Read Nguna Togoa Etafe North ISA 46 Bible Online

ISA 46 - Nguna Togoa Etafe North bible

ISA 46

¹Bel e kolokolo, Nebo e do soki pakitano; nasup̃e adeada maga eu doko nam̃adu ni nalo tuavati maga go ni katel: tea maga waina e one ara one naga euga dapetape mu, eu po dum̃ada pei natapetapeana sikai, naleo madaga sikai paki tea mawosa maga.

²Eu do soki pakitano, eu mamau puti kolokolo; eu da mariatae pualua naleo madaga mau, ma eu dum̃ada paki naviragi‐luapavakotoana pano.

³Kuga taki dorogo paki nau, nasum̃a ni Yakob O, go nimu namagovai mamau ni nasum̃a ni Israel, tea tapetapeana aginau m̃elu nap̃ele, waina ku pei tea tapetapeana pae naaleatia waina ku pakilina asa pa pa paki naaleatia waia:

⁴Go pa pa paki ragi ni navei‐tea‐matua‐ana animu, kinau a pei nae, go pa pa paki naveikapuaraana animu, aga wo dapetape mu: kinau a dawona ki, go kinau aga wo dapetape; aga wo ovaova, po mauti.

⁵Kuga wo noa naga a dakiusi sei, po mari gami aro pitotowo, po noa naga natakiusiana aginau e dakiusi sei, naga aro pataka sikai?

⁶Tea maga wanogoe eu muuni p̃aragoto ki kold m̃elu dua ki nala, po dowogi silver lasa rowogi, eu pasadapui mataisau sikai ni kold, go nae e mari a e pei sup̃e sikai; eu dowo dap̃olosiwo, go eu lotu.

⁷Eu dape a doko napauda, eu dapetape a, po lawo ki nia doko naliana, go e lawodu; ega wo da m̃elu dua ki naliana mau: go naata sikai e pe vioso paki nia, ma e pe ta mariatae pasadara, kite pualua e m̃elu dua ki narogokitesaana aneana mau.

⁸Kuga midoaki parati ki tea waia, po lawodu kasua: kuga moro midoa ki nia, nimu tea tapiri maga O.

⁹Kuga midoaki parati ki naleo vea maga ni tuai: nalakena kinau a pei Sup̃e, go tea p̃ota e dika; kinau a pei Sup̃e, go tea takiusi au e dika, e dika sa;

¹⁰Kinau a peanoasai namatap̃ago edaku pae naatulakeana, go pae ragi maga ni tuai ki naleo maga waina eu da pei tea mariana mau; doko do naga, Namidoakip̃otaeana aginau ega wo lawodu, go aga wo pakavuro namidodoana mamau puti aginau:

¹¹Doko do soso manu serekoto sikai m̃elu ist umai, naatam̃oli ni namidoakip̃otaeana aginau pae navanua sikai ni uvea; kinau a noa e, go aga wo mari a, naga ega vakilina; kinau a midoakisoki a, go aga wo mari a.

¹²Kuga taki dorogo paki nau, nimu tea vei p̃op̃o kasua maga, waina ku du uvea ki namautiana:

¹³A mari namautiana aginau e paki m̃aladigi, ega wo da doko uvea mau, go namautipauriana aginau ega wo da mari daliali mau; go aga wo doropusi namautipauriana Sion, go nasamasamaana aginau Israel.