Read Nguna Togoa Etafe North ISA 40 Bible Online

ISA 40 - Nguna Togoa Etafe North bible

ISA 40

¹Kuga vakavakale, kuga vakavakale narei aginau, Sup̃e animu e noa e.

²Kuga vasa dodomi Yerusalem, po dogorogo paki nia, naga namarinavakaloana aneana e po nopu, naga namarinaleotageleana aneana e po pei tea midoakikorokoroana; naga e dape ki nam̃elearu ni Yehovah paka rua dip̃a namarinaleosaana aneana maga mamau puti.

³Nadaleo ni tea sikai waina e do pioso, po naga, Kuga magi Yehovah mari m̃ata ki napua aneana masop̃alo, kuga magi Sup̃e anigida mari leana ki napua lapa aneana maso maladi.

⁴Sara nap̃aloa euga wo pei tea sikeana pakilagi, go sara tava warua go tava sula euga wo pei tea mariana euga vakitano: go p̃alup̃alua maga euga wo pei tea vakavuroana, go tokora ragoragoa maga euga wo pei tea mariana euga wo m̃om̃oa:

⁵Go nasamasamaana ni Yehovah ega wo dokolina, go sara nap̃okasi euga wo mamau puti punusi a: nalakena nawoka ni Yehovah e noa sua e.

⁶Nadaleo ni tea sikai e naga, P̃a vioso, Go a noa naga, Aga vioso noa nasava? Sara nap̃okasi eu pei nam̃enau, go sara nasamasamaana kakana e dapala napum̃a ni vanua:

⁷Nam̃enau e kokolo, napum̃ana e pevera; nalakena Namero ni Yehovah e sui a: lomau narei eu pei nam̃enau.

⁸Nam̃enau e kokolo, napum̃ana e pevera: ma navasaana ki Sup̃e anigida e doko mau doko pa pa po du mau du.

⁹Sion O, tea rogorogo ki narogorogoana wia maga, p̃a sake paki tava vakilagi pano; Yerusalem O, tea rogorogo ki narogorogoana wia maga, p̃a sike nadaleom̃a ki nakasuaana; p̃a sike a, p̃a ta mataku mau; p̃a noa ki natokoana maga ni Yudah, p̃a naga, Kuga leo, Sup̃e animu!

¹⁰Kuga leo, Yehovah Sup̃e ega wo umai pilake navei‐nawota‐ana, go naruna ega wo maneana maramara; kuga leo, e pilake namoriana aneana, go navituadip̃aana aneana e doko kivea ki nia.

¹¹Ega wo pagani navata aneana dakiusi tea leo parati ki sikai, ega wo saisai ki shiip natuna maga doko naruna, po dape ra doko narum̃ana, ega wo maraki matemate ki tea maga waina eu do pitua ki susu.

¹²Sei e dowogi noai maga nawoka ni nam̃elearuna, po dowogi nakoroatelagi ki nakinina, po atae parati ki nam̃otam̃ota ni natano ki lasa rowogi sikai, po dowogi tava warua maga ki lasa rowogi maga, go tava sula maga ki lasa totowo sikai?

¹³Sei e atae namidodoana ki Yehovah? Kite sei e pei tea vusum̃aki aneana, go e do pasa pisei ki nia?

¹⁴E pusum̃aki paki sei, go sei e dapavanau sa, po pisei ki nia napua ni naleanaana, po pasa pisei ki nia naataeana, po digi pisei ki nia napua ni namidoakiataeana?

¹⁵Kuga leo, nalauna maga eu dapala natuturu sikai m̃elu lasa vautu sikai, go eu pei tea mikoakiana naga eu dapala nam̃otam̃ota kirikiri ni lasa totowo: kuga leo, e dape dakati naureure maga dapala eu pe vei naleo kiki sa sikai.

¹⁶Go Lebanon e da pataka naga ega vei natap̃arakiana, go nalo tuavati kakana maga eu da pataka ni navituaana tap̃arakiana sikai mau.

¹⁷Nalauna maga mamau puti eu dapala naleo m̃oli naraena; eu pei tea midoakiana pae asa naga eu pei tea m̃oli go eu pei naleo p̃alo.

¹⁸Go kuga wo noa naga Sup̃e e dakiusi sei? Kite seve natakiusiana kuga wo noa naga ero pitotowo?

¹⁹Nasup̃e taeana, naatam̃oli wosiwosi sikai e peni a, go mataisau ni kold e pulutigoro e ki kold, go e peni namori ni silver kakana.

²⁰Tea waina e pei tea tika dapala waina e da mariatae mari naviriana sikai dapalana, e matadoa nakau sikai waina ega wo da madada mau; e dum̃ana laaga naatam̃oli wosiwosi atae p̃ia sikai waina ega maneana sike lawo ki nasup̃e taeana sikai, waina ega wo da parivari mau.

²¹Ku da atae mau, kite? Ku da pea dogo e mau, kite? E da pei tea noaana paki mu pae ragi ni naatulakeana mau, kite? Ku da pea midoaki atae a pae ragi ni nanadi‐ki‐laketanoana ni maramana mau, kite?

²²E pei nae waina e sakesaake doko nataliviriana ni maramana, go naatatoko kakana maga eu dakiusi midiri maga; e pei nae waina e sai ki nakoroatelagi maga dakiusi tea taugoro‐p̃otae sikai, po pitosi ra dakiusi tap̃aup̃au sikai naga euga toko asa:

²³E pei nae waina e mari tea maraki maga eu pei tea m̃oli; e mari tea vasap̃otae maga ni maramana eu pei tea p̃alo.

²⁴Io, eu da pei tea lawoana mau; go eu da pei tea sapurakiana mau; nalakeda eu da sai ki nakoada paki natano mau; go e sui ra, go eu kokolo, go suitaviro e dape lua ra pano dapala nap̃olaga.

²⁵Go kuga wo noa naga kinau a dakiusi sei, naga aro pitotowo ma nae? Tea Tapu e noa e.

²⁶Kuga sike namatamu pakilagi, po leo punusi; sei e dawona ki naleo maga waia, waina e piragi lua taua adeada pae naveveana: e soso ra tea mamau puti ki nagisada; pae nawaruaana ni namarimatuaana aneana, go nalakena nakasuaana ni navei‐nawota‐ana aneana, tea sikai e da puoli mau.

²⁷Yakob O, ekasana ku pasa, go Israel O, ekasana ku noa naga, Napua aginau e pei tea tasurukiana paki Yehovah, go naleanaana aginau e puoli ki Sup̃e aginau?

²⁸Ku da atae a mau, kite? Ku da dogo e mau, kite? Supe Vatoko, Yehovah, Tea Tawonaki namatap̃ago maga ni maramana, e da do manainai mau, go e da do mawosa mau; namidoakiusiusiana ni namidoakiataeana aneana e pei tea leousiusi‐sap̃oana.

²⁹E do pitua ki namarimatuaana paki tea manainai; go paki tea waina e dika nakasuaana, e madeada pitua ki nakasuaana.

³⁰Natureai maga euga wo manainai po mawosa, go naatam̃oli kasua maga euga wo dapilagona po dowo:

³¹Ma tea maga waina eu do leogoro Yehovah, euga wo dape nakasuaana vau; euga wo diri sake ki nalivaruda maga dapala ikila maga; euga wo sava, po da mawosa mau; euga wo surata po da manainai mau.