Read Nguna Togoa Etafe North ISA 43 Bible Online

ISA 43 - Nguna Togoa Etafe North bible

ISA 43

¹Ma ragi waia Yehovah waina e dawona ki‐go Yakob O, go waina e mari dawona ki‐go Israel O, e noa dapala nea, e naga, P̃a ta mataku mau, nalakena a po daulua ko; a po soso ko pae nagisam̃a, ku pei tea aginau.

²Ragi waina p̃a vaki noai maga, aga wo sikoti ko; go ragi waina p̃a vaki noaisara maga, euga wo da dap̃augoro ko mau: ragi waina p̃a surata nakapu, p̃a wo da aso mau, go mena ni nakapu ega wo da gani puoli ki‐go mau.

³Nalakena kinau a pei Yehovah Sup̃e anigo, Tea Tapu ki Israel, tea mautipauri ko; a pitua ki Ityipt e pei naulu ni natauluaana anigo, Ethiopia go Seba ero oli ko.

⁴Nalakena ku madaga namatagu, ku pei tea dodomadaganiana, go a dodomi ko; nalakena tea wanogoe aga wo pitua ki naatam̃oli maga euga oli ko, go nalauna maga raki namauriana anigo.

⁵P̃a ta mataku mau; nalakena kinau a sikoti ko doko: aga wo piragi naworaworam̃a m̃elu ist umai, po piragi saisai ki‐go m̃elu west;

⁶Aga wo noa ki north, P̃a vitua; go paki sauth, P̃a ta mauti mau; p̃a viragi natugu naanoai maga pae uvea umai, go natugu nagoroi maga pae namatap̃ago ni maramana;

⁷Sara naata waina e pei tea sosoana pae nagisagu, go waina a dawona ki nia paki nasamasamaana aginau; kinau a mari dawona ki nia; io, kinau a mari a.

⁸P̃a viragi umai naatam̃oli maga waina eu kesa ma eu pilake namatada, go tea maga waina eu p̃aro ma eu pilake nadaligada.

⁹Nalauna maga mamau puti euga vei tea viragisaisai‐kiana, go narei maga euga saisai: sei kakada e mariatae dogorogo ki tea wanogoe, po pisei ki gida naleo tuai maga? Euga viragi tea noasokisoki adeada maga umai naga euga vei tea mari‐leana‐kiana, kite euga rogo, po noa naga, E pei lomau.

¹⁰Nimu ku pei tea noasokisoki aginau maga, Yehovah e noa e, go tea suasua aginau maga waina a matadoa mu, naga kuga atae po saralomau au, po midoaki atae naga kinau a pei nae. Sup̃e sikai waina e pei tea mari‐dawona‐kiana pea kinau e dika, go ega wo moro dika edakugoro au.

¹¹Kinau, kinau a pei Yehovah; go tea maumau pauri p̃ota sikai e dika, ma kinau a sikigu.

¹²Kinau a peanoasai po mautipauri po dogorogo, ragi waina sup̃e p̃ota sikai e dika m̃aleoputo kakamu; nalakena tea wanogoe ku pei tea noasokisoki aginau maga, Yehovah e noa e, go kinau a pei Sup̃e.

¹³Go pae ragi vea mau, kinau a pei nae; go tea waina ega vualua m̃elu dua ki nam̃elearugu e dika: aga wo mari nawosiana, go sei ega roa e?

¹⁴Yehovah, Tea Taulua mu, Tea Tapu ki Israel, e noa dapala nea, e naga, Nalakena nimu kinau a dip̃aki lua paki Babelon, go aga wo mari kotokotovi tea walagoto maga mamau puti, go nararasaana ki naka ni Kaldea ega wo pei nalalagaarovaana.

¹⁵Kinau a pei Yehovah, Tea Tapu animu, Tea Tawona ki Israel, Nawota animu.

¹⁶Yehovah e noa dapala nea, nae waina e dawona ki napua sikai doko natasi, go napuausiana sikai doko noai warua maga;

¹⁷Nae waina e piragi lua kariot go horse, taua navakalo, go m̃aau maga; eu mamau puti dowo one, euga wo da moro duleana mau; eu mavunuvunu, eu pei tea vue‐punueana dapala wik sikai:

¹⁸Nae e naga, Kuga ta midoaki parati ki naleo vea maga mau, kite midoakiusiusi naleo tuai maga mau.

¹⁹Kuga leo, aga wo mari naleo vau sikai; ega wo pisou ragi waia; ku da leo atae a, kite? Aga wo mari napua sikai masop̃alo, go noaisara maga doko maso maladi.

²⁰Nalo mila maga ni namalasi, go koria mila maga go ostris maga, euga wo samasama ni au; nalakena a pitua ki noai maga masop̃alo, go noaisara maga doko maso maladi, naga aga tua narei aginau, tea matadoaana aginau, namunuana:

²¹Narei waina a dum̃agu maginau mari dawona ki da, naga euga rogorogo ki nasamasamaana aginau.

²²Ma ku da pioso paki nau mau, Yakob O; go ku mawosa kinau, Israel O.

²³Ku da maginau dape shiip natuna anigo maga umai naga euga vei navituaana tap̃arakiana maga mau; kite dodomadagani au ki naviriana anigo maga mau. Kinau a da pei tea madaga one ako nalo ni navituaana maga mau, kite mari ko ku mawosa nalo ni tea ni nap̃o wia mau.

²⁴Ku da maginau pakotovi kalamo lolo ki m̃ane mau, kite mari au a puka ki nam̃aladua ni naviriana anigo maga mau: ma ku pei tea madaga one au nalo ni namarinaleosaana anigo maga, go ku mari au a mawosa ki namarinaleotageleana anigo maga.

²⁵Ma kinau, kinau a pei nae waina a kasi lua natapiriana anigo maga, nalakena nagisagu; go aga wo da midoaki parati ki namarinaleosaana anigo maga mau.

²⁶P̃a mari au aga midoaki parati ki; toroga rua mari navululuana: p̃a noasai navululuana anigo, naga p̃a vei tea mari‐leanakiana.

²⁷Tamam̃a vea e mari naleo sa, go tea tu namawota anigo maga eu dapiri dip̃a au.

²⁸Nalakena tea wanogoe a mari tea maraki maga ni tokora tapu eu pei tea p̃alo, go a mari Yakob e pei navasadaoana sikai, go Israel navasapinoakiana sikai.