Read Nguna Togoa Etafe North ISA 47 Bible Online

ISA 47 - Nguna Togoa Etafe North bible

ISA 47

¹P̃a siwo umai, po dasake doko nam̃otam̃ota, Babelon natuna nagoroi atara O; p̃a tasake doko natano, malo tasake e dika, naka ni Kaldea natuna nagoroi O: nalakena p̃a wo da moro pei tea sosoana ki tea manainai go matemate mau.

²P̃a tape vatumaa maga, po mani korn: p̃a sawo lua nakulukulu taugoro rae anigo, p̃a tuatilua sugoro kovagoro varau anigo, p̃a lagai natuam̃a, p̃a vaki noaisara maga.

³Nam̃alam̃alaana anigo ega wo pei tea lagai‐pakasakiana, go tea ni namaliereana anigo ega wo dokolina: aga wo mari nasikoana, go aga wo da mari malemale mau.

⁴Tea Taulua anigida, nagisana Yehovah ki taua maga, nae e pei Tea Tapu ki Israel.

⁵P̃a toko natano po punuta, go p̃a vaki namaligo po puoli, naka ni Kaldea natuna nagoroi O: nalakena p̃a wo da moro pei tea sosoana ki Nawota Nagoroi ni Namarakiana maga mau.

⁶A maritausu ki narei aginau, a mari tea veaniana aginau e pei tea p̃alo, po pitua ki da paki nam̃elearum̃a: ku da pisei ki da te nadodomiana mau; ku mari nakau nanoa anigo e madaga liu paki tea matua tuai maga.

⁷Go ku noa naga, Kinau a pei nawota nagoroi sikai doko mau doko: go ku da midoa ki naleo maga wanogoe nap̃op̃om̃a mau, kite midoa ki parati ki namatap̃ago edaku kakana mau.

⁸Nalakena tea wanogoe, p̃a rogo tea waia, nigo tea dodomi p̃arua ki namaropaana, tea dodo‐p̃arop̃aro, waina ku noa nap̃op̃om̃a, ku naga, Kinau a doko, go tea p̃ota e dika ma kinau a sikigu; aga wo da dasake doko dapala nagoroi malepu sikai mau, kite atae natapepuolikiana ni piakiki mau:

⁹Ma naleo dua wanogoe eroga wo pakilina ki‐go ragi ni nawilimatana sikai doko naaleatia sikai maau, natapepuolikiana ni piakiki, go navei‐malepu‐ana: eroga wo pa parati ki‐go m̃araverave nalaapaana ni nawosidoaana anigo maga, go nalaapaana ni nakikitaana anigo maga.

¹⁰Nalakena ku pavatu nasigisigileoana anigo; ku noa naga, Te naata e da punusi au mau; namanumatuaana anigo go naataeana anigo ero maraki sasap̃o ki‐go: go ku noa nap̃op̃om̃a, ku naga, Kinau a doko, go tea p̃ota e dika ma kinau a sikigu.

¹¹Nalakena tea wanogoe nasaana ega wo pakilina ki‐go; p̃a wo da atae tokora waina ega wo sake pae asa umai mau: go tea sa ega wo darup̃a ko; p̃a wo da mariatae doropusi a mau: go namarisakiana ega wo m̃araverave pa parati ki‐go, waina ku da atae a mau.

¹²P̃a lawodu kasua doko navei‐nakikitaana anigo maga, go doko nalaapaana ni nawosidoaana anigo maga, waina ku p̃osiwosi mawosa asa pae ragi ni navei‐naataraana anigo; mase ku pe mariatae p̃ia asa, mase ku pe mariatae marimatua.

¹³Ku mawosa nalo ni nalaapaana ni tea vusum̃aki anigo maga: tea atae p̃ota maga ni natap̃otawotaeana ni nakoroatelagi, tea leousiusi m̃asoe maga, tea veanoasai maga nalo ni atelagi maga euga tuleana, po mauti ko pa dua ki naleo maga waina euga wo pakilina ki‐go.

¹⁴P̃a leo, euga wo dapala nap̃olaga; nakapu vavaga ega wo gani puoli ki da; euga wo da mariatae dum̃ada pualua ra m̃elu dua ki nakasuaana ni mena ni nakapu mau: nakapu wanogoe ega wo da pei nam̃elevara vavaga sikai waina euga tatalai asa mau, kite nakapu vavaga sikai waina euga tum̃ada daragi ra asa mau.

¹⁵Tea wosidoa anigo maga waina ku p̃osiwosi mawosa ara pae ragi ni navei‐naatara‐ana anigo, euga wo manigo pei tea tapalana maga; euga wo surata darataara pae napua adeada pano, sara naata sikasikai; tea waina ega mauti ko ega wo dika.