Read Nguna Togoa Etafe North ISA 45 Bible Online

ISA 45 - Nguna Togoa Etafe North bible

ISA 45

¹Yehovah e noa ki tea vuvuraikiana aneana, Sairus nogo, waina e puasoki nam̃elearuna ni matua, e noa dapala nea, naga, Aga wo mari nalauna maga euga vakitano naraem̃a, go aga wo duatilua naware ni nawota maga; aga wo manigo p̃olagati namata maga kivea ki‐go, go namata‐pua maga euga wo da pei tea kokoroana mau;

²Kinau aga wo pea ki‐go, po mari napua ragoragoa maga euga m̃om̃oa: aga wo mari‐p̃oraworae namata‐pua maga ni brass, po dae kotokotovi tea walagoto maga ni airon:

³Aga wo dua ko naleo wia dasurukiana maga, tea tauakiana maga ni tokora sili maga, naga p̃a atae naga kinau, Yehovah, waina a soso ko pae nagisam̃a, kinau a pei Sup̃e ki Israel.

⁴E pei nalakena tea suasua aginau Yakob, go Israel tea matadoaana aginau, naga a po soso ko ki nagisam̃a: kinau a soso ko pae nagisam̃a, ma ku da atae au mau.

⁵Kinau a pei Yehovah, tea p̃ota e dika; Sup̃e sikai e da doko mau, ma kinau a sikigu: kinau a dasoki ko, ma ku da atae au mau:

⁶Naga euga atae pae taleva ni elo sake, go pae taleva ni elo musu, naga tea p̃ota e dika, ma kinau a sikigu: kinau a pei Yehovah, go tea p̃ota e dika.

⁷Kinau a mari namarama, po dawona ki namaligo; a mari nawiaana po dawona ki nasaana; kinau a pei Yehovah go kinau a mari naleo maga mamau puti wanogoe.

⁸Kuga lawolawo pae elagi, nakoroatelagi maga, go tokora vakilagi maga euga taki namarinaleoleanaana; natano ega maga naga namautipauriana ega m̃elu asa, go naleanaana ega p̃otu sake asa; kinau Yehovah a mari dawona ki nia.

⁹Ai ki tea waina e pululu dip̃a Tea Tawona ki nia, lasa sikai ni naruku dip̃a tea mari lasa ni naruku! Naruku ega wo noa ki tea waina e do p̃osiwosi ki nia, Ku do mari nasava, kite? Kite nawosiana anigo, E dika ki nam̃elearuna, kite?

¹⁰Ai ki tea waina e noa ki tamana, Ku pesi nasava? Kite ki p̃ilana, Ku pisola ki nasava?

¹¹Yehovah, Tea Tapu ki Israel, go Tea Tawona ki nia, e noa dapala nea, e naga, Go nigo p̃a wo pusuusu kinau ki naleo maga waina euga wo umai nalo ni natugu maga, kite? Kite dip̃aki nau nalo ni nawosiana ni nam̃elearugu, kite?

¹²Kinau a mari maramana, po dawona ki naatam̃oli e doko asa: go kinau, e pei nam̃elearugu maga waina ero sai ki nakoroatelagi maga, go kinau a dip̃aki taua mamau kakada.

¹³Kinau a sike a doko namarinaleoleanaana, go aga wo mari leana ki napua aneana maga mamau puti: nae ega wo davagi natokoana aginau, go ega wo peresi tea vua‐pavakotoana aginau maga euga tum̃ada doko, naulu ega tika, go namoriana ega tika, Yehovah ki taua maga e noa e.

¹⁴Yehovah e noa dapala nea, e naga, Nasogolapaana ni Ityipt, go naleo musagiana maga ni Ethiopia, go naka ni Seba, naatam̃oli p̃atoko warua maga, euga wo duagoto umai punusi ko, go euga wo pei tea anigo maga; euga wo dausi ko; euga wo pilake namori maga ni vatu duagoto umai, go euga wo dowo dap̃olosiwo paki‐go, go euga wo mari navavaraniana paki‐go, doko do naga, Lomau Sup̃e e doko ako; tea p̃ota e dika, ma nae e sikina.

¹⁵Lomau, nigo ku pei Sup̃e sikai waina ku pei p̃aia, Sup̃e ki Israel O, Tea Maumau pauri.

¹⁶Tea maga waina eu do mari nasup̃e maga, euga wo mamau puti pano paki nadododaoana: euga wo pei tea toropusiana paki namaliereana, go navinovinoiana.

¹⁷Ma Israel ega wo pei tea mautiana doko Yehovah ki namautipauriana doko mau doko: kuga wo da pei tea toropusiana paki namaliereana kite navinovinoiana mau, pa pa ega tu mau du.

¹⁸Nalakena Yehovah waina e dawona ki nakoroatelagi maga, Sup̃e waina e dum̃ana mari dawona ki maramana, po mari a; waina e lawoki‐laketoko asa, e dawona ki nia naga ega ta p̃alo doko mau, e dawona ki nia naga ega vei natokoana; nae e noa dapala nea, e naga, Kinau a pei Yehovah; go tea p̃ota e dika, ma kinau a sikigu.

¹⁹Kinau a da pasa sili doko tokora maligoligo sikai ni maramana mau; a da noa ki naworawora ni Yakob naga, Ku laaga m̃oli au: kinau Yehovah a pasa namarinaleoleanaana, a noasai naleo maga waina eu leana.

²⁰Kuga tum̃amu saisai ki mu po umai; kuga mamau puti disurisu paki m̃aladigi, nimu tea ni nalauna maga waina ku pei tea mautiana: tea maga waina eu dapetape nasup̃e taeana ni nakau adeada eu dika naataeana, go eu dapasavasa paki sup̃e sikai waina e da mariatae mauti mau.

²¹Kuga mari m̃ata ki navululuana animu po noasai a; io, euga tum̃ada pusuusu paki da: sei e noasai tea wanogoe pae ragi ni tuai? Sei e dogorogo kinia pae ragi vea mau? E da pei kinau, Yehovah, kite? Go Sup̃e p̃ota sikai e dika, ma kinau a sikigu; Sup̃e leana sikai, go tea maumau pauri sikai; tea p̃ota e dika, ma kinau a sikigu.

²²Kuga umai punusi au, go kuga wo pei tea mautipauriana, namatap̃ago maga mamau puti ni maramana: nalakena kinau a pei Sup̃e, go tea p̃ota e dika, ma kinau a sikigu.

²³Kinau a pivisa dum̃agu pae au, navasaana e m̃elu nawokagu doko naleanaana, go ega wo da liliu mau, naga sara nap̃atua euga wo ditip̃atua paki nau, sara namena euga wo pivisa.

²⁴Tea sikai ega wo noa naga, Namarinaleoleanaana go nakasuaana ero doko Yehovah e sikina; naatam̃oli maga euga wo umai punusi a; go tea maga mamau puti waina eu mari namaetoana dip̃a e, euga wo maliere.

²⁵Naworawora mamau puti ni Israel euga wo pei tea mari‐leana‐kiana doko Yehovah, go euga wo samasama asa.