Read Nguna Togoa Etafe North ISA 4 Bible Online

ISA 4 - Nguna Togoa Etafe North bible

ISA 4

¹Go naaleatia wanogoe nagoroi larua euga wo puasoki naanoai sikai maau, po naga, Auga wo gani navinaga aginami, po suni tea suniana aginami maga: ma p̃a suasua ki gami naga auga vei tea sosoana ki nagisam̃a; p̃a tape lua navasapinoa‐ki‐gami‐ana pano.

²Naaleatia wanogoe ara ni Yehovah ega wo siria po pum̃a, go navanua ega wo pitua ki p̃arua ki nawa wialua agi Israel natuna maga waina euga wo mauri doko.

³Go ega wo pakilina naga tea waina e pei tea toropusiana doko Sion, go tea waina e ko mauri doko Yerusalem, tea mamau puti ni Yerusalem waina nagisada eu pei tea midiriana tusi ni tea mauri maga, euga wo pei tea sosoana ki tea tapu;

⁴Ragi waina Yehovah ega wo sarue lua naloaana ki Sion natuna nagoroi maga, go ragi waina ega wo mari dautau ki nada ni Yerusalem m̃elu dua ki m̃aleoputo kakana, ki naatana ni navasap̃otaeana, go ki naatana ni natap̃arakiana.

⁵Ragi wanogoe Yehovah ega wo pakilina po dap̃augoro tokora tokoana mamau ni tava Sion, po dap̃augoro nasaisaiana aneana maga, ega wo doko napopouru lawodu aleati, go namarama ni nakapu vavaga p̃ogi: go nasamasamaniana ni Yehovah ega wo dap̃augoro puti ra.

⁶Go ega wo pei tap̃aup̃au sikai naga ega vei melu sikai ragi ni sui ni aleati, go ega vei tokora ni nasavasiliana go tokora ni natokolokuana ragi ni nalagi atu go ni usa.