Read Nguna Togoa Etafe North ISA 49 Bible Online

ISA 49 - Nguna Togoa Etafe North bible

ISA 49

¹Kuga taki dorogo paki nau, naureure maga O; go kuga rogo, nimu nalauna maga ni uvea: Yehovah e soso au pae nasum̃a ni kanao; pae nap̃ele ni p̃ilagu e noasai nagisagu:

²Go e mari nawokagu e dakiusi lova makali sikai, e dasuru kinau doko melu ni nam̃elearuna; go e mari au a pei natura lidalida sikai, e pavaigoro au doko p̃olaga aneana:

³Go e noa kinau, e naga, Nigo ku pei tea suasua aginau Israel O, waina aga wo pei tea samasamaniana asa.

⁴Ma kinau a noa naga, A p̃osiwosi m̃oli, a pitua ki p̃alo ki nakasuaana aginau, go e da silae mau: ma lomau naleanaana aginau e doko sikoti Yehovah, go namoriana aginau sikoti Sup̃e aginau.

⁵Go e pei nanoaana ki Yehovah waina e dawona ki nau m̃elu nasum̃a ni kanao naga aga vei tea suasua aneana, naga aga viragi Yakob ega moro liliu paki nia, go naga Israel ega vei tea saisaikiana paki nia, (nalakena kinau a pei tea dodomadaganiana namata ni Yehovah, go Sup̃e aginau e po pei nakasuaana aginau:)

⁶Yehovah e naga, E pei tea kiki naga p̃a vei tea suasua aginau naga p̃a sike nalauna maga ni Yakob, go naga p̃a viragi tea mautiana maga ni Israel euga liliu: aga wo moro pitua ki‐go p̃a vei namarama sikai agi tea ni nalauna p̃ota maga, naga p̃a vei namautipauriana aginau pa pa paki namatap̃ago ni maramana.

⁷Yehovah, Tea Taulua ki Israel, go Tea Tapu aneana, e noa dapala nea paki tea waina naatam̃oli e midoaki p̃alo ki nia, waina e pei tea mamaragokiana ki nalauna maga, tea suasua sikai ki tea maramara maga, e naga, Nawota maga euga wo punusi a po duleana; go tea maraki maga euga wo dowo dap̃olosiwo; nalakena Yehovah waina e pei nalomauana, go Tea Tapu ki Israel waina e matadoa ko.

⁸Yehovah e noa dapala nea, e naga, Ragi ni nasaup̃iaana sikai a pasadara ko, go doko naaleatia sikai ni namautipauriana a silae ko: go aga wo pavaigoro ko, po pitua ki‐go p̃a vei navasasokiana sikai agi narei, naga p̃a lawosoki navanua, naga p̃a mari ra euga veanipioli ki tea veanipiolikiana makaka maga;

⁹Naga p̃a noa ki tea maga waina eu pei tea soliana, p̃a naga, Kuga tave pano; go ki tea maga waina eu doko namaligo doko, Kuga tum̃amu pisei ki mu lina. Euga wo ganikani napua maga, go tava m̃aalu maga mamau puti euga wo pei napega adeada.

¹⁰Euga wo da pitolo kite madou mau; go navivitinuana go elo eroga wo da atugi ra mau: nalakena tea waina e dodomi ra, ega wo pitana ki da, go ega wo maraki da paki namata noai maga.

¹¹Go aga wo mari tava aginau maga mamau puti euga wo pei napua sikai, go napua lapa aginau maga euga wo pei tea sikeana pakilagi.

¹²P̃a leo, nara maga euga wo pae uvea umai: p̃a leo, euga wo pae north go pae west; go euga wo pae navanua ni Sinim, tea mamau puti euga wo umai.

¹³Kuga lega, nakoroatelagi maga O; go p̃a laelaea, maramana O; go kuga tatapua ki nalegaana, tava maga O: nalakena Yehovah e pakavakale narei aneana, go ega wo maritadodomi tea rogokitesa aneana.

¹⁴Ma Sion e naga, Yehovah e doropusi au, Nawota aginau e malio kinau.

¹⁵Nagoroi sikai e mariatae malio ki piakiki aneana waina e do pakasusu ki nia, dapala e pe ta dodomi natu ni nap̃elena mau, kite? Io, nae e mariatae malio ki nia, ma kinau aga wo da malio ki‐go mau.

¹⁶P̃a leo, a dae midiri nagisam̃a nawoka ni nam̃elearugu dua; p̃aaka kakam̃a maga eu doko naraegu pitip̃atip̃a.

¹⁷Tea tavagi ko maga eu mari m̃araverave liu tea mari‐p̃aragoto ako maga; go tea maga waina eu mari ko namakakaana, eu do m̃elu dua ki‐go pano.

¹⁸P̃a sike namatam̃a maga po leo daliviri; p̃a leo, tea mamau puti wanogoe eu saisai, po umai punusi ko. Kinau a mauri, Yehovah e noa e, go p̃a wo suni pulum̃a ki da, dapala tea ni narekeiana sikai, po dum̃am̃a dasoki ko ara dapala nagoroi laki sikai.

¹⁹Nalakena namakakaana anigo go maso maladi anigo maga, go navanua anigo waina e pei tea marisasakiana, ragi waia euga wo kiki, euga wo da pataka ni naatatoko maga mau, go tea maga waina eu dinomi ko, euga wo du uvea.

²⁰Piakiki maga waina p̃a wo peani ra edaku ki natapep̃uoli‐kiana ni tea vea maga, nara euga wo noa nadaligam̃a, euga wo naga, Tokora waia e kiki kinau, p̃a tua au tokora sikai waina aga toko asa.

²¹Go p̃a wo noa nap̃op̃om̃a, p̃a wo naga, Sei e maginau pisola ki tea maga waia? Kinau a dape puoli ki piakiki aginau maga, a pei tea tim̃o, tea vua‐pavakotoana sikai, tea surata papiliu. Go sei e pakale tea maga waia? P̃a leo, kinau a pei tea toropusiana a sikigu doko; go tea maga waia eu pae esava umai?

²²Yehovah Sup̃e e noa dapala nea, e naga, P̃a leo, aga wo sike nam̃elearugu paki nalauna p̃ota maga, po sike lawo ki manututu aginau paki narei maga: go euga wo piragi natum̃a naanoai maga umai doko narum̃ada, go natum̃a nagoroi maga euga wo pei tea tapetapeana doko napauda maga.

²³Go nawota maga euga wo pakale ra, go nawota nagoroi maga euga wo pakasusu ki da: euga wo kolo suai natano paki‐go, po menamenae nam̃otam̃ota natuam̃a; go p̃a wo atae naga kinau a pei Yehovah, go tea maga waina eu leogoro au, euga wo da maliere mau.

²⁴Tea vuti‐luapavakotoana ega vei tea viragi‐liliuakiana m̃elu dua ki tea marimatua, kite? Kite tea viragi‐lua‐pavakotoana maga ki tea mari kasua euga vei tea vualuaana, kite?

²⁵Ma Yehovah e noa dapala nea, e naga, Io, tea viragilua pavakotoana maga ki tea mari kasua, euga vei tea viragi‐liliua‐kiana, go tea vuti‐lua‐pavakotoana ki tea mataukiana, ega vei tea vualuaana: nalakena aga wo pululu ki tea waina ega wo pululu ki‐go, go aga wo mauti natum̃a maga.

²⁶Go tea maga waina eu diesoki ko, aga wo mari ra euga wo dum̃ada gani nap̃okasida; go euga wo dum̃ada munu nadada po matamaloku asa, dapala waine vau: go sara nap̃okasi euga wo atae naga kinau Yehovah, a pei Tea Mautipauri ko, go Tea Taulua ko, Tea Kasua Mau ki Yakob.