Read Nguna Togoa Etafe North ISA 42 Bible Online

ISA 42 - Nguna Togoa Etafe North bible

ISA 42

¹Kuga leo, tea suasua aginau, waina a do silae a; tea matadoaana aginau waina a maro asa: a po doro naatagu e doko asa; nae ega wo magi nalauna p̃ota maga mari naleanaana.

²Ega wo da pioso, kite sike nadaleona mau, kite mari a ega vei tea rogoana napua ni natokoana mau.

³Napati nau sikai waina e pei wola, nae ega wo da p̃ori a mau, go wik sikai waina e do asua, nae ega wo da sui punue a mau: ega wo mari naleanaana doko naveilomauana.

⁴Ega wo da dowo kite dodosua, pa pa ega wo lawo‐ki‐laketoko naleanaana maramana; go naureure maga euga wo leogoro nawotaeana aneana.

⁵Yehovah Sup̃e, nae waina e mari dawona ki nakoroatelagi maga, po pitosi ra pano; nae waina e p̃elesa ki maramana go tea waina e dave m̃elu asa; nae waina e pitua ki namero paki naatam̃oli maga waina eu doko asa, go naatana paki tea maga waina eu do surata usuraki asa: nae e noa dapala nea, e naga:

⁶Kinau Yehovah a po soso ko doko namarinaleoleanaana, go aga wo puasoki nam̃elearum̃a, po pavaigoro ko, po pitua ki‐go p̃a vei navasasokiana sikai agi naatam̃oli maga, namarama sikai agi nalauna p̃ota maga;

⁷Naga p̃a wolagati namata ni tea kesa maga, naga p̃a viragi lua tea soliana maga m̃elu dua ki m̃orutano, go tea maga waina eu doko namaligo doko, m̃elu dua ki nasum̃a ni navavaigoroana.

⁸Kinau a pei Yehovah; e pei nagisagu: go nasamasamaana aginau aga wo da dua tea p̃ota asa mau, go nasamasamaniana aginau aga wo da dua nasup̃e taeana maga asa mau.

⁹Kuga leo, naleo vea maga eu po pakilina, go naleo vau maga a do dogorogo ki da: ragi waina eu ko da pisou mau, ma a noakisai mu ara.

¹⁰Kuga lega ki Yehovah nalegaana vau sikai, po samasama ni a pae namatap̃ago ni maramana; natasi ega saruru, go navuraana kakana, naureure maga, go naatatoko kakada maga.

¹¹Masop̃alo go natokoana kakana maga euga sike nadaleoda, go natokoana kiki maga waina Kedar eu doko ara; naka ni Sela euga lega, euga rarasa pae nam̃asua ni tava maga.

¹²Euga tua Yehovah nasamasamaana, po dogorogo ki nasamasamani‐a‐ana doko naureure maga.

¹³Yehovah ega wo dave pano dakiusi m̃aau sikai; ega wo dum̃ana pulevule namaritausuana aneana dakiusi naatam̃oli sikai ni navakalo: ega wo pioso, io, ega wo pioso kasua; ega wo dum̃ana pisei ki nakasuaana aneana dip̃a tea kokona ki nia maga.

¹⁴A punuta doko ragi varau sa; a doko dorogo, po dum̃agu soki au doko: ragi waia aga wo pioso dakiusi nagoroi visola sikai; aga wo paka sikai dinomi po mari puoli ki.

¹⁵Aga wo mari sa sa ki tava warua maga go tava sula maga, po mari nataputea kakada maga euga kokolo; aga wo mari noaisara maga euga vei naureure maga, po mari luku noai maga euga garagara.

¹⁶Go aga wo piragi tea kesa maga pae tokora sikai waina eu da pea atae a mau; aga wo maraki ra pae napua maga waina eu da pea atae ra mau: aga wo doa namaligo ega vei namarama kivea ki da, go malo ragoragoa maga euga vei natano matemate. Naleo maga wanogoe aga wo mari ra, go aga wo da doropusi ra mau.

¹⁷Tea maga waina eu do pavatu nasup̃e taeana maga, po do noa ki nasup̃e takiana maga naga, Nimu ku pei sup̃e aginami maga; nara euga wo pinovinoi po maliere ki namaliereana warua.

¹⁸Kuga rogo, tea vei p̃aro maga; go kuga leo, nimu tea vei kesa maga, naga kuga leosai.

¹⁹Sei e pei kesa, ma tea suasua aginau? Kite tea vei p̃aro, dakiusi tea tautauana aginau waina a dip̃aki lua e? Sei e pei kesa dakiusi tea tapugoroana aginau, kite e pei kesa dakiusi tea suasua ki Yehovah?

²⁰Ku punusi naleo laapa, ma ku da leo atae ra mau; nadaligam̃a ero masai, ma ku da dogo mau.

²¹Yehovah e pei tea midoaki m̃ataki, nalakena namarinaleoleanaana aneana, naga ega samasama ni nawotaeana aneana, po mari a ega vei tea dodomadaganiana.

²²Ma narei waia eu pei tea tapepavakotoana po pei tea vuti‐lua‐pavakotoana; eu mamau puti pei tea soliana m̃orutano maga, go eu pei tea tasurukiana nasum̃a maga ni navavaigoroana: eu pei tea tapepavakotoana sikai, go tea vualua ra e dika; eu pei tea vuti‐luapavakotoana sikai, go te naata e da doko mau waina ega noa, Kuga viragi liliua ki nia.

²³Sei kakamu ega wo daki nadaligana paki tea wanogoe? Sei ega wo daki dorogo po dogo ragi maga waina euga wo umai?

²⁴Sei e pitua ki Yakob paki tea vutilua‐pavakoto, go Israel paki tea tape‐pavakoto maga? E da pei Yehovah mau, waina tu mari naleo sa dip̃a e, kite? Nalakena eu karai surata napua aneana maga, go eu da dogo parati ki nawotaeana aneana mau.

²⁵Nalakena tea wanogoe e daki navivitinuana ni namaetoana aneana, go nakasuaana ni navakalo e lawo ki nia; go e soro dalivirigoro e, ma e da atae a mau; go e dap̃ara ki nia, ma e da midoa ki nia nap̃op̃ona mau.