Read Nguna Togoa Etafe North ISA 48 Bible Online

ISA 48 - Nguna Togoa Etafe North bible

ISA 48

¹Kuga rogo tea waia, nasum̃a ni Yakob O, waina ku pei tea sosoana ki nagisa ni Israel, go waina ku dave m̃elu naware ni Yudah; waina ku pivisa pae nagisa ni Yehovah, po noasai Sup̃e ki Israel, ma e da pae nalomauana kite namarinaleoleanaana mau.

²Nalakena eu dum̃ada soso ra ki tea ni natokoana tapu, po pavatu Sup̃e ki Israel; Yehovah ki taua maga e pei nagisana.

³Kinau a noasai ki naleo vea maga pae ragi ni naatulakeana; go eu dave m̃elu nawokagu, go a mari ra eu pei tea ataeana: a mari ra m̃araverave, go eu pakilina.

⁴Nalakena a atae naga ku pei p̃au kasua, go nanoam̃a e pei nawa sikai ni airon, go naraem̃a e pei brass;

⁵Nalakena tea wanogoe a noakisai ko asa pae ragi ni tuai; ragi waina e ko da pakilina mau, a pisei ki‐go asa: mase ku pe noa naga, Nasup̃e aginau e mari ra, go nasup̃e taeana aginau, go nasup̃e takiana aginau eu pitip̃aki ara.

⁶Nigo ku dogo sua e; go p̃a leo punusi tea mamau puti wanogoe; go nigo, p̃a wo da noasai a mau, kite? A pisei ki‐go naleo vau maga ragi waia, naleo surukiana maga, waina ku da pea atae ra mau.

⁷Eu pei tea tawonakiana ragi waia, eu da pei tea ni ragi ni tuai mau; go pea ki naaleatia waia ku da dogo nalo kakada mau; mase ku pe noa naga, P̃a leo, kinau a atae ra.

⁸Io, nigo ku da dogo mau; io, nigo ku da atae mau; io, pae ragi ni tuai nadaligam̃a e da masai mau: nalakena a atae naga nigo ku mari malauweluki p̃arua, go naga ku pei tea sosoana ki tea tapiri pae naaleatia ni navakilinaana anigo.

⁹Nalakena nagisagu a soki namaetoana aginau pitip̃atip̃a, go nalakena nasamasamaniana aginau aga wo soki du nalo kakam̃a, naga aga ta daelua ko mau.

¹⁰P̃a leo, a maridogo ko, ma ku da dakiusi silver mau; a maridogo ko upu ni nakapu ni narogokitesaana.

¹¹Nalakena nagisagu, io nalakena nagisagu a do mari a; nalakena ekasana nagisagu ega wo pei tea mari‐m̃oli‐kiana? Go nasamasamaana aginau aga wo da dua tea p̃ota asa mau.

¹²Kuga taki dorogo paki nau, Yakob O, go Israel tea sosoana aginau: kinau a pei nae; kinau a pei tea vea, go kinau a pei tea edaku.

¹³Nam̃elearugu e lawo ki maramana, go nam̃elearugu ni matua e p̃elesa ki nakoroatelagi maga: ragi waina a pioso paki da, eu mamau puti lawodu.

¹⁴Kuga tum̃amu saisai ki mu, nimu mamau puti, po daki dorogo; sei kakada waina e noasai naleo maga waia? Yehovah e maro asa: ega wo lawosoki namasauana aneana Babelon, go naruna ega wo dip̃a tea ni Kaldea maga.

¹⁵Kinau, kinau a pasa; go a soso e: a piragi a umai, go nae ega wo mari napua aneana ega wo disu p̃ia.

¹⁶Kuga umai paki m̃aladigi kinau, kuga rogo tea waia; a da pasa panako mau pae ragi ni naatulakeana; pae ragi waina e doko, kinau ma a doko: go Yehovah Sup̃e go naatana ero dip̃aki nau.

¹⁷Yehovah, Tea Taulua ko, Tea Tapu ki Israel, e noa dapala nea, e naga: Kinau a pei Yehovah Sup̃e anigo, waina a pasa pisei ki‐go tea waina p̃a wia asa, go waina a maraki ko pae napua waina p̃a vae asa pano.

¹⁸Awi, ku pe rogo parati ki natipakiana aginau maga, namaroana anigo e pe tapala noaisara sikai, go namarinaleoleanaana anigo e pe tapala napeao maga ni natasi:

¹⁹Go naworaworam̃a e pe tapala naworaone, go nawasi ni nawarem̃a e pe tapala napatina maga: nagisada e pe ta pei tea taeluaana kite maripuolikiana pa dua ki naraegu mau.

²⁰Kuga tave m̃elu dua ki Babelon pano, kuga sava dua ki naka ni Kaldea; kuga rogorogo ki nia ki nadaleo ni nalegaana, kuga noasai a, kuga maga lua e pano pa pa paki namatap̃ago ni maramana: kuga noa naga, Yehovah e daulua tea suasua aneana Yakob.

²¹Go eu da madou mau ragi waina e maraki da duaduru masop̃alo maga: e mari noai maga eu madeada sara dave vatu laketoko: e p̃orae vatu laketoko, go noai maga eu sara dave.

²²Natam̃ateana ega wo dika paki tea sigisigileo, Yehovah e noa e.