Read Nguna Togoa Etafe North ISA 44 Bible Online

ISA 44 - Nguna Togoa Etafe North bible

ISA 44

¹Ma ragi waia p̃a taki dorogo, Yakob, tea suasua aginau O; go nigo Israel waina a matadoa ko:

²Yehovah waina e dawona ki‐go, po mari dawona ki‐go pae nap̃ele ni p̃ilam̃a, waina ega wo silae ko, e noa dapala nea, e naga, P̃a ta mataku mau, Yakob tea suasua aginau O; go nigo Yeshurun waina a matadoa ko.

³Nalakena aga wo daki noai paki navanua waina e madou, go nap̃ap̃a noaisara maga paki natano garagara: aga wo daki kovai naatagu paki naworaworam̃a, go navasap̃iakiana aginau paki nawasim̃a:

⁴Go euga wo ulua sake dapala nam̃enau m̃aleoputo ni noai maga, go dapala nakau willo maga nadigi ni noaisara maga.

⁵Tea sikai ega wo noa, Kinau a pei tea ki Yehovah; go tea p̃ota ega wo dum̃ana soso e ki nagisa ni Yakob; go tea p̃ota sikai ega wo dum̃ana midiri doko nam̃elearuna ki Tea ki Yehovah, po dum̃ana salagisana ki nagisa ni Israel.

⁶Yehovah, Nawota ni Israel, go Tea Taulua aneana Yehovah ki taua maga, e noa dapala nea, e naga: Kinau a pei tea vea, go kinau a pei tea edaku; go Sup̃e p̃ota sikai e dika, ma kinau a sikigu.

⁷Go sei e dakiusi au? Ega vioso, go ega rogorogo ki nia, po lawosoki a naraegu. Sei e dogorogo pae ragi ni tuai ki naleo maga waina euga wo umai? Euga noakisai ra ki tea waina ega wo pakilina.

⁸Kuga ta mataku mau, go kuga ta m̃anaunau mau: kinau a da pea noakisai ko asa pae ragi ni tuai, po da dogorogo ki nia mau, kite? Go nimu ku pei tea noasokisoki aginau maga! Sup̃e p̃ota sikai e doko go kinau, kite? Vatu Laketoko e dika; kinau a da atae te seara mau.

⁹Tea maga waina eu mari nasup̃e taeana sikai, eu mamau puti pei tea p̃alo; go naleo maga waina eu maro ara eu da madeada pei nasilaeana mau; go tea noasokisoki adeada maga eu da leosai kite atae mau; naga nara euga vei tea toropusiana paki namaliereana.

¹⁰Sei e mari dawona ki sup̃e sikai, kite nasup̃e taeana sikai? Naleo wanogoe e silae nasava?

¹¹Kuga leo, taua aneana mamau puti euga wo maliere; go mataisau maga eu pei naatam̃oli: euga wo mamau puti saisai, euga wo lawodu; euga wo mataku, euga wo matamaliere.

¹²Tea mataisau ni airon e mari tagoto, po p̃osiwosi ki nia doko nam̃elevara vavaga maga, po p̃okati m̃ata ki nia ki hammer, po p̃osiwosi ki nia ki nakasuaana ni nam̃elearuna: go e pitolo, go nakasuaana aneana e doropusi a; e da munu noai mau, go e mawosa.

¹³Mataisau e pitosi namea totowo sikai; e midiri totowo kakana ki tea midiri sikai; e mari usi a ki vao sikai, e midiri m̃ata ki nia ki tea davivigoro sikai, po mari dawona ki nia e dakiusi natakiusiana ni naatam̃oli sikai, dakiusi naleom̃atakiana ni naatam̃oli sikai, naga ega toko ekopu ni nasum̃a.

¹⁴E dae kotovi nakau sidar maga; kite e matadoa nakau hom sikai kite oak sikai waina e dum̃ana maneana mari a e ulua pakilagi m̃aleoputo ni nakau maga ni namalasi; e lawo nakau sidar sikai, go usa e puevue a go e p̃arua pakilagi.

¹⁵Go ega wo pei agi naatam̃oli naga ega tap̃ara ki nia; go e dape kovai a po dum̃ana daragia asa; go e dokoni a, po dao ni navinaga asa: go e mari sup̃e sikai asa, po lotu ki nia; e mari nasup̃e taeana sikai asa, po dowo dap̃olosiwo paki nia.

¹⁶E dape kovai a po dap̃ara ki nia ki nakapu; e peni nap̃okasi asa, po gani a, po puka: go e datalai asa, po naga, Aha, kinau a pivitinu, a punusi nakapu:

¹⁷Go ki namagovai kakana waina e doko, e mari sup̃e sikai asa, nasup̃e taeana aneana: e dowo dap̃olosiwo paki nia po lotu ki nia, po pavara ni a, doko do naga, P̃a mauti au; nalakena ku pei sup̃e aginau.

¹⁸Eu da atae mau, go eu da midoaki p̃otae mau: nalakena namatada eu pei tea vulutigoroana naga eu mari sa leosai mau; go nap̃op̃oda naga eu mari sa midoaki atae mau.

¹⁹Go namidoakiusiusiana e dika nap̃op̃oda, go naataeana go namidoakiataeana, naga euga noa, A po dap̃ara ki namagovai kakana ki nakapu; go a po dao ni navinaga doko nam̃elevara vavaga kakana maga; a peni nap̃okasi asa po gani a: go namagovai kakana waina e doko, aga wo mari a ega vei tea mamaragokiana sikai, kite? Aga wo dowo dap̃olosiwo paki nalakelake ni nakau sikai, kite?

²⁰E do gani natano‐apu: p̃op̃o midoaki‐sap̃o sikai e do mari a e sasap̃o, naga e mari sa dum̃ana mauti naatana, kite noa naga, Nasorosoroana sikai e da doko nam̃elearugu ni matua, kite?

²¹P̃a midoaki parati ki naleo maga waia, Yakob O; go nigo Israel, nalakena ku pei tea suasua aginau: kinau a mari dawona ki‐go; ku pei tea suasua aginau: Israel O, p̃a wo da pei tea maliokiana aginau mau.

²²A po kovagoro natapiriana anigo maga dapala napopouru wono sikai, go namarinaleosaana anigo maga dapala namavu kasua sikai: p̃a liliu, p̃a maradoa paki nau; nalakena a daulua ko.

²³Kuga lega, nakoroatelagi maga O, nalakena Yehovah e mari a; kuga rarasa, nimu epua maga ni maramana; kuga tatapua ki nalegaana tava maga, mala ni nakau O, go sara nakau sikasikai kakana maga: nalakena Yehovah e daulua Yakob, go ega wo pei tea samasamaniana doko Israel.

²⁴Yehovah, Tea Taulua ko, go nae waina e mari dawona ki‐go m̃elu nasum̃a ni kanao, e noa dapala nea, e naga, Kinau a pei Yehovah, kinau a mari sara naleo mamau puti; a dum̃agu sai ki nakoroatelagi maga; go a sikigu p̃elesa ki maramana;

²⁵A mari piri navaivaiana maga ki tea vasapua maga, po mari tea kikita maga eu daratara; a doa liliua ki tea manumatua maga, po mari naataeana adeada e pei naveilalaana:

²⁶A lawosoki navasaana ki tea suasua aginau, po pakavuro nanoap̃otaeana ki tea tautauana aginau maga; a noa nalo ni Yerusalem, a naga, Naatam̃oli maga euga wo doko asa; go nalo ni natokoana maga ni Yudah, Euga wo pei tea tavagiana, go aga wo sike lawo ki tea makaka kakana maga:

²⁷A noa ki epua, a naga, P̃a garagara, go aga wo mari noaisara kakam̃a maga euga wo dap̃a:

²⁸A noa nalo ni Sairus, a naga, Nae e pei tea leo parati ki aginau, go ega wo mari pataka ni namasauana aginau mamau puti: go aga wo noa nalo ni Yerusalem, Ega wo pei tea tavagiana; go paki nasum̃a tapu, Laketano kakam̃a ega wo pei tea lawo‐kilaketokoana.