Read Nguna Togoa Etafe North ISA 41 Bible Online

ISA 41 - Nguna Togoa Etafe North bible

ISA 41

¹Kuga vunuta naraegu, naureure maga O; go nalauna maga euga mari pau ki nakasuaana adeada: euga umai paki m̃aladigi; go euga vasa: tuga mamau puti umai paki m̃aladigi raki navasap̃otaeana.

²Sei e pulevule tea sikai m̃elu ist, waina e soso e umai paki natuana doko naleanaana? E pitua ki nalauna maga naraena, po mari a e pei tea maramara dap̃au nawota maga; e pitua ki da paki lova aneana dapala nam̃otam̃ota, go paki naasu aneana dapala nap̃olaga waina e pei tea sui‐pulua‐kiana.

³E kopasi lua ra, po pano doko namautiana; natuana maga ero da kisidogo natano mau.

⁴Sei e p̃osiwosi ki nia po mari a, doko do soso tagona maga pae naatulakeana? Kinau, Yehovah, tea vea go tea edaku, kinau a pei nae.

⁵Naureure maga eu punusi, po mataku; namatap̃ago maga ni maramana eu duruuru: eu disu paki m̃aladigi, po umai.

⁶Eu dum̃ada silae ra, sara naata sikasikai ki tea ni m̃aladigi ki nia; go sara naata e noa ki taina, e naga, P̃a viviari.

⁷Dapala nogoe mataisau e pasasoki mataisau ni kold, go tea waina e p̃okawoka ki hammer, ki tea waina e do atugi airon silaesoki, doko do noa nalo ni navulutiana ni natasokotakiana naga, E pei tea wia: go e durisoki a ki tea turituri maga, naga ega ta parivari mau.

⁸Ma nigo Israel, tea suasua aginau, Yakob waina a matadoa ko, nawora ni tagu Abraham;

⁹Nigo waina a piragi lua ko pae namatap̃ago maga ni maramana, po soso ko m̃elu naweluki kakana maga umai, po noa ki‐go naga, Nigo ku pei tea suasua aginau, a po matadoa ko po da dip̃adoa ki‐go mau;

¹⁰P̃a ta mataku mau, nalakena kinau a sikoti ko doko; p̃a ta m̃anaunau mau, nalakena kinau a pei Sup̃e anigo: aga wo mari ko p̃a wo kasua; aga wo silae ko; io, aga wo silae ko ki nam̃elearu ni matua ni namarinaleoleanaana aginau.

¹¹P̃a leo, tea maga mamau puti waina eu kokona ki‐go euga wo maliere po pinovinoi: tea maga waina eu mari kasua ki‐go euga wo dakiusi naleo p̃alo, po pano puoli.

¹²P̃a wo laaga tea maga waina eu pululu ki‐go, ma p̃a wo da pap̃ai ra mau: tea maga waina eu mari navakalo dip̃a ko euga wo da pei te navatuna mau, go euga wo dapala naleo p̃alo sikai.

¹³Nalakena kinau Yehovah Sup̃e anigo aga wo puasoki nam̃elearum̃a ni matua, po noa ki‐go naga, P̃a ta mataku mau; aga wo silae ko.

¹⁴P̃a ta mataku mau, nigo asulati Yakob, go nimu naatam̃oli maga ni Israel; aga wo silae ko, Yehovah e noa e, go tea taulua ko e pei Tea Tapu ki Israel.

¹⁵P̃a leo, aga wo mari ko p̃a vei tea wokalesue makali vau sikai waina ega vilake napatina maga: p̃a wo p̃oka lesue tava warua maga, po p̃oka‐p̃oroworosi ra, go p̃a wo mari tava sula maga euga tapala nap̃olaga.

¹⁶P̃a wo nive ra, go nalagi ega wo sui pulua ki da pano, go suitaviro ega wo daperavera ki da: go p̃a wo laelaea Yehovah, p̃a wo samasama ni Tea Tapu ki Israel.

¹⁷Tea rogokitesa go tea tika eroga wo laaga noai go ega wo dika, go nam̃enada ega wo garagara ki namadouana; kinau Yehovah aga wo pasadara ra, kinau Sup̃e ki Israel aga wo da doropusi ra mau.

¹⁸Aga wo p̃olagati noaisara maga doko tokora vakilagi maga, go namata noai maga m̃aleoputo ni nap̃aloa maga: aga wo mari masop̃alo ega vei namarourou ni noai sikai, go natano garagara ega vei namata noai putaputa maga ki noai.

¹⁹Aga wo lawo sidar masop̃alo, go nakau akasia, go nasara, go nakau oliva; aga wo lawo nearu maso maladi, go paine, go saipres, euga mamau:

²⁰Naga euga vunusi po atae, po midoakiusiusi, po mamau puti atae p̃otae naga nam̃elearu ni Yehovah e mari tea wanogoe, go naga Tea Tapu ki Israel e mari dawona ki nia.

²¹Kuga noa pakasa ki navululuana animu, Yehovah e noa e; kuga noakisai tea maga waina nap̃op̃omu e midoakisoki ra, Nawota ki Yakob e noa e.

²²Euga noasai ra, po noakisai gami ki tea waina ega wo pakilina: kuga noakisai gami naleo vea maga eu pei nasava, naga auga midoakiusiusi ra, po atae namatap̃ago edaku kakada; kite kuga visei ki gami tea waina ega wo umai.

²³Kuga rogorogo ki tea waina ega wo edaku umai, naga auga atae naga nimu ku pei sup̃e maga: io, kuga mari nawiaana kite nasaana, naga auga m̃anaunau, po mataku p̃arua.

²⁴Kuga leo, nimu ku pei naleo m̃oli, go nawosiana animu e pei tea p̃alo: tea waina e matadoa mu e pei tea mamaragokiana sikai.

²⁵A pulevule tea sikai m̃elu north, go e po umai; pae taleva ni elo sake, nae ega wo soso nagisagu; go nae ega wo pasi puludoa tea maramara maga dapala natano m̃edam̃eda, go dapala tea mari lasa ni naruku e do pasi puludoa naruku.

²⁶Sei e dogorogo ki nia pae naatulakeana, naga tuga atae a? Go pae ragi vea mau, naga tuga noa naga, Nae e leana? Io, te naata e da noakisai a mau, te naata e da dogorogo ki nia mau, io, te naata e da dogo navasaana anigo maga mau.

²⁷Kinau a pea noasai a paki Sion, go aga wo dua Yerusalem tea rogorogo sikai ni narogorogoana wia maga.

²⁸Go a leo, ma naatam̃oli e dika; tea vusum̃aki sikai e da doko m̃aleoputo kakada mau, waina e mariatae pasadara au te navasaana sikai, ragi waina a pe vusuusu.

²⁹Kuga leo, eu mamau puti pei tea p̃alo nawosiana adeada maga, eu pei tea m̃oli: nasup̃e takiana adeada maga eu pei nalagi po pinovinoi.