei tea vuti‐lua‐pavakotoana paki Babelon pano: te navatuna ega wo da pei tea toropusiana ega toko mau.

⁷Go natum̃a naanoai maga waina euga wo m̃elu ako, waina p̃a wo pesi ra, seara kakada euga wo pei tea viragi‐lua‐pavakotoana pano; go euga wo pei atavau maga nasum̃a ni navei‐nawota‐ana ki nawota ni Babelon.

⁸Go Hesekiah e noa ki Isaiah, e naga, Navasaana ki Yehovah waina ku noa e, e p̃ia. Go e moro naga, Nalakena natam̃ateana go nalomauana eroga wo doko naaleatia aginau maga.